China Apps Ban in India: ಟಿಕ್‌ಟಾಕ್‌ ಸೇರಿ 59 ಚೀನಾ ಆಪ್‌ಗಳ ಬ್ಯಾನ್‌: ‌ಡ್ರ್ಯಾಗನ್‌ ರಾಷ್ಟ್ರಕ್ಕೆ ಮೋದಿ ಸರಕಾರದ ಬಿಗ್‌ ಟಕ್ಕರ್‌

ಹೊಸದಿಲ್ಲಿ: ಪೂರ್ವ ಲಡಾಖ್‌ನ ಗಲ್ವಾನ್‌ ವ್ಯಾಲಿಯಲ್ಲಿ ಭಾರತದೊಂದಿಗೆ ಸಂಘರ್ಷಕ್ಕಿಳಿದಿದ್ದ ಚೀನಾಗೆ ಪ್ರಧಾನಿ ಮೋದಿ ನೇತೃತ್ವದ ಕೇಂದ್ರ ಸರಕಾರ ಬಿಗ್‌ ಟಕ್ಕರ್‌ ನೋಡಿದೆ. ಟಿಕ್‌ಟಾಕ್‌ ಸೇರಿ 59 ಚೀನಾ ಆಪ್‌ಗಳನ್ನು ಭದ್ರತೆ ದೃಷ್ಟಿಯಿಂದ ದೇಶದಲ್ಲಿ ನಿಷೇಧ ಮಾಡಲು ಕೇಂದ್ರ ಸರಕಾರ ಆದೇಶಿಸಿದೆ. ಇದರಿಂದ ಪದೇ ಪದೇ ಗಡಿಯಲ್ಲಿ ಕ್ಯಾತೆ ತೆಗೆಯುತ್ತಿದ್ದ ಚೀನಾಗೆ ಕೇಂದ್ರ ದೊಡ್ಡ ಹೊಡೆತವನ್ನು ನೀಡಿದೆ.

ಟಿಕ್‌ ಟಾಕ್‌ ಜೊತೆ ಶೇರ್‌ ಇಟ್, ಯುಸಿ ಬ್ರೌಸರ್ ಹಾಗೂ ಹಲೋ ಆಪ್‌ಗಳನ್ನು ಕೂಡ ಕೇಂದ್ರ ಸರಕಾರ ನಿಷೇಧಿಸಿದೆ. ಜೊತೆಗೆ ಬೈದು ಮ್ಯಾಪ್, ಎಂಐ ಕಮ್ಯೂನಿಟಿ, ಕ್ಲಬ್ ಫ್ಯಾಕ್ಟರಿ, ವಿಚಾಟ್, ವೆಬೋ, ಕ್ಲೀನ್ ಮಾಸ್ಟರ್, ಕ್ಯಾಮ್‌ಸ್ಕ್ಯಾನರ್, ಜೂಮ್‌, ಪಬ್‌ಜಿ‌ ಸಹಿತ ಒಟ್ಟು 59 ಆ್ಯಪ್‌ಗಳಿಗೆ ನಿಷೇಧ ಹೇರಲಾಗಿದೆ.
ಕೇಂದ್ರ ವಿದ್ಯುನ್ಮಾನ ಮತ್ತು ಮಾಹಿತಿ ತಂತ್ರಜ್ಞಾನ ಸಚಿವಾಲಯ ಈ ಬಗ್ಗೆ ಅಧಿಕೃತ ಆದೇಶ ಹೊರಡಿಸಿದೆ. ದೇಶದ ಸಾರ್ವಭೌಮತೆ, ಭದ್ರತೆ, ಸುರಕ್ಷತೆ ದೃಷ್ಟಿಯಿಂದ ಈ ನಿರ್ಧಾರ ಕೈಗೊಳ್ಳಲಾಗಿದೆ. ಈ ಹಿಂದೆಯೇ ಗುಪ್ತಚರ ಇಲಾಖೆ ಬಳಕೆದಾರರ ಮಾಹಿತಿಯ ಸುರಕ್ಷತೆಗಾಗಿ ಆಪ್‌ಗಳನ್ನು ದೇಶದಲ್ಲಿ ನಿಷೇಧಿಸುವಂತೆ ತಿಳಿಸಿತ್ತು.


ಜೂನ್‌ 15ರಂದು ತಡರಾತ್ರಿ ಗಲ್ವಾನ್‌ ವ್ಯಾಲಿಯಲ್ಲಿ ನಡೆದ ಭಾರತ ಹಾಗೂ ಚೀನಾ ಸೈನಿಕರ ಸಂಘರ್ಷದ ನಂತರ ದೇಶದಲ್ಲಿ ಚೀನಾ ವಸ್ತುಗಳ ಹಾಗೂ ಚೀನಾ ಆಪ್‌ಗಳ ಬಳಕೆಯನ್ನು ನಿಷೇಧಿಸುವಂತೆ ಜನ ಒತ್ತಾಯಿಸಿದ್ದರು. ಜೊತೆಗೆ ಬಾಯ್ಕಾಟ್‌ ಚೀನಾ ಅಭಿಯಾನವನ್ನು ಕೂಡ ಕೈಗೊಂಡಿದ್ದರು.

ದೇಶದಲ್ಲಿ ಬ್ಯಾನ್‌ ಆಗುತ್ತಾ ಟಿಕ್‌ ಟಾಕ್‌..? ಮಹಿಳಾ ಆಯೋಗ, ನೆಟ್ಟಿಗರಿಂದ ಆಪ್‌ ನಿಷೇಧಕ್ಕೆ ಒತ್ತಡ

ಈ ಹಿಂದೆ ಮದ್ರಾಸ್‌ ಹೈಕೋರ್ಟ್‌ ಕೂಡ ಟಿಕ್‌ಟಾಕ್‌ ಆಪ್‌ನಲ್ಲಿ ಅಶ್ಲೀಲ ವಿಡಿಯೋಗಳು ಹೆಚ್ಚಾಗುತ್ತಿರುವ ಬಗ್ಗೆ ಪ್ರಸ್ತಾಪಿಸಿ ಟಿಕ್‌ಟಾಕ್‌ ನಿಷೇಧಿಸುವಂತೆ ಕೇಂದ್ರಕ್ಕೆ ಸೂಚಿಸಿತ್ತು. ಮಹಿಳಾ ಆಯೋಗವೂ ಕೂಡ ಟಿಕ್‌ಟಾಕ್‌ ನಿಷೇಧಿಸುವಂತೆ ಕೇಂದ್ರಕ್ಕೆ ಪತ್ರ ಬರೆದಿತ್ತು.