Ashwini Vaishnav - ಸ್ಮಾರ್ಟ್ ಫೋನನ್ನು ನೆಲದ ಮೇಲೆ ಬೀಳಿಸಿ ಗುಣಮಟ್ಟ ಅಳೆದ ಕೇಂದ್ರ ಐಟಿ ಸಚಿವ ಅಶ್ವಿನಿ ವೈಷ್ಣವ್

ಹೊಸದಿಲ್ಲಿ: ಇದೇ ತಿಂಗಳ 1ರಿಂದ ಆರಂಭವಾಗಿರುವ ಇಂಡಿಯಾ ಮೊಬೈಲ್ ಕಾಂಗ್ರೆಸ್ (ಐಎಂಸಿ) 2022 ಸಮ್ಮೇಳನಕ್ಕೆ ಮಂಗಳವಾರ ಭೇಟಿ ನೀಡಿದ್ದ ಕೇಂದ್ರ ಮಾಹಿತಿ ತಂತ್ರಜ್ಞಾನ ಸಚಿವ ಅಶ್ವಿನಿ ವೈಷ್ಣವ್, ಅಲ್ಲಿ ಸ್ಟಾಲ್ ಒಂದರಲ್ಲಿ ಇರಿಸಲಾಗಿದ್ದ ಸ್ವದೇಶಿ ನಿರ್ಮಿತ ಸ್ಮಾರ್ಟ್ ಫೋನ್ ಒಂದನ್ನು ಕೈಯ್ಯಲ್ಲಿ ಹಿಡಿದು ಅದನ್ನು ನೆಲಕ್ಕೆ ಬಿಸಾಕಿದ್ದಾರೆ. ಆ ಮೂಲಕ, ಆ ಸ್ಮಾರ್ಟ್ ಫೋನ್ ನ ಗುಣಮಟ್ಟವನ್ನು ಅವರು ಪರೀಕ್ಷಿಸಿದ್ದಾರೆ. ಅದರ ವಿಡಿಯೋಗಳು ಅಂತರ್ಜಾಲದಲ್ಲಿ ವೈರಲ್ ಆಗಿದೆ.

ವಿಡಿಯೋದಲ್ಲೇನಿದೆ?

ವಿಡಿಯೋದಲ್ಲಿ ಅವರು ಸ್ಮಾರ್ಟ್ ಫೋನ್ ಸ್ಟಾಲ್ ಗೆ ಆಗಮಿಸಿ ಅಲ್ಲಿನ ಸಿಬ್ಬಂದಿಯ ಜತೆಗೆ ಮಾತನಾಡುತ್ತಾರೆ. ಆನಂತರ, ಅಲ್ಲಿ ಪ್ರದರ್ಶನಕ್ಕೆ ಇಡಲಾಗಿದ್ದ ಮೊಬೈಲ್ ಫೋನನ್ನು ಕೈಯ್ಯಲ್ಲಿ ಹಿಡಿದು ಅದನ್ನು ಮೊದಲು ಕಣ್ಣಲ್ಲೇ ಪರೀಕ್ಷಿಸುತ್ತಾರೆ. ಆನಂತರ, ಅದನ್ನು ನೋಡನೋಡುತ್ತಿದ್ದಂತೆ ಕೆಳಕ್ಕೆ ಹಾಕುತ್ತಾರೆ. ತಕ್ಷಣವೇ ಅಲ್ಲಿದ್ದ ಒಬ್ಬ ಸಿಬ್ಬಂದಿ ಅದನ್ನು ಎತ್ತಿ ಸಚಿವರಿಗೆ ನೀಡುತ್ತಾರೆ. ಆನಂತರ, ಪುನಃ ಆ ಮೊಬೈಲ್ ಅನ್ನು ಪರೀಕ್ಷಿಸುವ ಅವರು, ಅದರ ಗುಣಮಟ್ಟದ ಬಗ್ಗೆ ಪ್ರಶಂಸೆ ವ್ಯಕ್ತಪಡಿಸುತ್ತಾರೆ.


ಕೇಂದ್ರದ ಮಹತ್ವಾಕಾಂಕ್ಷೆ
ದಶಕಗಳ ಹಿಂದೆ ಭಾರತವು ಐಟಿ ರಂಗದಲ್ಲಿ ದೊಡ್ಡ ಸಾಧನೆಯನ್ನು ಮಾಡಿದೆ. ಆದರೀಗ, ಭಾರತವನ್ನು ಹಾರ್ಡ್ ವೇರ್ ನಲ್ಲೂ ಸ್ವಾವಲಂಬಿ ರಾಷ್ಟ್ರವನ್ನಾಗಿಸಲು ಕೇಂದ್ರ ಸರ್ಕಾರ ನಿರ್ಧರಿಸಿದೆ. ಅದರ ಒಂದು ಭಾಗವಾಗಿ, ಭಾರತದಲ್ಲಿ ಸ್ಮಾರ್ಟ್ ಫೋನ್ ಗಳ ತಯಾರಿಕೆಗೆ ಒತ್ತು ನೀಡಲಾಗಿದೆ. ಆದರೆ, ಅದು ನೆಪಮಾತ್ರಕ್ಕೆ ಮಾತ್ರ ಎನ್ನುವಂತಾಗಬಾರದು. ಭಾರತದಲ್ಲಿ ತಯಾರಾಗುವ ಎಲ್ಲಾ ಸ್ಮಾರ್ಟ್ ಫೋನ್ ಗಳು ಉತ್ತಮ ಗುಣಮಟ್ಟವುಳ್ಳವಾಗಿರಬೇಕು ಎಂಬುದು ಕೇಂದ್ರದ ಉದ್ದೇಶವಾಗಿದೆ. ಈ ಹಿನ್ನೆಲೆಯಲ್ಲಿ ಅಶ್ವಿನಿ ವೈಷ್ಣವ್ ಅವರು ಐಎಂಸಿ 2022ರಲ್ಲಿ ಮೊಬೈಲನ್ನು ಕೆಳಗೆ ಬೀಳಿಸಿ ಅದನ್ನು ಪರೀಕ್ಷಿಸಿದ್ದಾರೆ ಎಂದು ಹೇಳಲಾಗಿದೆ.