ದೇಶಾದ್ಯಂತ 10 ಸಾವಿರ ಸಿಎನ್‌ಜಿ ಕೇಂದ್ರ ಸ್ಥಾಪನೆ

ಹೊಸದಿಲ್ಲಿ: ಜಾಗತಿಕ ತಾಪಮಾನ ಹಾಗೂ ಪರಿಸರ ಹಾನಿ ತಪ್ಪಿಸುವ ನಿಟ್ಟಿನಲ್ಲಿ ಮುಂದಾಗಿರುವ ಕೇಂದ್ರ ಸರಕಾರ ಹಲವಾರು ಉಪ ಕ್ರಮಗಳನ್ನು ಕೈಗೊಳ್ಳುತ್ತಿದೆ.

ದೇಶಾದ್ಯಂತ 10 ಸಾವಿರ ಸಿಎನ್‌ಜಿ ಕೇಂದ್ರಗಳನ್ನು ಸ್ಥಾಪಿಸಲು ನಿರ್ಧರಿಸಲಾಗಿದೆ. ಐದು ವರ್ಷಗಳಲ್ಲಿ ಈ ಗುರಿ ತಲುಪಲು ತೀರ್ಮಾನಿಸಲಾಗಿದೆ.

ಪೆಟ್ರೋಲಿಯಂ ಮತ್ತು ನೈಸರ್ಗಿಕ ಅನಿಲ ಸಚಿವ ಧರ್ಮೇಂದ್ರ ಪ್ರಧಾನ್ ಈ ವಿಷಯ ತಿಳಿಸಿದ್ದಾರೆ.

ಹೊಸದಿಲ್ಲಿಯಲ್ಲಿ 10ನೇ ನಗರ ಅನಿಲ ವಿತರಣೆ ಹರಾಜಿಗೆ ಚಾಲನೆ ನೀಡಿ ಸಚಿವರು ಮಾತನಾಡಿದರು.

ದೇಶದಲ್ಲಿ 124 ಜಿಲ್ಲೆಗಳಲ್ಲಿ 50 ಭೌಗೋಳಿಕ ಪ್ರದೇಶಗಳು ಇದರ ವ್ಯಾಪ್ತಿಗೆ ಬರಲಿವೆ. 2050ರ ವೇಳೆಗೆ ಸಿಎನ್‌ಜಿ ವಾಹನಗಳ ಮಾರಾಟಕ್ಕೆ ಕಂಪನಿಗಳು ಉತ್ತೇಜನ ನೀಡುವ ಅಗತ್ಯವಿದೆ ಎಂದು ಸಚಿವರು ತಿಳಿಸಿದರು.

ಇಂಧನದ ಅಗತ್ಯಗಳನ್ನು ಪೂರೈಸಲು ಇದು ಸಹಕಾರಿಯಾಗಲಿದೆ. ಕಳೆದ 5 ವರ್ಷಗಳಲ್ಲಿ ಪಿಎನ್‌ಜಿ ಸಂಪರ್ಕ, ಸಿಎನ್‌ಜಿ ವಾಹನಗಳು ಮತ್ತು ಸಿಎನ್‌ಜಿ ಕೇಂದ್ರಗಳು ದ್ವಿಗುಣಗೊಂಡಿವೆ. ಕಳೆದೊಂದು ದಶಕದಿಂದೀಚೆಗೆ ಇಂಧನ ಬಳಕೆಯಲ್ಲಿ ಜಗತ್ತಿನಲ್ಲಿಯೇ ಭಾರತ 3ನೇ ಅತಿ ದೊಡ್ಡ ರಾಷ್ಟ್ರವಾಗಿದೆ ಎಂದು ಸಚಿವ ಧರ್ಮೇಂದ್ರ ಪ್ರಧಾನ್‌ ಹೇಳಿದರು.