12ರ ಬಾಲಕನಿಂದ ತಾಯಿಯಾದ 18ರ ಹುಡುಗಿ!

- 12ರ ಬಾಲಕನ ವಿರುದ್ಧ ಪ್ರಕರಣ -

ಕೊಚ್ಚಿ: ಕೇರಳದ ಕಲಮಶ್ಶೆರಿಯಲ್ಲಿ 12 ವರ್ಷದ ಬಾಲಕನ ವಿರುದ್ಧ ವಿಚಿತ್ರ ರೀತಿಯ ಪ್ರಕರಣ ದಾಖಲಾಗಿದೆ. 18 ವರ್ಷದ ಹುಡುಗಿಯನ್ನು ತಾಯಿ ಮಾಡಿದ ಆರೋಪವನ್ನು ಬಾಲಕನ ಮೇಲೆ ಹೊರಿಸಲಾಗಿದೆ. ಬಾಲಕಿ ಮಗುವಿಗೆ ಜನ್ಮ ನೀಡಿದ ಖಾಸಗಿ ಆಸ್ಪತ್ರೆಯ ವಿರುದ್ಧವೂ, ಅಪ್ತಾಪ್ತ ವಯಸ್ಕ ಬಾಲಕಿ ಗರ್ಭಿಣಿಯಾದ ಬಗ್ಗೆ ಪೊಲೀಸರಿಗೆ ಪೂರ್ವ ಮಾಹಿತಿ ನೀಡದ ಆರೋಪದಲ್ಲಿ ಪ್ರಕರಣ ದಾಖಲಿಸಲಾಗಿದೆ.

ಏನಿದು ಪ್ರಕರಣ?

ಕಲಮಶ್ಶೆರಿ ಖಾಸಗಿ ಆಸ್ಪತ್ರೆಯಲ್ಲಿ ನ.2ರಂದು 18 ವರ್ಷದ ಹುಡುಗಿ ಮಗುವಿಗೆ ಜನ್ಮ ನೀಡಿದ್ದಳು. ಈಕೆ ಗರ್ಭ ಧರಿಸುವಾಗ ಅಪ್ರಾಪ್ತವಯಸ್ಕಳಾಗಿದ್ದಳು. ಅಪ್ರಾಪ್ತ ವಯಸ್ಕಳ ಜತೆ ಲೈಂಗಿಕ ಸಂಪರ್ಕ ಕಾನೂನುಬಾಹಿರ. ಈ ಬಗ್ಗೆ ಹುಡುಗಿ ದಾಖಲಾದ ಆಸ್ಪತ್ರೆ ಸಿಬ್ಬಂದಿ ಪೊಲೀಸರಿಗೆ ಮೊದಲೇ ತಿಳಿಸಬೇಕಿತ್ತು ಎಂಬುದು ಮಕ್ಕಳ ಹಕ್ಕು ರಕ್ಷಣಾ ಮಂಡಳಿ ಮತ್ತು ಪೊಲೀಸರ ಹೇಳಿಕೆ.

ಬಾಲಕಿ ಮಗುವಿಗೆ ಜನ್ಮ ನೀಡುವ ಮುನ್ನಾ ದಿನ ಪೊಲೀಸರಿಗೆ ಈ ಬಗ್ಗೆ ಮಾಹಿತಿ ನೀಡಿರುವುದಾಗಿ ಆಸ್ಪತ್ರೆ ಮೂಲಗಳು ಹೇಳಿವೆ.

ಬಾಲಕನ ವಿರುದ್ಧ ಪ್ರಕರಣ

ಹುಡುಗಿಯ ಪೋಷಕರು ನೀಡಿದ ದೂರಿನ ಅನ್ವಯ 12 ವರ್ಷದ ಬಾಲಕನ ವಿರುದ್ಧ ಬಾಲನ್ಯಾಯಿಕ ಕಾಯಿದೆಯ 75ನೇ ವಿಧಿಯಡಿ ಪ್ರಕರಣ ದಾಖಲಿಸಲಾಗಿದೆ. ಅದೇ ರೀತಿ ಹುಡುಗಿ ನವಜಾತ ಶಿಶುವಿಗೆ ಜನ್ಮ ನೀಡಿದ ಆಸ್ಪತ್ರೆಯ ವಿರುದ್ಧ ಪಿಒಸಿಎಸ್‌ಒ ಕಾಯಿದೆ ಉಲ್ಲಂಘಿಸಿದ ಆರೋಪ ಹೊರಿಸಲಾಗಿದೆ.

ಇದು ಸಾಧ್ಯವೇ?

12ರ ಬಾಲಕನಿಂದ ಹುಡುಗಿ ಗರ್ಭಧರಿಸುವುದು ಸಾಧ್ಯವೇ ಎಂಬ ಮಹತ್ವದ ಪ್ರಶ್ನೆ ಈಗ ವೈದ್ಯಕೀಯ ತಜ್ಞರನ್ನು ಕಾಡುತ್ತಿದೆ.ಮಕ್ಕಳ ಹಕ್ಕು ರಕ್ಷಣಾ ಮಂಡಳಿಯೂ ಈ ಬಗ್ಗೆ ಶಂಕೆæ ವ್ಯಕ್ತಪಡಿಸಿದೆ.

ಶಿಶು ಕಲ್ಯಾಣ ಕೇಂದ್ರಕ್ಕೆ ನವಜಾತ ಶಿಶು

ಹುಡುಗಿ ಹೆತ್ತ ಶಿಶುವನ್ನು ಆಕೆಯ ಪೋಷಕರು ಕೊಚ್ಚಿಯ ಶಿಶು ಕಲ್ಯಾಣ ಕೇಂದ್ರಕ್ಕೆ ಒಪ್ಪಿಸಿದ್ದಾರೆ.