ಅಹಮದಾಬಾದ್‌ನಲ್ಲಿರುವ ಕೊಲಂಬಿಯಾ ಏಷ್ಯಾ ಆಸ್ಪತ್ರೆ ಮಾರಾಟಕ್ಕೆ ನಿರ್ಧಾರ

ಅಹಮದಾಬಾದ್: ದೇಶದ ಖ್ಯಾತ ಖಾಸಗಿ ಆಸ್ಪತ್ರೆಗಳಲ್ಲಿ ಕೊಲಂಬಿಯಾ ಏಷ್ಯಾ ಆಸ್ಪತ್ರೆ ಒಂದಾಗಿದೆ. ಆದರೆ, ಗುಜರಾತ್‌ನ ಅಹಮದಾಬಾದ್‌ನಲ್ಲಿ ಈ ಆಸ್ಪತ್ರೆಯ ವಿಭಾಗ ನಷ್ಟ ಅನುಭವಿಸುತ್ತಿರುವ ಕಾರಣ ಬಂದ್ ಆಗಲಿದ್ದು, ಬೇರೆಯವರಿಗೆ ಮಾರಾಟ ಮಾಡಲು ಕಂಪನಿ ನಿರ್ಧರಿಸಿದೆ.

1 ಲಕ್ಷ ಚದರ ಅಡಿ ವಿಸ್ತಾರವುಳ್ಳ ಅಹಮದಾಬಾದ್‌ನ ಕೊಲಂಬಿಯಾ ಏಷ್ಯಾ ಆಸ್ಪತ್ರೆ 100 ಬೆಡ್‌ ಅನ್ನು ಹೊಂದಿದೆ. ಆದರೆ, ಆಸ್ಪತ್ರೆಯ ಕೇವಲ ಶೇ. 10 ರಿಂದ 15ರಷ್ಟು ಹಾಸಿಗೆಗಳು ಮಾತ್ರ ಭರ್ತಿಯಾಗುತ್ತಿದ್ದವು ಎಂದು ತಿಳಿದುಬಂದಿದೆ. ಅಲ್ಲದೆ, ಆಸ್ಪತ್ರೆಗೆ 130 ಕೋಟಿ ರೂ. ಯಷ್ಟು ಬಂಡವಾಳ ಹೂಡಿದ್ದು, ತೀವ್ರ ನಷ್ಟ ಅನುಭವಿಸಿದ ಕಾರಣ ಆಸ್ಪತ್ರೆ ಮಾರಾಟ ಮಾಡಲು ಕಂಪನಿ ನಿರ್ಧರಿಸಿದೆ.

ಮೂಲ ಸುದ್ದಿಗಾಗಿ ಇಲ್ಲಿ ಓದಿ

ಆದರೆ, ಸದ್ಯದ ಪರಿಸ್ಥಿತಿಯಲ್ಲಿ ಇದನ್ನು ಕೊಂಡುಕೊಳ್ಳುವವರನ್ನು ಹುಡುಕಲು ಇನ್ನೂ ಹೆಚ್ಚು ಸಮಯ ಹಿಡಿಯಬಹುದು ಎಂದು ತಜ್ಞರು ಅಭಿಪ್ರಾಯ ವ್ಯಕ್ತಪಡಿಸಿದ್ದಾರೆ. ಇನ್ನೊಂದೆಡೆ, ಸೆಪ್ಟೆಂಬರ್ 15ರೊಳಗೆ ಬೇರೆ ಕೆಲಸ ಹುಡುಕಿಕೊಳ್ಳಿ ಎಂದು ಆಸ್ಪತ್ರೆಯ ಆಡಳಿತ ಮಂಡಳಿ ಅಲ್ಲಿನ ಸಿಬ್ಬಂದಿಗೆ ತಿಳಿಸಿದೆ. ಈ ಬಗ್ಗೆ ವೈದ್ಯರ ಜತೆಯಲ್ಲೂ ಸಿಇಒ ನಂದಕುಮಾರ್ ಜೈರಾಮ್ ಹಾಗೂ ಗ್ರೂಪ್‌ ಸಿಒಒ ಜಸ್ದೀಪ್‌ ಸಿಂಗ್ ಚರ್ಚೆ ನಡೆಸಿದ್ದು, ಆಸ್ಪತ್ರೆಯನ್ನು ಮಾರಾಟ ಮಾಡುತ್ತಿರುವುದಾಗಿ ತಿಳಿಸಿದ್ದಾರೆ.

ಅಮೆರಿಕ ಮೂಲದ ಕೊಲಂಬಿಯಾ ಯುಎಸ್‌ಎ ಎಲ್‌ಎಲ್‌ಸಿ ಸಂಸ್ಥೆ ಆಸ್ಪತ್ರೆಯ ಮಾಲೀಕತ್ವ ಹೊಂದಿದ್ದು, ಭಾರತದಲ್ಲಿ 12 ಆಸ್ಪತ್ರೆಗಳನ್ನು ಹೊಂದಿದೆ. ಜತೆಗೆ ಮಲೇಷ್ಯಾದಲ್ಲಿ 12 ಹಾಗೂ ವಿಯೆಟ್ನಾಂ, ಇಂಡೊನೇಷ್ಯಾದಲ್ಲಿ ತಲಾ 3 ಆಸ್ಪತ್ರೆಯನ್ನು ಹೊಂದಿದೆ.