ದೇಶಾದ್ಯಂತ ಸಂಚಾರಕ್ಕೆ ಆಲ್‌-ಇನ್‌-ಒನ್‌ ಕಾರ್ಡ್‌?

ಹೊಸದಿಲ್ಲಿ: ದೇಶಾದ್ಯಂತ ಬಸ್ಸು, ರೈಲು, ಮೆಟ್ರೊ, ನಗರ ರೈಲು ಹೀಗೆ ಎಲ್ಲ ವಿಧದ ಸಾರ್ವಜನಿಕ ಸಾರಿಗೆ ಪ್ರಯಾಣಕ್ಕೆ ಒಂದೇ ಸ್ಮಾರ್ಟ್‌ಕಾರ್ಡ್‌ ಬಳಸುವ 'ಒಂದು ದೇಶ-ಒಂದೇ ಕಾರ್ಡ್‌' ಯೋಜನೆಯನ್ನು ಸರಕಾರ ಸದ್ಯದಲ್ಲೇ ಜಾರಿಗೆ ತರಲಿದೆ.

ಪ್ರಸ್ತುತ ಲಂಡನ್‌, ಸಿಂಗಾಪುರ ಸೇರಿದಂತೆ ಹಲವು ನಗರಗಳಲ್ಲಿ ಇಂತಹ ಸೌಲಭ್ಯವಿದೆ. ಆದರೆ, ಭಾರತದಲ್ಲಿ ಇದನ್ನು ದೇಶಾದ್ಯಂತ ಅನ್ವಯವಾಗುವಂತೆ ಜಾರಿ ಮಾಡಲು ಸರಕಾರ ಸಿದ್ಧತೆ ನಡೆಸುತ್ತಿದೆ ಎಂದು ನೀತಿ ಆಯೋಗದ ಮುಖ್ಯ ಕಾರ್ಯನಿರ್ವಹಣಾಧಿಕಾರಿ ಅಮಿತಾಭ್‌ ಕಾಂತ್‌ ತಿಳಿಸಿದ್ದಾರೆ.

ಟೋಲ್‌, ಪಾರ್ಕಿಂಗ್‌: ರೀಟೇಲ್‌ ಮಳಿಗೆಗಳು, ಟೋಲ್‌ ಕೇಂದ್ರಗಳು ಮತ್ತು ಪಾರ್ಕಿಂಗ್‌ಗೂ ಇದೇ ಕಾರ್ಡ್‌ ಬಳಸಲು ಅನುವಾಗುವಂತೆ ಈ ಯೋಜನೆ ರೂಪಿಸಲಾಗುತ್ತಿದೆ.

ದಿಲ್ಲಿಯಲ್ಲಿ ಪ್ರಾಯೋಗಿಕ ಯೋಜನೆ: ದಿಲ್ಲಿಯಲ್ಲಿ ಮೆಟ್ರೊ ಮತ್ತು ನಗರ ಸಾರಿಗೆ ಸಂಚಾರಕ್ಕೆ ಒಂದೇ ಸ್ಮಾರ್ಟ್‌ಕಾರ್ಡ್‌ ಬಳಸುವ ಯೋಜನೆಯನ್ನು ಕಳೆದ ಜನವರಿಯಿಂದಲೇ ಪ್ರಾಯೋಗಿಕವಾಗಿ ಜಾರಿ ಮಾಡಲಾಗಿದೆ.