ಚಿದು ಪತ್ನಿ ನಳಿನಿ ವಿರುದ್ಧ ಸಿಬಿಐ ಚಾರ್ಜ್‌ಶೀಟ್‌

ಹೊಸದಿಲ್ಲಿ: ಶಾರದಾ ಚಿಟ್‌ ಫಂಡ್‌ ಹಗರಣಕ್ಕೆ ಸಂಬಂಧಿಸಿದಂತೆ ಸಿಬಿಐ, ಮಾಜಿ ಕೇಂದ್ರ ಸಚಿವ ಹಾಗೂ ಕಾಂಗ್ರೆಸ್‌ ನಾಯಕ ಪಿ.ಚಿದಂಬರಂ ಅವರ ಪತ್ನಿ ನಳಿನಿ ಚಿದಂಬರಂ ವಿರುದ್ಧ ದೋಷಾರೋಪಪಟ್ಟಿ ದಾಖಲಿಸಿದೆ. ಈ ಹಗರಣದಲ್ಲಿ ಶಾರದಾ ಸಮೂಹ ಸಂಸ್ಥೆಗಳಿಂದ ನಳಿನಿ ಅವರು 1.4 ಕೋಟಿ ರೂ. ಪಡೆದಿದ್ದಾರೆ ಎಂದು ದೋಷಾರೋಪ ಹೊರಿಸಲಾಗಿದೆ.

ಶಾರದಾ ಗ್ರೂಪ್‌ ಆಫ್‌ ಕಂಪನೀಸ್‌ನ ಪ್ರೊಪರೈಟರ್‌ ಸುದಿಪ್ತಾ ಸೇನ್‌ ಮತ್ತು ಇತರ ಆರೋಪಿಗಳೊಂದಿಗೆ ಸೇರಿ ನಳಿನಿ ಸಂಚು ರೂಪಿಸಿ ಹಣದ ಅವ್ಯವಹಾರ ನಡೆಸಿದ್ದರು. ಕೇಂದ್ರದ ಮಾಜಿ ಸಚಿವ ಮಾತಂಗ್‌ ಸೇನ್‌ ಅವರ ಪರಿತ್ಯಕ್ತ ಪತ್ನಿ ಮನೋರಂಜನಾ ಸಿನ್ಹಾ ಅವರೇ ನಳಿನಿ ಅವರನ್ನು ಸುದಿಪ್ತಾ ಸೇನ್‌ಗೆ ಪರಿಚಯಿಸಿದ್ದರು. ಸೆಬಿ, ಆರ್‌ಒಸಿ ತನಿಖೆಯಿಂದ ಸುದಿಪ್ತಾ ಸೇನ್‌ ಅವರನ್ನು ಬಚಾವ್‌ ಮಾಡಲು ನಳಿನಿ 2010-12ರ ಅವಧಿಯಲ್ಲಿ 1.4 ಕೋಟಿ ರೂ. ಪಡೆದಿದ್ದಾರೆಂದು ಸಿಬಿಐ ಆರೋಪಿಸಿದೆ.

ಅಧಿಕ ಬಡ್ಡಿದರ ನೀಡುವ ಆಮಿಷವೊಡ್ಡಿ ಶಾರದಾ ಗ್ರೂಪ್‌ ಜನರಿಂದ 2500 ಕೋಟಿ ರೂ. ಸಂಗ್ರಹಿಸಿತ್ತು. ಆದರೆ ಯಾರಿಗೂ ಅದನ್ನು ಮರು ಪಾವತಿಸಿರಲಿಲ್ಲ. ಇದು ಶಾರದಾ ಚಿಟ್‌ ಫಂಡ್‌ ಹಗರಣವಾಗಿ ಸದ್ದು ಮಾಡಿತು. ಸಿಬಿಐ ಇದರ ತನಿಖೆ ನಡೆಸುತ್ತಿದೆ.