ಚೈನ್ನೈ ಸಮುದ್ರದಲ್ಲಿ ನೀಲಿ ಅಲೆಗಳ ಕೌತುಕ: ಅಪಾಯದ ಸಂಕೇತವೇ?

ಚೆನ್ನೈ: ನಗರದ ಹೊರವಲಯದ ಸಮುದ್ರ ತೀರದಲ್ಲಿ ಭಾನುವಾರ ಸಂಜೆ ಕಂಡುಬಂದ ನೀಲಿ ಬಣ್ಣದ ಅಲೆಗಳು ಜನರಲ್ಲಿ ತೀವ್ರ ಕುತೂಹಲ ಮೂಡಿಸಿವೆ. ಅಲೆಗಳು ಇನ್ನೇನು ತೀರವನ್ನು ಸ್ಪರ್ಶಿಸಬೇಕು ಎಂಬಷ್ಟರಲ್ಲಿ ಅವು ನೀಲಿ ಬಣ್ಣಕ್ಕೆ ತಿರುಗಿ, ಬೆಳಕಿನ ರೇಖೆಗಳಂತೆ ಹರಿದು ಬಂದು ತೀರದಲ್ಲಿ ಲೀನವಾಗುತ್ತಿದ್ದ ದೃಶ್ಯ ಜನರನ್ನು ನಿಬ್ಬೆರಗಾಗಿಸಿದೆ.

ವಿಜ್ಞಾನಿಗಳು ಮತ್ತು ಪರಿಸರ ತಜ್ಞರು 'ಈ ದೃಶ್ಯಗಳು ಸಾಗರ ಗರ್ಭದಲ್ಲಿ ಎಲ್ಲವೂ ಸರಿ ಇಲ್ಲ' ಎಂಬುದರ ಎಚ್ಚರಿಕೆಯಾಗಿರಬಹುದು ಎಂದು ಅಭಿಪ್ರಾಯಪಟ್ಟಿದ್ದಾರೆ.


ಕೋವಳಂನಿಂದ ತಿರುವನ್ಮಿಯೂವರ್‌ರೆಗೂ ಸಮುದ್ರ ತೀರದಲ್ಲಿ ನೀಲಿ ಬಣ್ಣದ ಬೆಳಕಿನ ರೇಖೆಗಳನ್ನು ಜನರು ಗುರುತಿಸಿದ್ದಾರೆ. ಭಾರತದ ಕಡಲತೀರದಲ್ಲಿ ಇಂತಹ ದೃಶ್ಯ ಕಾಣಿಸಿರುವುದು ಇದೇ ಮೊದಲು ಎನ್ನಲಾಗಿದೆ.

ಅಮೆರಿಕ, ಜಪಾನ್‌ ಸೇರಿದಂತೆ ಕೆಲವು ರಾಷ್ಟ್ರಗಳ ಕಡಲ ತೀರಗಳಲ್ಲಿ ಇಂಥ ಬೆಳಕಿನ ರೇಖೆಗಳು ಆಗಾಗ ಕಂಡುಬರುತ್ತವೆ. ಹವಾಮಾನ ಬದಲಾವಣೆಯಿಂದಾಗಿ ಸಮುದ್ರದ ತಾಪಮಾನ ಹೆಚ್ಚಾಗುತ್ತಿರುವುದರ ಸೂಚನೆ ಇದಾಗಿದೆ ಎಂದೂ ಹೇಳಲಾಗುತ್ತಿದೆ.