ಉದ್ಯಮಿಗೆ 32.5 ಲಕ್ಷ ರೂ ಪಂಗನಾಮ ಹಾಕಿದ ಕಾರ್ ಡೀಲರ್

ಪುಣೆ: ಲಕ್ಷುರಿ SUV ಕಾರನ್ನು ರಿಯಾಯತಿ ದರದಲ್ಲಿ ಕೊಡಿಸುವುದಾಗಿ ಹೇಳಿದ ಕಾರ್ ಡೀಲರ್, ಉದ್ಯಮಿಯೊಬ್ಬನಿಗೆ ಬರೋಬ್ಬರಿ 32.5 ಲಕ್ಷ ವಂಚನೆ ಮಾಡಿಸಿದ್ದಾನೆ.

ಟೊಯೊಟಾ ಅಧಿಕೃತ ಡೀಲರ್ ಎಂದು ಪರಿಚಯಿಸಿಕೊಂಡ ಆರೋಪಿ ನನ್ನಿಂದ 32 ಲಕ್ಷ ರೂಪಾಯಿ ಪಡೆದುಕೊಂಡು ಕಾರ್ ಡೆಲಿವರಿ ಮಾಡಿಲ್ಲ ಎಂದು ಉದ್ಯಮಿ ಅಂಕಿತ್ ಪಟೇಲ್ (31) ಎಂಬ ಉದ್ಯಮಿ ದೂರಿದ್ದು ಚತುಶೃಂಗಿ ಪೊಲೀಸರು ಪ್ರಕರಣ ದಾಖಲಿಸಿಕೊಂಡಿದ್ದಾರೆ.

ಟೊಯಾಟಾ ಕಾರ್ ಖರೀದಿಸಲು ಆನ್‌ಲೈನ್‌ನಲ್ಲಿ ಒಳ್ಳೆಯ ಡೀಲ್‌ಗಾಗಿ ಹುಡುಕಾಟ ನಡೆಸಿದ್ದೆ. ಅದರಲ್ಲಿ ಕಾಣಿಸಿದ ಜಾಹೀರಾತೊಂದನ್ನು ನೋಡಿ ಸಂಪರ್ಕಿಸಿದೆ. ಸಂಪರ್ಕಕ್ಕೆ ಸಿಕ್ಕ ಸೇಲ್ಸ್ ಎಕ್ಸಿಕ್ಯೂಟಿವ್ ನಾವು ಅಧಿಕೃತ ಡೀಲರ್ ಎಂದು ಹೇಳಿಕೊಂಡರು. ಅಕ್ಟೋಬರ್ 31 ರಂದು ಪುಣೆಯಲ್ಲಿ ಡೀಲರ್‌ನನ್ನು ಭೇಟಿಯಾದೆ. ಆತ 34 ಲಕ್ಷ ರೂಪಾಯಿ ಕಾರ್ ಮೇಲೆ 1.5 ಲಕ್ಷ ರೂಪಾಯಿ ರಿಯಾಯತಿ ಕೊಡಿಸುವುದಾಗಿ ನಂಬಿಸಿದ. ನವೆಂಬರ್ 1 ರಂದು ನಾನು ಹಣ ಪಾವತಿಸಿದೆ. ಅವರನ್ನು ನಂಬಿ ಹಣ ಪಾವತಿಸಿ ಬಹಳ ದಿನಗಳಾದರೂ ಕಾರ್ ಡೆಲಿವರಿ ಆಗದಿದ್ದಾಗ ನಾನು ಟೊಯೊಟಾ ಮಾರಾಟ ಮಳಿಗೆಗೆ ಹೋಗಿ ವಿಚಾರಿಸಿದೆ. ಆದರೆ ಅಂತಹ ಹೆಸರಿನ ವ್ಯಕ್ತಿ ನಮ್ಮ ಕಂಪನಿಯ ಡೀಲರ್ ಆಗಿಲ್ಲ ಎಂದು ಅಲ್ಲಿನ ಸಿಬ್ಬಂದಿ ಹೇಳಿದಾಗ ಹೌಹಾರಿ ಹೋದ ನಾನು ಪೊಲೀಸ್ ಠಾಣೆಯಲ್ಲಿ ಪ್ರಕರಣ ದಾಖಲಿಸಿದೆ ಎಂದು ಪಟೇಲ್ ಹೇಳಿಕೊಂಡಿದ್ದಾರೆ.

ಶಂಕಿತ ಆರೋಪಿ ಮೇಲೆ ಐಪಿಸಿ ಸೆಕ್ಷನ್ 420 ಮತ್ತು 406 ಅಡಿಯಲ್ಲಿ ಪ್ರಕರಣ ದಾಖಲಿಸಲಾಗಿದೆ.