ದ್ವಿಪಕ್ಷೀಯ ಸಭೆಯಲ್ಲಿ ಆಪ್‌ ನಿಷೇಧದ ಬಗ್ಗೆ ಚಕಾರ ಎತ್ತಿದ್ದ ಚೀನಾ..! ದೇಶದ ಸುರಕ್ಷತೆಯೇ ಪ್ರಮುಖ ಎಂದಿದ್ದ ಕೇಂದ್ರ

ಹೊಸದಿಲ್ಲಿ: ದೇಶದಲ್ಲಿ 59 ಚೀನಾ ಆಪ್‌ಗಳ ಬಳಕೆ ನಿಷೇಧಿಸಿದ ನಂತರ ದೆಹಲಿಯಲ್ಲಿ ನಡೆದ ದ್ವಿಪಕ್ಷಿಯ ಸಭೆಯಲ್ಲಿ ಆಪ್‌ ನಿಷೇಧದ ಬಗ್ಗೆ ಚೀನಾ ಪ್ರಸ್ತಾಪಿಸಿತ್ತು ಎಂದು ಸರಕಾರದ ಮೂಲಗಳು ತಿಳಿಸಿದ್ದು, ಚೀನಾ ಚಕಾರಕ್ಕೆ ಕೇಂದ್ರ ಸರಕಾರ ಸುರಕ್ಷತೆಯ ಉತ್ತರ ನೀಡಿ ಬಾಯಿ ಮುಚ್ಚಿಸಿದೆ.

ಉಭಯ ದೇಶಗಳ ರಾಜತಾಂತ್ರಿಕ ಸಭೆಯಲ್ಲಿ ಚೀನಾ ಮೊಬೈಲ್‌ ಆಪ್‌ಗಳ ನಿಷೇಧದ ಬಗ್ಗೆ ಪ್ರಸ್ತಾಪಿಸಿತ್ತು. ಆದರೆ, ಕೇಂದ್ರ ಸರಕಾರ ದೇಶದ ಭದ್ರತೆ ದೃಷ್ಟಿಗಾಗಿ ಈ ನಿರ್ಧಾರ ತೆಗೆದುಕೊಳ್ಳಲಾಗಿದೆ ಎಂದು ಸ್ಪಷ್ಟನೆ ನೀಡಿದ್ದು, ತನ್ನ ದೇಶದ ನಾಗರಿಕರ ಮಾಹಿತಿಯಲ್ಲಿ ರಾಜಿ ಮಾಡಿಕೊಳ್ಳಲು ಸಿದ್ಧವಿಲ್ಲ ಎಂದು ಹೇಳಿತ್ತು ಎಂದು ಉನ್ನತ ಮೂಲಗಳು ಖಚಿತಪಡಿಸಿವೆ.

ಕೆಲ ದಿನಗಳ ಹಿಂದಷ್ಟೇ‌ ಜನಪ್ರಿಯ ಆಪ್‌ಗಳಾದ ಟಿಕ್‌ ಟಾಕ್‌, ವೀಚಾಟ್‌, ಹೆಲೋ ಸೇರಿ 59 ಚೀನಿ ಆಪ್‌ಗಳನ್ನು ದೇಶದ ಭದ್ರತೆ ಹಾಗೂ ಸಾರ್ವಭೌಮತೆಯ ದೃಷ್ಟಿಯಿಂದ ಕೇಂದ್ರ ಸರಕಾರ ನಿಷೇಧಿಸಿತ್ತು.

ಭವಿಷ್ಯದಲ್ಲಿ ತಕರಾರು ಬರದಂತೆ ಗಡಿ ನಕ್ಷೆ ವಿನಿಮಯಕ್ಕೆ ಚೀನಾದ ಮೇಲೆ ಒತ್ತಡ ಹೇರಿದ ಭಾರತ!

ಕೇಂದ್ರ ಗುಪ್ತಚರ ಇಲಾಖೆ ಈ ಆಪ್‌ಗಳು ದೇಶದ ನಾಗರಿಕರ ಮಾಹಿತಿಯನ್ನು ಚೀನಾ ಸರಕಾರದೊಂದಿಗೆ ಹಂಚಿಕೊಳ್ಳುತ್ತಿವೆ. ಈ ಕಾರಣದಿಂದ ಆಪ್‌ಗಳನ್ನು ನಿಷೇಧಿಸುವಂತೆ ಕೇಂದ್ರಕ್ಕೆ ಪ್ರಸ್ತಾವ ಇಟ್ಟಿತ್ತು. ಅದರಂತೆ ಜೂನ್‌ 29 ರಂದು ಕೇಂದ್ರ ಗೃಹ ಸಚಿವಾಲು 59 ಆಪ್‌ಗಳನ್ನು ನಿಷೇಧಿಸಿ ಆದೇಶ ಹೊರಡಿಸಿತ್ತು.

China Apps Ban in India: ಟಿಕ್‌ಟಾಕ್‌ ಸೇರಿ 59 ಚೀನಾ ಆಪ್‌ಗಳ ಬ್ಯಾನ್‌: ‌ಡ್ರ್ಯಾಗನ್‌ ರಾಷ್ಟ್ರಕ್ಕೆ ಮೋದಿ ಸರಕಾರದ ಬಿಗ್‌ ಟಕ್ಕರ್‌

ಮಾಹಿತಿ ತಂತ್ರಜ್ಞಾನ ಕಾಯಿದೆಯ ಸೆಕ್ಷನ್‌ 69ಎ ಪ್ರಕಾರ ಸರಕಾರ ಆಪ್‌ಗಳನ್ನು ನಿಷೇಧಿಸಿತ್ತು. ಆಪ್‌ ಬ್ಯಾನ್‌ ಬಳಿಕ ಪ್ರತಿಕ್ರಿಯೆ ನೀಡಿದ್ದ ಚೀನಾ ವಿದೇಶಾಂಗ ಸಚಿವಾಲಯ ಅಂತರಾಷ್ಟ್ರೀಯ ಹೂಡಿಕೆದಾರರ ಕಾನೂನಾತ್ಮಕ ಹಕ್ಕುಗಳನ್ನು ಕಾಪಾಡುವುದು ಭಾರತದ ಕರ್ತವ್ಯವಾಗಿದೆ ಎಂದು ಅಸಮಾಧಾನ ವ್ಯಕ್ತಪಡಿಸಿತ್ತು.