ಸೆರೆಸಿಕ್ಕಿದ್ದ ಚೀನಿ ಯೋಧನ ಬಳಿ ಸ್ಲೀಪಿಂಗ್ ಬ್ಯಾಗ್, ಮೊಬೈಲ್ ಫೋನ್: ಸೇನೆಯ ಮಾಹಿತಿ !

ಲಡಾಖ್: ವಾಸ್ತವ ಗಡಿ ನಿಯಂತ್ರಣ ರೇಖೆ(ಎಲ್‌ಎಸಿ) ಬಳಿ ಭಾರತೀಯ ಸೇನೆಗೆ ಸೆರೆಸಿಕ್ಕಿದ್ದ ಚೀನಿ ಯೋಧನ ಬಳಿ, ಸ್ಲೀಪಿಂಗ್ ಬ್ಯಾಗ್ ಹಾಗೂ ಸ್ಟೋರೇಜ್ ಡಿವೈಸ್‌ಗಳಿದ್ದವು ಎಂದು ಸೇನಾ ಮೂಲಗಳು ತಿಳಿಸಿವೆ.

ಪೂರ್ವ ಲಡಾಖ್‌ನ ಚುಮಾರ್-ಡೆಮ್ಚೋಕ್ ಎಲ್‌ಎಸಿ ಬಳಿ ಪಿಎಲ್‌ಎ ಯೋಧ ವಾಂಗ್ ಯಾ ಲಾಂಗ್ ಎಂಬಾತನನ್ನು ಸೆರೆಹಿಡಿಯಲಾಗಿತ್ತು. ಪ್ರಾಥಮಿಕ ತನಿಖೆ ವೇಳೆ ಆತನಿಂದ ಚೀನಾ ಮಿಲಿಟರಿ ಮತ್ತು ನಾಗರಿಕ ಗುರುತಿನ ಚೀಟಿಗಳು ಸಿಕ್ಕಿದ್ದವು.

ವಾಂಗ್ ಯಾ ಲಾಂಗ್‌ನನ್ನು ತಪಾಸಣೆಗೆ ಗುರಿಪಡಿಸಿದಾಗ ಆತನ ಬಳಿ ಸ್ಲೀಪಿಂಗ್ ಬ್ಯಾಗ್ ಹಾಗೂ ಸ್ಟೋರೇಜ್ ಡಿವೈಸ್‌ಗಳೂ ಪತ್ತೆಯಾಗಿದ್ದು, ಆತ ಗುಪ್ತಚರ ಮಾಹಿತಿ ಸಂಗ್ರಹಿಸಲು ಉದ್ದೇಶಪೂರ್ವಕವಾಗಿಯೇ ಗಡಿ ದಾಟಿದ್ದನೇ ಎಂಬ ಅನುಮಾನ ವ್ಯಕ್ತವಾಗಿದೆ.

ಲಡಾಖ್ ಗಡಿಯಲ್ಲಿ ಭಾರತೀಯ ಸೇನೆಗೆ ಸೆರೆಸಿಕ್ಕ ಚೀನಿ ಯೋಧ: ಎಲ್‌ಎಸಿ ದಾಟಿ ಹೇಗೆ ಬಂದ?

ವಾಂಗ್ ಯಾ ಲಾಂಗ್ ಅಚಾತುರ್ಯದಿಂದ ಗಡಿ ದಾಟಿದ್ದರೆ ಆತನ ಬಳಿ ಅಗತ್ಯ ಸಲಕರಣೆಗಳು ಹೇಗೆ ಇರಲು ಸಾಧ್ಯ ಎಂಬ ಪ್ರಶ್ನೆ ಉದ್ಭವಿಸಿದ್ದು, ಗಡಿಯಲ್ಲಿ ಚೀನಾ ಯೋಧರ ಮೇಲೆ ಹೆಚ್ಚಿನ ನಿಗಾ ಇಡಲು ನಿರ್ಧರಿಸಲಾಗಿದೆ.


ಇಷ್ಟೇ ಅಲ್ಲದೇ ಆತನ ಬಳಿ ಚೀನಾ ಸೇನೆಯ ಮಿಲಿಟರಿ ಮೊಬೈಲ್ ಫೋನ್ ಕೂಡ ಪತ್ತೆಯಾಗಿದ್ದು, ಆತನಿಂದ ವಶಕ್ಕೆ ಪಡೆಯಲಾದ ಎಲ್ಲಾ ಸಲಕರಣೆಗಳನ್ನೂ ತಪಾಸಣೆಗೆ ಗುರಿಪಡಿಸಲಾಗಿದೆ ಎಂದು ಸೇನೆ ಸ್ಪಷ್ಟಪಡಿಸಿದೆ.

ಎಲ್‌ಎಸಿ ಬಳಿ ಸೆರೆಸಿಕ್ಕ ಪಿಎಲ್‌ಎ ಸೈನಿಕನನ್ನು ಚೀನಾಗೆ ಹಸ್ತಾಂತರಿಸಿದ ಭಾರತೀಯ ಸೇನೆ!
ಸದ್ಯ ಚೀನಾ ಸೇನೆಯ ಮನವಿಯ ಮೇರೆಗೆ ವಾಂಗ್ ಯಾ ಲಾಂಗ್‌ನನ್ನು ಮಿಲಿಟರಿ ನಿಯಮಗಳಿಗೆ ಅನುಗುಣವಾಗಿ ಹಸ್ತಾಂತರಿಸಲಾಗಿದ್ದು, ಗಡಿಯಲ್ಲಿ ವಿಚಕ್ಷಣಾ ಪ್ರಕ್ರಿಯೆಯನ್ನು ಚುರುಕುಗೊಳಿಸಲಾಗಿದೆ ಎಂದು ಸೇನಾ ಮೂಲಗಳು ಖಚಿತಪಡಿಸಿದೆ.