ಭಾರತದ ಆಧ್ಯಾತ್ಮ ಕೋರ್ಸ್‌ ಬಗ್ಗೆ ಚೀನಾ ಎಚ್ಚರಿಕೆ

ಹೊಸದಿಲ್ಲಿ: ಭಾರತದ ಧಾರ್ಮಿಕ ಶಿಕ್ಷಣ ಸಂಸ್ಥೆಗಳಿಂದ ಹೇಳಿಕೊಡಲಾಗುವ ಆಧ್ಯಾತ್ಮ ಕೋರ್ಸ್‌ಗಳು ಮತ್ತು ಧಾರ್ಮಿಕ ಪಂಥಗಳಿಂದ ಅಂತರ ಕಾಯ್ದುಕೊಳ್ಳುವಂತೆ ಆ ದೇಶದ ನಾಗರಿಕರಿಗೆ ಚೀನಾ ಎಚ್ಚರಿಕೆ ನೀಡಿದೆ.

ಕೆಲವೊಂದು ಧಾರ್ಮಿಕ ಶಿಕ್ಷಣ ಸಂಸ್ಥೆಗಳಲ್ಲಿ ಲೈಂಗಿಕ ಕಿರುಕುಳ ಆರೋಪ ಕೇಳಿಬಂದಿರುವ ಹಿನ್ನೆಲೆಯಲ್ಲಿ ಚೀನಾದ ಸಾರ್ವಜನಿಕ ಭದ್ರತೆ ಸಚಿವಾಲಯ ಹಾಗೂ ಚೀನಾ ಪೊಲೀಸ್‌ ಇಲಾಖೆ ಈ ಎಚ್ಚರಿಕೆ ರವಾನಿಸಿದೆ.

ತೈವಾನ್‌ ನಟಿಯೊಬ್ಬರು ಆಂಧ್ರದ ಚಿತ್ತೂರು ಮೂಲದ 'ಒನ್‌ನೆಸ್‌ ವಿವಿ' ಒದಗಿಸುವ ಕೋರ್ಸ್‌ಗಳ ಬಗ್ಗೆ ಪ್ರಚಾರ ಮಾಡಿದ ಬೆನ್ನಲ್ಲೇ, ಚೀನಾದ ಸಾಮಾಜಿಕ ಜಾಲತಾಣಗಳಲ್ಲಿ ಈ ಬಗ್ಗೆ ವ್ಯಾಪಕ ಚರ್ಚೆ ಶುರುವಾಗಿದೆ.

'ಅಮ್ಮಾ' ಮತ್ತು 'ಭಗವಾನ್‌' ಅವರ ಪ್ರವಚನಗಳನ್ನು ತೈವಾನ್‌ ನಟಿ ಆ್ಯನಿ ಯಿ ಅವರು ಚೀನಾದ ಟ್ವಿಟರ್‌ 'ಸಿನಾ ವೀಬೊ'ನಲ್ಲಿ ಪೋಸ್ಟ್‌ ಮಾಡಿದ್ದರು. ಇದರ ಬೆನ್ನಲ್ಲೇ, ಧಾರ್ಮಿಕ ಪಂಥವೊಂದನ್ನು ಪ್ರಚಾರ ಮಾಡುತ್ತಿರುವ ಬಗ್ಗೆ ನಟಿಯ ಕುರಿತು ಆಕ್ಷೇಪ ವ್ಯಕ್ತವಾಗಿದೆ.

ರಾಮ್‌ ರಹೀಂ ಪ್ರಕರಣ ಉದಾಹರಣೆ: ಅನುಯಾಯಿಗಳ ಮೇಲೆ ಅತ್ಯಾಚಾರ ಎಸಗಿದ ಪ್ರಕರಣದಲ್ಲಿ ಜೈಲು ಸೇರಿರುವ ಪಂಜಾಬ್‌ನ ಗುರುಮಿತ್‌ ರಾಮ್‌ ರಹೀಂ ಸಿಂಗ್‌ ಪ್ರಕರಣವನ್ನು ಉದಾಹರಣೆಯಾಗಿ ನೀಡಿ ಚೀನಾ ಪ್ರಜೆಗಳನ್ನು ಎಚ್ಚರಿಸಲಾಗಿದೆ.