ನೆಹರು ಕುಟುಂಬ ಹೊರತಾದ 15 ಕಾಂಗ್ರೆಸ್‌ ಅಧ್ಯಕ್ಷರ ಪಟ್ಟಿ ನೀಡಿ ಮೋದಿಗೆ ಟಾಂಗ್ ಕೊಟ್ಟ ಚಿದಂಬರಂ

ಹೊಸದಿಲ್ಲಿ: ನೆಹರೂ-ಗಾಂಧಿ ಕುಟುಂಬ ಹೊರತುಪಡಿಸಿ 15 ಮಂದಿ ಕಾಂಗ್ರೆಸ್‌ ಅಧ್ಯಕ್ಷರಾಗಿದ್ದರು ಎಂದು ಮಾಜಿ ಹಣಕಾಸು ಸಚಿವ ಹಾಗೂ ಕಾಂಗ್ರೆಸ್‌ ಹಿರಿಯ ನಾಯಕ ಪಿ.ಚಿದಂಬರಂ ಶನಿವಾರ ಹೇಳುವ ಮೂಲಕ ಪ್ರಧಾನಿ ನರೇಂದ್ರ ಮೋದಿಗೆ ತಿರುಗೇಟು ನೀಡಿದ್ದಾರೆ.

ಶುಕ್ರವಾರ ಚುನಾವಣೆ ಪ್ರಚಾರ ಸಭೆಯಲ್ಲಿ ಭಾಗವಹಿಸಿ ಮಾತನಾಡಿದ್ದ ಮೋದಿ, 'ನೆಹರೂ-ಗಾಂಧಿ ಕುಟುಂಬವನ್ನು ಹೊರತುಪಡಿಸಿ ಕಾಂಗ್ರೆಸ್ಸಿಗರೊಬ್ಬರನ್ನು ಐದು ವರ್ಷಗಳವರೆಗೆ ಪಕ್ಷ ದ ಅಧ್ಯಕ್ಷ ರನ್ನಾಗಿ ಮಾಡಲಿ,' ಎಂದು ಸವಾಲು ಹಾಕಿದ್ದರು. ಇದಕ್ಕೆ ತಿರುಗೇಟು ನೀಡಿರುವ ಪಿ.ಚಿದಂಬರಂ ಸರಣಿ ಟ್ವೀಟ್‌ಗಳಲ್ಲಿ ಅಂತಹ 15 ಜನರ ಪಟ್ಟಿಯನ್ನು ನೀಡಿದ್ದಾರೆ.

'ಆಚಾರ್ಯ ಕೃಪಲಾನಿ, ಪಟ್ಟಾಭಿ ಸೀತಾರಾಮಯ್ಯ, ಪುರುಷೋತ್ತಮದಾಸ್‌ ಟಂಡನ್‌, ಯು.ಎನ್‌. ದೇವೂರಾ, ಸಂಜೀವ ರೆಡ್ಡಿ, ಸಂಜೀವಯ್ಯ, ಕಾಮರಾಜ…, ನಿಜಲಿಂಗಪ್ಪ, ಸಿ.ಸುಬ್ರಮಣಿಯನ್‌, ಜಗಜೀವನ್‌ ರಾಂ, ಶಂಕರ ದಯಾಳ ಶರ್ಮಾ, ಡಿ.ಕೆ.ಬರೋರ, ಬ್ರಹ್ಮಾನಂದ ರೆಡ್ಡಿ, ಪಿ.ವಿ.ನರಸಿಂಹರಾವ್‌, ಸೀತಾರಾಂ ಕೇಸರಿ ಕಾಂಗ್ರೆಸ್‌ ಪಕ್ಷ ದ ಅಧ್ಯಕ್ಷ ರಾಗಿದ್ದರು,' ಎಂದು ಚಿದಂಬರಂ ಹೇಳಿದ್ದಾರೆ. ಆದರೆ, ಇವರೆಲ್ಲರೂ ಅಧ್ಯಕ್ಷ ಸ್ಥಾನದಲ್ಲಿ ಐದು ವರ್ಷ ಪೂರೈಸಿದ್ದರೇ ಎಂಬುದನ್ನು ಚಿದಂಬರಂ ಸ್ಪಷ್ಟಪಡಿಸಿಲ್ಲ. ಮೋದಿ ಅವರು ತಮ್ಮ ಹೇಳಿಕೆಯಲ್ಲಿ ಐದು ವರ್ಷ ಅಧಿಕಾರಾವಧಿ ಪೂರ್ಣಗೊಳಿಸುವುದನ್ನು ಒತ್ತಿ ಹೇಳಿದ್ದರು.



'ಪ್ರಧಾನಿಯವರು ಕಾಂಗ್ರೆಸ್‌ ಅಧ್ಯಕ್ಷ ರ ಆಯ್ಕೆ ಮತ್ತು ಅವರ ಕೊಡುಗೆಗಳ ಬಗ್ಗೆ ಮಾತನಾಡಲು ಸಾಕಷ್ಟು ಸಮಯವನ್ನು ವ್ಯಯಮಾಡುತ್ತಿರುವುದಕ್ಕೆ ಅವರಿಗೆ ಧನ್ಯವಾದಗಳು, ನೋಟು ರದ್ದತಿ, ಜಿಎಸ್‌ಟಿ, ರಫೇಲ್‌ ಡೀಲ್‌, ಸಿಬಿಐ ಮತ್ತು ಆರ್‌ಬಿಐ ಬಗ್ಗೆ ಮಾತನಾಡಲು ಆ ಸಮಯದ ಅರ್ಧ ಭಾಗವನ್ನು ಬಳಸಲು ಪ್ರಧಾನಿಗಳಿಗೆ ಸಾಧ್ಯವೆ,?' ಎಂದು ಚಿದು ಪ್ರಶ್ನೆ ಮಾಡಿದ್ದಾರೆ.