ಸಂಯಮ ಕಾಯ್ದುಕೊಳ್ಳಲು ಚೀನಾ ಮನವಿ

ಹೊಸದಿಲ್ಲಿ: ಭಾರತ-ಪಾಕ್‌ ನಡುವಿನ ಬಿಗುವಿನ ವಾತಾವರಣ ಚೀನಾಕ್ಕೂ ಆತಂಕ ಮೂಡಿಸಿದೆ. ಪಾಕ್‌ ಉಗ್ರರ ಶಿಬಿರಗಳ ಮೇಲೆ ಮಂಗಳವಾರ ದಾಳಿ ಮಾಡಿದಾಗ ಒಂದು ಸಣ್ಣ ಪ್ರತಿಕ್ರಿಯೆಯನ್ನೂ ನೀಡದ ಚೀನಾ, ಬುಧವಾರ ಪರಿಸ್ಥಿತಿ ಮತ್ತಷ್ಟು ತೀವ್ರಗೊಂಡ ಬೆನ್ನಲ್ಲೇ ಉಭಯ ರಾಷ್ಟ್ರಗಳೂ ಸಂಯಮ ಕಾಯ್ದುಕೊಳ್ಳಲು ಮನವಿ ಮಾಡಿದೆ. ಮಾತುಕತೆ ಮೂಲಕ ಉಭಯ ರಾಷ್ಟ್ರಗಳೂ ಏಷ್ಯಾದಲ್ಲಿ ಶಾಂತಿ ಕಾಪಾಡಬೇಕೆಂದು ಚೀನಾ ಕೋರಿದೆ.

ಸುಷ್ಮಾ ತರಾಟೆ: ಈ ಮಧ್ಯೆ ಚೀನಾ ಭೇಟಿಯಲ್ಲಿರುವ ವಿದೇಶಾಂಗ ಸಚಿವೆ ಸುಷ್ಮಾ ಸ್ವರಾಜ್‌ ಪುಲ್ವಾಮಾ ದಾಳಿಯನ್ನು ಉಲ್ಲೇಖಿಸಿ, ಭಯೋತ್ಪಾದನೆ ವಿರುದ್ಧ ಇಡೀ ವಿಶ್ವ ಸಮುದಾಯ ಒಂದಾಗಬೇಕಾದ ಕಾಲ ಬಂದಿದೆ ಎಂದರು. ಉಗ್ರರನ್ನು ಬೆಂಬಲಿಸುವ ಪಾಕಿಸ್ತಾನಕ್ಕೆ ಬೆಂಬಲ ನೀಡಬಾರದೆಂದು ಚೀನಾಕ್ಕೆ ತಾಕೀತು ಮಾಡಿದರು. ಸಭೆಯಲ್ಲಿ ಹಾಜರಿದ್ದ ರಷ್ಯಾ ವಿದೇಶಾಂಗ ಸಚಿವರೂ ಸುಷ್ಮಾ ಮಾತಿಗೆ ದನಿಗೂಡಿಸಿದರು.