800 ಕೋಟಿ ರೂ ವಂಚನೆ: ರೊಟೊಮ್ಯಾಕ್ ಮಾಲೀಕರ ವಿರುದ್ಧ ಎಫ್‌ಐಆರ್‌ ದಾಖಲಿಸಿದ ಸಿಬಿಐ

ಹೊಸದಿಲ್ಲಿ: ಸರಕಾರಿ ಸ್ವಾಮ್ಯದ ಐದು ಬ್ಯಾಂಕುಗಳಿಗೆ 800 ಕೋಟಿ ರೂ ವಂಚನೆ ಪ್ರಕರಣದಲ್ಲಿ ರೊಟೊಮ್ಯಾಕ್‌ ಪೆನ್ಸ್‌ ಮುಖ್ಯಸ್ಥ ಹಾಗೂ ಆಡಳಿತ ನಿರ್ದೇಶಕ ವಿಕ್ರಮ್ ಕೊಠಾರಿ ವಿರುದ್ಧ ಸಿಬಿಐ ಎಫ್ಐಆರ್‌ ದಾಖಲಿಸಿಕೊಂಡಿದೆ.

ಕೊಠಾರಿ ಮತ್ತು ಅವರ ಪತ್ನಿಯನ್ನು ವಿಚಾರಣೆಗಾಗಿ ಸಿಬಿಐ ವಶಕ್ಕೆ ಪಡೆದುಕೊಂಡಿದೆ. ಹಾಗಿದ್ದರೂ ಇದುವರೆಗೆ ಯಾರನ್ನೂ ಬಂಧಿಸಿಲ್ಲ ಎಂದು ಪಿಟಿಐ ವರದಿ ತಿಳಿಸಿದೆ.

ಕೊಠಾರಿ ಅವರ ಕಾನ್ಪುರದ ಮನೆ ಮತ್ತು ಕಚೇರಿಗಳಲ್ಲಿ ಸಿಬಿಐ ಶೋಧ ನಡೆಸಿದೆ.

ಕಾನ್ಪುರ ಮೂಲದ ಈ ಕಂಪನಿಯ ಮಾಲೀಕರು ಅಲಹಾಬಾದ್ ಬ್ಯಾಂಕ್‌, ಬ್ಯಾಂಕ್‌ ಆಫ್‌ ಇಂಡಿಯಾ, ಬ್ಯಾಂಕ್‌ ಆಫ್‌ ಬರೋಡಾ, ಇಂಡಿಯನ್‌ ಓವರ್‌ಸೀಸ್‌ ಬ್ಯಾಂಕ್‌ ಮತ್ತು ಯೂನಿಯನ್‌ ಬ್ಯಾಂಕ್‌ ಆಫ್‌ ಇಂಡಿಯಾದಿಂದ 800 ಕೋಟಿ ರೂ ಸಾಲ ಪಡೆದಿದ್ದರು. ಹಾಗಿದ್ದರೂ ಯೂನಿಯನ್‌ ಬ್ಯಾಂಕ್‌ ಆಫ್‌ ಇಂಡಿಯಾ ಮತ್ತು ಅಲಹಾಬಾದ್‌ ಬ್ಯಾಂಕ್‌ ದಾಖಲೆಗಳ ಪ್ರಕಾರ ಕೊಠಾರಿ ಇದುವರೆಗೂ ಸಾಲದ ಕಂತು ಅಥವಾ ಬಡ್ಡಿಯನ್ನು ಪಾವತಿಸಿಲ್ಲ.

ಕೊಠಾರಿ ಅವರಿಗೆ ಸಾಲ ನೀಡುವಾಗ ನಿಯಮಗಳಲ್ಲಿ 'ರಾಜಿ ಮಾಡಿಕೊಳ್ಳಲಾಗಿದೆ' ಎಂದು ಬ್ಯಾಂಕುಗಳ ಆಂತರಿಕ ಮೂಲಗಳು ಹೇಳುತ್ತಿವೆ. ಕೊಠಾರಿ ಅವರು ಮುಂಬಯಿ ಮೂಲದ ಯೂನಿಯನ್ ಬ್ಯಾಂಕ್‌ ಆಫ್‌ ಇಂಡಿಯಾದಿಂದ 485 ಕೋಟಿ ರೂ ಹಾಗೂ ಕೋಲ್ಕತ ಮೂಲದ ಅಲಹಾಬಾದ್‌ ಬ್ಯಾಂಕ್‌ನಿಂದ 352 ಕೋಟಿ ರೂ ಸಾಲ ಪಡೆದಿದ್ದರು.

ಸಾಲ ಮರುಪಾವತಿಸದೆ ದೇಶಬಿಟ್ಟು ಪಲಾಯನ ಮಾಡಿದ್ದಾರೆ ಎಂಬ ವರದಿಗಳಿಗೆ ಪ್ರತಿಕ್ರಿಯಿಸಿದ ಕೊಠಾರಿ, ತಾವು ಕಾನ್ಪುರದಲ್ಲೇ ಇರುವುದಾಗಿ ಸ್ಪಷ್ಟಪಡಿಸಿದ್ದರು.

ಆರ್‌ಬಿಐ ನಿಯಮಗಳ ಅನುಸಾರ ಬ್ಯಾಂಕ್‌ ಆಫ್‌ ಬರೋಡಾ 2017ರ ಫೆಬ್ರವರಿ 27ರಂದು ಕೊಠಾರಿ ಕಂಪನಿಯನ್ನು ಉದ್ದೇಶಪೂರ್ವಕ ಸುಸ್ತಿದಾರನೆಂದು ಘೋಷಿಸಿತ್ತು.

ಶತಕೋಟ್ಯಧಿಪತಿ ವಜ್ರದ ವ್ಯಾಪಾರಿ ನೀರವ್ ಮೋದಿ ಪಂಜಾಬ್‌ ನ್ಯಾಷನಲ್ ಬ್ಯಾಂಕ್‌ಗೆ 11,400 ಕೋಟಿ ರೂ ವಂಚಿಸಿ ಪರಾರಿಯಾದ ಬಳಿಕ ಈ ವಂಚನೆ ಪ್ರಕರಣವೂ ಬೆಳಕಿಗೆ ಬಂದಿದೆ.