ಇಟಾನಗರ: ಇದು ನಂಬಲು ಕಷ್ಟವಾದರೂ, ವಾಸ್ತವ. ಅರುಣಾಚಲ ಪ್ರದೇಶದ ವಿಜೊಯ್‌ನಗರ ಪಟ್ಟಣದ ನಿವಾಸಿಗಳು ಕಟ್ಟಡ ನಿರ್ಮಾಣ ಕಾಮಗಾರಿಗೆ ಸಿಮೆಂಟ್‌ ಚೀಲವೊಂದಕ್ಕೆ ಬರೊಬ್ಬರಿ 8000 ರೂ. ಪಾವತಿಸುತ್ತಾರೆ. ಇಷ್ಟಾಗಿಯೂ ಸಿಮೆಂಚ್‌ ಲಭ್ಯವಾದರೆ ಅವರ ಅದೃಷ್ಟ.
ಏಕೆಂದರೆ, ಅದನ್ನು ಬರೋಬ್ಬರಿ 156 ಕಿ.ಮೀ. ಕಾಲ್ನಡಿಗೆಯಲ್ಲಿ ಹೊತ್ತು ಸಾಗಿಸಬೇಕು. ಈ ಪ್ರಯಾಣಕ್ಕೆ ಬರೋಬ್ಬರಿ 5 ದಿನ ಹಿಡಿಯುತ್ತದೆ.
ಸಂವಹನ, ಸಾರಿಗೆ ಕ್ರಾಂತಿಯ ಇಂದಿನ ದಿನಗಳಲ್ಲೂ ಇಂತಹ ಊರೊಂದು ಇದೆಯಾ ಎಂಬ ಅನುಮಾನ ನಿಮಗೆ ಕಾಡಬಹುದು. ಆದರೆ ಇದು ಕಟು ವಾಸ್ತವ.
ಚಂಗ್‌ಲಾಂಗ್‌ ಜಿಲ್ಲೆಯ ಪುಟ್ಟ ಪಟ್ಟಣ ವಿಜೊಯ್‌ನಗರದ ಜನಸಂಖ್ಯೆ ಕೇವಲ 1500. ಇಲ್ಲಿ ಸರಿಯಾದ ಸಂವಹನ ವ್ಯವಸ್ಥೆಯೂ ಇಲ್ಲ. ರಸ್ತೆ, ಸಾರಿಗೆ ಸಂಪರ್ಕ ಮೊದಲೇ ಇಲ್ಲ. ದೊಡ್ಡ ನಗರಕ್ಕೆ ಹೋಗಲು ಇಲ್ಲಿನ ಜನರು ಐದು ದಿನಗಳ ಕಾಲ ನಡೆಯಬೇಕು!
ವಾರಕ್ಕೊಮ್ಮೆ ಕಾಪ್ಟರ್‌: ಸರಕು ಸಾಗಿಸಲು ಇಲ್ಲಿಗೆ ವಾರಕ್ಕೊಮ್ಮೆ ಹೆಲಿಕಾಪ್ಟರ್‌ ಸೌಲಭ್ಯ ಇದೆ. ಆದರೆ, ಹವಾಮಾನ ನೆಟ್ಟಗಿಲ್ಲದಿದ್ದರೆ ಅದೂ ಬರುವುದಿಲ್ಲ.
''ಚಕ್ಮಾ ಮತ್ತು ಹಜಂಗ್ಸ್‌ ಸಮುದಾಯದವರು ಹೆಚ್ಚಿನ ಸಂಖ್ಯೆಯಲ್ಲಿ ಈ ಪಟ್ಟಣದಲ್ಲಿ ನೆಲೆಸಿದ್ದಾರೆ. ಭಾರತ, ಚೀನಾ ಮತ್ತು ಮ್ಯಾನ್ಮಾರ್‌ ಗಡಿಯಲ್ಲಿರುವ ಈ ಪಟ್ಟಣಕ್ಕೆ ನಮ್ದಾಪಾ ರಾಷ್ಟ್ರೀಯ ಉದ್ಯಾನದಿಂದ ಚಕ್ಮಾಗಳ ಮೂಲಕ ಸರಕುಗಳನ್ನು ಸಾಗಿಸಲಾಗುತ್ತದೆ. ಈ ಊರಿನ ಜನರಿಗೆ ಸಿಮೆಂಟ್‌ ಚೀಲ ತಲುಪಿಸಲು 8000 ರೂ. ಮತ್ತು ವೆಸ್ಟರ್ನ್‌ ಕಮೊಡ್‌ ತಲುಪಿಸಲು 2000 ರೂ.ಗಳನ್ನು ಅವರು ಪಡೆಯುತ್ತಾರೆ,'' ಎಂದು ಸಾರ್ವಜನಿಕ ಆರೋಗ್ಯ ಎಂಜಿನಿಯರಿಂಗ್‌ ಇಲಾಖೆಯ ಎಂಜಿನಿಯರ್‌ ಜುಮಾಲಿ ಆ್ಯಡೊ ಹೇಳಿದ್ದಾರೆ.
ಸುಮಾರು ಐದು ದಿನಗಳ ಕಾಲ 156 ಕಿಲೋ ಮೀಟರ್‌ ನಡೆದುಕೊಂಡು ಹೆದ್ದಾರಿಗೆ ಬಂದು ಅವರು ಸರಕುಗಳನ್ನು ಸಾಗಿಸುತ್ತಾರೆ ಎಂದು ಆ್ಯಡೊ ತಿಳಿಸಿದ್ದಾರೆ.
ವಿಜೊಯ್‌ನಗರಕ್ಕೆ ರಸ್ತೆ ನಿರ್ಮಿಸುವ ಯೋಜನೆಗೆ ಸರಕಾರ ಒಪ್ಪಿಗೆ ನೀಡಿದೆ ಎಂದು ಮಿಯಾವೊ ಕ್ಷೇತ್ರದ ಶಾಸಕ ಮತ್ತು ನಾಗರಿಕ ಪೂರೈಕೆ ಖಾತೆ ಸಚಿವ ಕಮ್ಲುಂಗ್‌ ಮೊಸ್ಸಾಂಗ್‌ ತಿಳಿಸಿದ್ದಾರೆ.
ಬಯಲು ಶೌಚ ಮುಕ್ತ ಕನಸು: ವಿಶೇಷವೆಂದರೆ, ಡಿಸೆಂಬರ್‌ ಅಂತ್ಯದ ವೇಳೆಗೆ ಬಯಲು ಶೌಚಮುಕ್ತ ಪಟ್ಟಣವೆಂಬ ಹೆಗ್ಗಳಿಕೆ ಪಡೆಯಬೇಕೆಂದು ಇಲ್ಲಿನ ಜನರ ಕನಸು. ಇದಕ್ಕಾಗಿ ಅವರು ದುಬಾರಿ ಮೊತ್ತ ನೀಡಿ ಸಿಮೆಂಟ್‌ ಮತ್ತು ಕಮೋಡ್‌ಗಳನ್ನು ಖರೀದಿಸುತ್ತಿದ್ದಾರೆ ಎಂದು ಅಧಿಕಾರಿಗಳು ತಿಳಿಸಿದ್ದಾರೆ.
1 ಕೆ.ಜಿ. ಉಪ್ಪು 250 ರೂ.: ವಿಜೊಯ್‌ನಗರ ಸೇರಿದಂತೆ ಭಾರತ-ಚೀನಾ ಗಡಿಭಾಗದ ಹಲವು ಗ್ರಾಮಗಳಲ್ಲಿ ಪಡಿತರ ವ್ಯವಸ್ಥೆ ಸಮರ್ಪಕವಾಗಿಲ್ಲದ ಕಾರಣ, ಅಲ್ಲಿನ ಜನರು 1 ಕೆ.ಜಿ. ಉಪ್ಪಿಗೆ 250 ರೂ. ಪಾವತಿಸುತ್ತಿದ್ದಾರೆ ಎಂದು ಮೂಲಗಳು ತಿಳಿಸಿವೆ.
Cement per bag Rs. 8000, Salt Rs. 250