ಉನ್ನಾವೋ ಗ್ಯಾಂಗ್‌ರೇಪ್‌: ಶಾಸಕ ಕುಲದೀಪ್‌ ವಿರುದ್ಧ ಆರೋಪ ಪಟ್ಟಿ ಸಲ್ಲಿಕೆ

ಹೊಸದಿಲ್ಲಿ: ಉನ್ನಾವೋ ಗ್ಯಾಂಗ್‌ ರೇಪ್‌ ಪ್ರಕರಣಕ್ಕೆ ಸಂಬಂಧಿಸಿದಂತೆ ಬಿಜೆಪಿ ಶಾಸಕ ಕುಲದೀಪ್‌ ಸಿಂಗ್‌ ಸೆನಗರ್‌ ವಿರುದ್ಧ ಪೊಲೀಸರು ಆರೋಪಪಟ್ಟಿ ಸಲ್ಲಿಸಿದ್ದಾರೆ.

17 ವರ್ಷದ ಬಾಲಕಿಯ ಮೇಲೆ ಸಾಮೂಹಿಕ ಅತ್ಯಾಚಾರ ಪ್ರಕರಣವನ್ನು ಸಿಬಿಐ ತನಿಖೆ ನಡೆಸುತ್ತಿದ್ದು, ಬುಧವಾರ ತನ್ನ ಎರಡನೇ ಆರೋಪ ಪಟ್ಟಿಯಲ್ಲಿ ಕುಲದೀಪ್ ಸಿಂಗ್‌ ಹೆಸರು ನಮೂದಿಸಿದೆ.

ಕುಲದೀಪ್‌ ಸಿಂಗ್‌ ವಿರುದ್ಧ ಪೊಕ್ಸೊ ಕಾಯ್ದೆ ದಾಖಲಿಸಲಾಗಿದೆ. ಕುಲದೀಪ್‌ ಸಿಂಗ್‌ ಜತೆಗಾರ ಶಶಿ ಸಿಂಗ್‌ ಅತ್ಯಾಚಾರ ನಡೆಯುವ ವೇಳೆ ಕೊಠಡಿಗೆ ಕಾವಲಾಗಿ ನಿಂತಿದ್ದನು. ಶಶಿ ಹೆಸರನ್ನೂ ಆರೋಪ ಪಟ್ಟಿಯಲ್ಲಿ ಸೇರಿಸಲಾಗಿದೆ. ಕಳೆದ ವರ್ಷ ಜೂನ್‌ನಲ್ಲಿ ಘಟನೆ ನಡೆದಿತ್ತು. ಕಳೆದ ವಾರ ಸಿಬಿಐ ಮೊದಲ ಆರೋಪ ಪಟ್ಟಿ ಸಲ್ಲಿಸಿತ್ತು. ಇದರಲ್ಲಿ ಕುಲದೀಪ್‌ ಸಹೋದರ ಜೈ ದೀಪ್‌ ಸಿಂಗ್‌ ಅಲಿಯಾಸ್‌ ಅತುಲ್‌ ಸಿಂಗ್‌ ಸೆನ್‌ಗರ್‌ ಅವರ ಹೆಸರನ್ನೂ ಸೇರಿಸಿತ್ತು.

ಶಾಸಕ ಕುಲದೀಪ್‌ ಮನೆಗೆ ತನ್ನ ಸಂಬಂಧಿಕರೊಂದಿಗೆ ಬಂದಿದ್ದ 17ವರ್ಷದ ಅಪ್ರಾಪ್ತ ಬಾಲಕಿಯನ್ನು ಕುಲದೀಪ್‌ ಸಿಂಗ್‌ ಹಾಗೂ ಬೆಂಬಲಿಗರಿಂದ ಅತ್ಯಾಚಾರಕ್ಕೆ ಒಳಗಾಗಿರುವುದಾಗಿ ಆರೋಪಿಸಲಾಗಿತ್ತು. ಅಲ್ಲದೆ ಸಂತ್ರಸ್ತೆಯ ತಂದೆಯ ಮೇಲೆ ಹಲ್ಲೆ ನಡೆಸಲಾಗಿತ್ತು. ಈ ಸಂಬಂಧ ಎಫ್‌ಐಆರ್‌ ದಾಖಲಿಸಿದ್ದು, ಆರೋಪಿಗಳು ನ್ಯಾಯಾಂಗ ಬಂಧನದಲ್ಲಿದ್ದಾರೆ ಎಂದು ಸಿಬಿಐ ಮೂಲಗಳ ಹೇಳಿವೆ.