ಮಲ್ಯಗೆ ಜೈಲಿನಲ್ಲಿ ಐ‍ಷಾರಾಮಿ ವ್ಯವಸ್ಥೆ: ಕೋರ್ಟ್‌ಗೆ ವೀಡಿಯೋ ಸಲ್ಲಿಕೆ

[ಮೂಲ ಸುದ್ದಿ: ಟೈಮ್ಸ್ ನೌ, 25 ಆಗಸ್ಟ್ 2018]

Vijaya Karnataka Web

ಹೊಸದಿಲ್ಲಿ: ದೇಶದ ಜೈಲುಗಳಲ್ಲಿ ಸರಿಯಾದ ಗಾಳಿ, ಬೆಳಕಿನ ವ್ಯವಸ್ಥೆಯಿಲ್ಲ, ಅವುಗಳು ಸ್ವಚ್ಛವಾಗಿಲ್ಲ ಎಂದು ಉದ್ಯಮಿ ವಿಜಯ್‌ ಮಲ್ಯ ಮಾಡಿದ್ದ ಆರೋಪಕ್ಕೆ ಸಂಬಂಧಿಸಿ, ಕೇಂದ್ರೀಯ ತನಿಖಾ ದಳ (ಸಿಬಿಐ) ಲಂಡನ್‌ ನ್ಯಾಯಾಲಯಕ್ಕೆ ಭಾರತೀಯ ಜೈಲುಗಳ ಸ್ಥಿತಿಗತಿ ಬಗ್ಗೆ ವೀಡಿಯೋ ಕಳುಹಿಸಿದೆ.

ಬಹುಸಾವಿರ ಕೋಟಿ ರೂ. ಸಾಲವಂಚನೆ ಪ್ರಕರಣದಲ್ಲಿ ವಿದೇಶಕ್ಕೆ ಪರಾರಿಯಾಗಿರುವ ವಿಜಯ್ ಮಲ್ಯ, ವಾಪಸ್ ಭಾರತಕ್ಕೆ ಬಂದರೆ ಪ್ರಕರಣದಲ್ಲಿ ಜೈಲು ಶಿಕ್ಷೆ ಲಭಿಸಿದರೆ, ಅಲ್ಲಿ ಸೂಕ್ತ ಭದ್ರತೆಯಿಲ್ಲ. ದೇಶದ ಜೈಲುಗಳು ಸುರಕ್ಷಿತವಲ್ಲ, ಸ್ವಚ್ಛತೆ ಕೂಡ ಇಲ್ಲ ಎಂದು ಆರೋಪಿಸಿದ್ದರು. ಹೀಗಾಗಿ ಭಾರತಕ್ಕೆ ಮರಳಲು ಹಿಂದೇಟು ಹಾಕುತ್ತಿರುವುದಾಗಿ ಮಲ್ಯ ಪರ ವಕೀಲರು ಕೋರ್ಟ್‌ಗೆ ತಿಳಿಸಿದ್ದರು.

ಹೀಗಾಗಿ ಮಲ್ಯ ಗಡಿಪಾರಿನ ಪ್ರಕ್ರಿಯೆ ನಡೆಯುತ್ತಿರುವಾಗಲೇ ಮುಂಬಯಿನ ಆರ್ಥರ್‌ ಜೈಲಿನ ಬ್ಯಾರಕ್‌ 12ರಲ್ಲಿ ಸುಸಜ್ಜಿತ ಕಾರಾಗೃಹ ವ್ಯವಸ್ಥೆಯ ಕುರಿತು 8 ನಿಮಿಷದ ವೀಡಿಯೋ ಚಿತ್ರೀಕರಿಸಿ ಅದನ್ನು ಸಿಬಿಐ ಬ್ರಿಟನ್‌ ಕೋರ್ಟ್‌ಗೆ ಸಲ್ಲಿಸಿದೆ.

ಮಲ್ಯಗೆ ಜೈಲು ಶಿಕ್ಷೆಯಾದರೆ ಅವರನ್ನು ಇರಿಸುವ ಬ್ಯಾರಕ್‌ನಲ್ಲಿ ಟಿವಿ, ಪ್ರತ್ಯೇಕ ಶೌಚಾಲಯ, ಹಾಸಿಗೆ ಸಹಿತ ಸಿಮೆಂಟ್‌ ಮಂಚ, ಕೈ ತೊಳೆಯುವ ಜಾಗ, ಕಿಟಕಿ ಹಾಗೂ ಬಿಸಿಲಿನಲ್ಲಿ ಓಡಾಡಲು ಹಿತ್ತಲನ್ನು ಒಳಗೊಂಡಿರುವ ಜೈಲು ಕೋಣೆಯ ದೃಶ್ಯವನ್ನು ವೀಡಿಯೋ ಒಳಗೊಂಡಿದೆ.

ಭಾರತದ ಜೈಲುಗಳು ನೈರ್ಮಲ್ಯದಿಂದ ಕೂಡಿವೆ ಎಂಬುದನ್ನು ತೋರಿಸುವಂತೆ ನ್ಯಾಯಾಲಯ ಕೇಳಿತ್ತು. ನಾವೀಗ ಭಾರತದ ಜೈಲುಗಳಲ್ಲಿನ ನೈರ್ಮಲ್ಯ ಮತ್ತು ವೈದ್ಯಕೀಯ ಸೌಲಭ್ಯಗಳ ಬಗ್ಗೆ ಸಾಕ್ಷ್ಯ ಒದಗಿಸಿದ್ದೇವೆ. ಭದ್ರತೆ ದೃಷ್ಟಿಯಿಂದ ಭಾರತೀಯ ಜೈಲುಗಳು ಜಾಗತಿಕ ಮಾನದಂಡಕ್ಕೆ ಸಮಾನವಾಗಿವೆ ಎಂದು ಅಧಿಕಾರಿಗಳು ತಿಳಿಸಿದ್ದಾರೆ.