'ಅಮ್ಮ' ಅಕ್ರಮ ಆಸ್ತಿ ವಶಕ್ಕೆ ಮುಂದಾದ ಸರಕಾರ

ಚೆನ್ನೈ: ಮಾಜಿ ಸಿಎಂ ಜಯಲಲಿತಾ ಸೇರಿದಂತೆ ಇತರ ಮೂವರ ಮೇಲಿನ ಅಕ್ರಮ ಆಸ್ತಿ ಗಳಿಕೆ ಪ್ರಕರಣಕ್ಕೆ ಸಂಬಂಧಿಸಿ ತಮಿಳುನಾಡು ಸರಕಾರ ಆಸ್ತಿ ಮುಟ್ಟುಗೋಲು ಪ್ರಕ್ರಿಯೆ ಆರಂಭಿಸಿದೆ. ಫೆಬ್ರವರಿಯಲ್ಲಿ ಸುಪ್ರೀಂ ಕೋರ್ಟ್ ನೀಡಿದ್ದ ತೀರ್ಪು ಎತ್ತಿಹಿಡಿದಿದ್ದ ವಿಚಾರಣಾ ನ್ಯಾಯಾಲಯ ಆಸ್ತಿ ವಶಪಡಿಸಿಕೊಳ್ಳಲು ಆದೇಶಿಸಿತ್ತು.

ಚೆನ್ನೈ, ಕಾಂಚಿಪುರಂ ಮತ್ತು ತಿರುವಲ್ಲುವರ್ ಸೇರಿದಂತೆ 6 ಜಿಲ್ಲೆಗಳಲ್ಲಿ ಜಯಲಲಿತಾ ಮತ್ತು ಸಮೀಪವರ್ತಿಗಳಾದ, ಜೈಲಿನ್ಲಲಿರುವ ವಿಕೆ ಶಶಿಕಲಾ, ಜೆ. ಇಳವರಸಿ ಮತ್ತು ವಿಎನ್ ಸುಧಾಕರನ್ ಒಡೆತನದ 6 ಸಂಸ್ಥೆಗಳಿಗೆ ಸೇರಿದ ಕೋಟ್ಯಾಂತರ ರೂಪಾಯಿ ಮೌಲ್ಯದ 68 ಆಸ್ತಿಗಳ ವಶಕ್ಕೆ ಕೋರ್ಟ್ ಆದೇಶಿಸಿದೆ.

ಒಟ್ಟಾರೆ ಜಯಲಲಿತಾ ಸೇರಿದಂತೆ ಇತರ ಮೂವರ ಮೇಲೆ 128 ಅಕ್ರಮ ಆಸ್ತಿ ಗಳಿಕೆ ಪ್ರಕರಣಗಳಿದ್ದು, 68 ಆಸ್ತಿಗಳನ್ನಷ್ಟೇ ವಶ ಪಡಿಸಿಕೊಳ್ಳಲು ಆದೇಶಿಸಲಾಗಿದೆ.

ಮುಟ್ಟುಗೋಲು ಹೇಗೆ?
ಸರಕಾರದ ಆದೇಶದ ಅನುಸಾರ ಭ್ರಷ್ಟಾಚಾರ ವಿರೋಧಿ ಮತ್ತು ವಿಜಿಲೆನ್ಸ್ ನಿರ್ದೇಶಕರು, ಅಕ್ರಮ ಆಸ್ತಿಗಳನ್ನು ಪತ್ತೆ ಹಚ್ಚಿ ಗುರುತು ಹಾಕಲಿದ್ದಾರೆ. ನಂತರ ಕಂದಾಯ ಅಧಿಕಾರಿಗಳು ವಶಪಡಿಸಿಕೊಂಡ ಆಸ್ತಿಗಳಿಗೆ 'ತಮಿಳುನಾಡು ಸರಕಾರದ ಸ್ವತ್ತು' ಎಂಬ ಬೋರ್ಡ್‌ಅನ್ನು ತಗುಲಿಹಾಕಲಿದೆ. ಇಲ್ಲಿವರೆಗೂ ಹಕ್ಕು ಸಾಧಿಸಿದ್ದ ವ್ಯಕ್ತಿಗಳಿಗೆ ಪ್ರವೇಶಿಸದಂತೆ ಲಿಖಿತ ಸುತ್ತೋಲೆಯನ್ನು ಹೊರಡಿಸಲಿದ್ದಾರೆ.