ಗಡಿಯಲ್ಲಿ ಪಾಕ್‌ ಪುಂಡಾಟ: ಭಾರತೀಯ ಸೇನೆಯ ದಿಟ್ಟ ಉತ್ತರಕ್ಕೆ ಇಬ್ಬರು ಪಾಕ್‌ ಸೇನೆ ತತ್ತರ

ಗಡಿಯಲ್ಲಿ ಮತ್ತೆ ಕದನ ವಿರಾಮ ಉಲ್ಲಂಘಿಸಿದ ಪಾಕ್‌ ಸೇನೆಗೆ ಭಾರತೀಯ ಯೋಧರು ದಿಟ್ಟ ಉತ್ತರ ನೀಡಿದ್ದಾರೆ. ಪಾಕಿಸ್ತಾನ ಸ್ಪೆಷಲ್‌ ಫೋರ್ಸಸ್‌ನ ಇಬ್ಬರು ಯೋಧರನ್ನು ಹತ್ಯೆಗೈಯ್ಯಲಾಗಿದೆ.

ಜಮ್ಮು ಕಾಶ್ಮೀರದ ಪೂಂಚ್‌ ಜಿಲ್ಲೆಯ ಭಾಗಕ್ಕೆ ಹೊಂದಿಕೊಂಡಿರುವ ಗಡಿ ನಿಯಂತ್ರಣ ರೇಖೆಯಲ್ಲಿ ಭಾರತೀಯ ಸೇನೆ ಹಾಗೂ ಪಾಕಿಸ್ತಾನದ ಗಡಿ ರಕ್ಷಣಾ ತಂಡದ ಜತೆ ಗುಂಡಿನ ಕಾಳಗ ನಡೆದಿದೆ. ಈ ವೇಳೆ ಪಾಕ್‌ನ ಇಬ್ಬರು ಹಾಗೂ ಭಾರತೀಯ ಸೇನೆಯ ಒಬ್ಬ ಯೋಧ ಹತರಾಗಿದ್ದಾರೆ ಎಂದು ತಿಳಿದು ಬಂದಿದೆ.

ಸುಂದರ್‌ಬನಿ ಸೆಕ್ಟರ್‌ನಲ್ಲಿನ ನಾತುವಾ ಕಾ ಟಿಬ್ಬ ಭಾಗದಲ್ಲಿ ಪಾಕ್‌ ಸೇನಾ ಯೋಧರು ಹಾಗೂ ವಿಶೇಷ ರಕ್ಷಣಾ ಪಡೆ ಯೋಧರು ಏಕಾಏಕಿ ಅಪ್ರಚೋದಿತ ಗುಂಡಿನ ದಾಳಿ ನಡೆಸಲು ಆರಂಭಿಸಿದ್ದಾರೆ. ಇದಕ್ಕೆ ತೀಕ್ಷ್ಣವಾಗಿ ಪ್ರತಿದಾಳಿ ನಡೆಸಿದ ಭಾರತೀಯ ಸೇನಾ ಪಡೆ, ದಾಳಿಯನ್ನು ಹಿಮ್ಮೆಟ್ಟಿಸುವಲ್ಲಿ ಸಫಲರಾಗಿದ್ದಾರೆ ಎಂದು ತಿಳಿದು ಬಂದಿದೆ. ಗುಂಡಿನ ಕಾಳಗದ ವೇಳೆ ರಾಕೆಟ್‌ ಲಾಂಚರ್ಸ್‌, ಆ್ಯಂಟಿ ಟ್ಯಾಂಕ್‌ ಗೈಡೆಡ್‌ ಮಿಸೈಲ್‌ಗಳನ್ನು ಪ್ರಯೋಗಿಸಲಾಗಿದೆ ಎಂದು ಭಾರತೀಯ ಸೇನಾ ಪಡೆ ಮೂಲಗಳು ಖಚಿತಪಡೆಸಿದೆ. ಸೇನೆಯ ರೈಫಲ್‌ಮ್ಯಾನ್‌ ಸುಖ್ವಿಂದರ್‌ ಸಿಂಗ್‌ ಕಾಳಗದಲ್ಲಿ ಗುಂಡೇಟಿಗೆ ಹುತಾತ್ಮನಾಗಿದ್ದಾನೆ ಎಂದು ಮೂಲಗಳು ತಿಳಿಸಿವೆ.

ಪಾಕ್‌ ಸೇನೆಯ ಮೂಲಗಳ ಪ್ರಕಾರ ಇಬ್ಬರು ಎಎಸ್‌ಜಿ ಕಮಾಂಡೋಗಳು ಭಾರತೀಯ ಸೇನೆ ನಡೆಸಿದ ಪ್ರತಿ ದಾಳಿಯಲ್ಲಿ ಹತರಾಗಿದ್ದಾರೆ ಎನ್ನಲಾಗಿದೆ. ಮೂರು ಭಾಗಗಳಿಂದ ಪಾಕ್‌ ಸೇನೆಯಿಂದ ಆಕ್ರಮಿತವಾಗಿದ್ದ ಸುಂದರ್‌ಬನಿ ಸೆಕ್ಟರ್‌ನಲ್ಲಿ ಕದನ ವಿರಾಮ ಉಲ್ಲಂಘಿಸಿ ಪಾಕ್‌ ಮತ್ತೆ ಪುಂಡಾಟ ಮೆರೆದಿದೆ. ಇತ್ತೀಚಿನ ದಿನದಲ್ಲಿ ಪೂಂಚ್‌ ಹಾಗೂ ಸಮೀಪದ ಗಡಿ ನಿಯಂತ್ರಣ ಭಾಗದಲ್ಲಿ ಕದನ ವಿರಾಮ ಉಲ್ಲಂಘನೆ, ಅಪ್ರಚೋದಿತ ಗುಂಡಿನ ದಾಳಿ ಹೆಚ್ಚಾಗುತ್ತಿರುವ ಹಿನ್ನೆಲೆಯಲ್ಲಿ ಹೈ ಎಲರ್ಟ್‌ ಘೋಷಣೆ ಮಾಡಲಾಗಿದೆ..