ಚಂದ್ರನ ಮೊದಲ ಫೋಟೊ ಕಳುಹಿಸಿದ ಚಂದ್ರಯಾನ-2

ಹೊಸದಿಲ್ಲಿ: ಇಸ್ರೋದ ಮಹತ್ವಾಕಾಂಕ್ಷಿಯ ಚಂದ್ರಯಾನ-2 ಯೋಜನೆ ಬಹುತೇಕ ಯಶಸ್ವಿಯಾಗಿದೆ.

ಈಗಾಗಲೇ ಹಲವು ಕಕ್ಷೆಗಳನ್ನು ದಾಟಿಕೊಂಡು ಮುನ್ನುಗ್ಗಿರುವ ಚಂದ್ರಯಾನ -2 ಈಗ ಚಂದ್ರನ ಮೊದಲ ಚಿತ್ರವನ್ನು ಕಳುಹಿಸಿಕೊಟ್ಟಿದೆ.


ಚಂದ್ರನ ಮೇಲ್ಮೈನಿಂದ 2650 ಕಿ.ಮೀ ಎತ್ತರದಿಂದ ಆಗಸ್ಟ್‌ 21ರಂದು ಈ ಚಿತ್ರವನ್ನು ಸೆರೆ ಹಿಡಿಯಲಾಗಿದೆ. ಇದನ್ನು ಇಸ್ರೋ ಟ್ವೀಟ್‌ ಮಾಡಿದೆ. ಚಂದ್ರನ ಮೇಲ್ಮೈನಲ್ಲಿನಲ್ಲಿ ಓರಿಯಂಟಲ್‌ ಮತ್ತು ಅಪೋಲೊ ಕುಳಿಗಳನ್ನು ಗುರುತಿಸಬಹುದಾಗಿದೆ ಎಂದು ಇಸ್ರೋ ತಿಳಿಸಿದೆ.

ಚಂದ್ರನ ಕಕ್ಷೆಗೆ ಯಶಸ್ವಿಯಾಗಿರುವ ಚಂದ್ರಯಾನ ನೌಕೆ. ದಕ್ಷಿಣ ಧ್ರುವದಲ್ಲಿ ಇಳಿಯುವುದಕ್ಕೆ ಅಗತ್ಯವಿರುವ ಎಲ್ಲ ಪ್ರಕ್ರಿಯೆಗಳು ಯಶಸ್ವಿಯಾಗಿದೆ. ಆಗಸ್ಟ್‌ 28ರಂದು, ಆಗಸ್ಟ್ 30ರಂದು ಮತ್ತು ಸೆಪ್ಟೆಂಬರ್ 1ರಂದು ಅಂತಿಮವಾಗಿ ದಕ್ಷಿಣ ಧ್ರುವಕ್ಕೆ ಕಾಲಿಡಲಿದೆ ನೌಕೆ.

ಸೆಪ್ಟೆಂಬರ್ 6 ರಂದು ಚಂದ್ರನಿಗೆ ಬಹಳ ಸಮೀಪ ಅಂದರೆ 30 ಕಿ.ಮೀ, ದೂರ ತಲುಪಲಿದೆ. ಚಂದ್ರನನ್ನು ತಲುಪುವ ಈ 30 ಕಿ.ಮೀ.ನ ಕೊನೆಯ ಹಂತ ಇಸ್ರೋ ತಂಡದವರಿಗೆ ಅತ್ಯಂತ ಕ್ಲಿಷ್ಟಕರ ಕ್ಷಣಗಳಾಗಿದ್ದು, ಈ ರೀತಿಯ ಸಂಕೀರ್ಣ ಕಾರ್ಯಾಚರಣೆಯನ್ನು ಇಸ್ರೋ ತಂಡ ಮೊದಲ ಬಾರಿಗೆ ಮಾಡಲಿದೆ. ಕೊನೆಯ 30 ಕಿ. ಮೀ ಅನ್ನು 15 ನಿಮಿಷದಲ್ಲಿ ತಲುಪಬೇಕಿದ್ದು, ಈ ಹಿನ್ನೆಲೆ ಉಪಗ್ರಹದ ವೇಗವನ್ನು ಮತ್ತಷ್ಟು ತಗ್ಗಿಸಬೇಕಿದೆ. ಸೆ.7 ರ ನಸುಕಿನಲ್ಲಿ ಈ ಕಾರ್ಯ ನಡೆಯಬೇಕಿದ್ದು, ಈ ಮಹತ್ವದ ಕಾರ್ಯ ಯಶಸ್ವಿಯಾದಲ್ಲಿ ಭಾರತ ಚಂದ್ರನನ್ನು ತಲುಪಿದ ವಿಶ್ವದ ನಾಲ್ಕನೇ ರಾಷ್ಟ್ರವಾಗಲಿದೆ.