ಲಡಾಕ್‌ ಗಡಿಯಿಂದ 10 ಸಾವಿರ ಸೈನಿಕರನ್ನು ವಾಪಸ್ ಕರೆಸಿಕೊಂಡ ಚೀನಾ‌

ಹೊಸದಿಲ್ಲಿ: ಮಹತ್ವದ ಬೆಳವಣಿಗೆಯಲ್ಲಿ ಚೀನಾ ಸೇನೆಯು ಪೂರ್ವ ಲಡಾಕ್‌ನ ವಾಸ್ತವ ಗಡಿ ನಿಯಂತ್ರಣ ರೇಖೆಯಿಂದ 10 ಸಾವಿರ ಯೋಧರನ್ನು ಹಿಂಪಡೆದಿದೆ ಎಂದು ಮೂಲಗಳು ಹೇಳಿವೆ.

ಲಡಾಕ್‌ ಗಡಿಯಲ್ಲಿನ ತನ್ನ ಮುಂಚೂಣಿ ನೆಲೆಗಳಿಂದ ಚೀನಾ ಹೆಚ್ಚುವರಿ ಯೋಧರನ್ನು ದೊಡ್ಡ ಸಂಖ್ಯೆಯಲ್ಲಿ ಹಿಂಪಡೆದಿದೆ. ಗಲ್ವಾನ್‌ ಕಣಿವೆಯಲ್ಲಿ ಕಳೆದ ವರ್ಷದ ಜೂನ್‌ನಲ್ಲಿ ಭಾರತ ಮತ್ತು ಚೀನಾ ಯೋಧರ ನಡುವೆ ಮಾರಾಮಾರಿ ನಡೆದು, ಈ ಸಂಘರ್ಷದಲ್ಲಿ 20 ಯೋಧರು ಹುತಾತ್ಮರಾಗಿದ್ದರು.

ಈ ಘಟನೆಯ ಬಳಿಕ ಗಲ್ವಾನ್‌ ಕಣಿವೆ ಗಡಿಯಲ್ಲಿ ಎರಡೂ ದೇಶಗಳು ಭಾರಿ ಸಂಖ್ಯೆಯಲ್ಲಿ ಯೋಧರನ್ನು ಜಮಾವಣೆಗೊಳಿಸಿ ಶಕ್ತಿ ಪ್ರದರ್ಶಿಸಿದ್ದವು. ಹಲವು ತಿಂಗಳುಗಳ ಕಾಲ ಮುಂದುವರಿದ ಪ್ರಕ್ಷುಬ್ಧ ಸ್ಥಿತಿ ತಿಳಿಸಲು ಸೇನಾ ಮತ್ತು ರಾಜತಾಂತ್ರಿಕ ಮಟ್ಟದಲ್ಲಿ ಹಲವು ಸುತ್ತಿನ ಮಾತುಕತೆಗಳು ನಡೆದಿದ್ದವು.

ಬಂಧಿತ ಚೀನಿ ಯೋಧನನ್ನು ಹಸ್ತಾಂತರಿಸಿದ ಭಾರತೀಯ ಸೇನೆ

ಮಾತುಕತೆಯಲ್ಲಿ ಹಂತ ಹಂತವಾಗಿ ಸೇನೆ ಹಿಂಪಡೆಯಲು ಎರಡೂ ದೇಶಗಳು ಸಮ್ಮತಿಸಿದ್ದವಾದರೂ ಚೀನಾ ಮಾತ್ರ ತನ್ನ ಸೈನಿಕರನ್ನು ಹಿಂಪಡೆಯದೆ ಮೊಂಡುಹಠ ಪ್ರದರ್ಶಿಸಿತ್ತು. ಆದರೆ ಇದೀಗ ಮೊದಲ ಬಾರಿಗೆ ದೊಡ್ಡ ಸಂಖ್ಯೆಯನ್ನು ಸೈನಿಕರನ್ನು ದೇಶ ವಾಪಸ್‌ ಕರೆಸಿಕೊಂಡಿದೆ.