ಪ್ರಿಯಾಂಕಾ ಗಾಂಧಿ ರ‍್ಯಾಲಿಗೆ ಗೈರಾಗಿ, ವಿಧಾನಸಭೆ ಅಧಿವೇಶನಕ್ಕೆ ಹೋಗಿದ್ದ 'ಕೈ' ಶಾಸಕಿಗೆ ನೋಟಿಸ್‌

ಲಖನೌ: ಮಹಾತ್ಮ ಗಾಂಧಿ ಅವರ 150ನೇ ಜನ್ಮದಿನಾಚರಣೆ ನಿಮಿತ್ತ ಅಕ್ಟೋಬರ್‌ 2ರಂದು ಉತ್ತರ ಪ್ರದೇಶ ಸರಕಾರ ಕರೆದಿದ್ದ 36 ಗಂಟೆಗಳ ವಿರಾಮರಹಿತ ವಿಶೇಷ ವಿಧಾನಸಭೆ ಅಧಿವೇಶನವನ್ನು ಬಹಿಷ್ಕರಿಸುವಂತೆ ಕಾಂಗ್ರೆಸ್‌ ನೀಡಿದ್ದ ಸೂಚನೆಯನ್ನೂ ಲೆಕ್ಕಿಸದೇ ಅದರಲ್ಲಿ ಪಾಲ್ಗೊಂಡಿದ್ದ ರಾಯ್‌ಬರೇಲಿ ಶಾಸಕಿ ಅದಿತಿ ಸಿಂಗ್‌ ಅವರಿಗೆ ಪಕ್ಷವು ಶುಕ್ರವಾರ ಶೋಕಾಸ್‌ ನೋಟಿಸ್‌ ಜಾರಿಗೊಳಿಸಿದೆ.

ಪಕ್ಷದ ಸೂಚನೆಗೆ ಬೆಲೆಕೊಡದೆ ಅಧಿವೇಶನದಲ್ಲಿ ಪಾಲ್ಗೊಂಡಿದ್ದ ಸಿಂಗ್‌, ಎಐಸಿಸಿ ಪ್ರಧಾನ ಕಾರ್ಯದರ್ಶಿ ಪ್ರಿಯಾಂಕಾ ವಾದ್ರಾ ಅದೇ ದಿನ ರಾಯ್‌ಬರೇಲಿಯಲ್ಲಿ ನಡೆಸಿದ ರ‍್ಯಾಲಿಗೆ ಗೈರಾಗಿದ್ದರು. ಅವರ ನಡೆ ರಾಯ್‌ಬರೇಲಿ ಲೋಕಸಭೆ ಕ್ಷೇತ್ರವನ್ನು ಪ್ರತಿನಿಧಿಸುತ್ತಿರುವ ಪಕ್ಷಾಧ್ಯಕ್ಷೆ ಸೋನಿಯಾ ಗಾಂಧಿ ಅವರಿಗೂ ಮುಜುಗರ ತಂದಿಟ್ಟಿತ್ತು. ಈ ಮಧ್ಯೆ ಕಾಂಗ್ರೆಸ್‌ ಕಾರ‍್ಯಕರ್ತರು ಅದಿತಿ ಅವರ ನಿವಾಸದ ಎದುರು ಪ್ರತಿಭಟನೆ ನಡೆಸಿ ರಾಜೀನಾಮೆ ಆಗ್ರಹಿಸಿದ್ದಾರೆ.

'ಮಾಧ್ಯಮಗಳ ಮುಂದೆ ನೋಟಿಸ್‌ ನೀಡಲಾಗಿದೆ ಎಂದು ಪಕ್ಷ ಹೇಳಿಕೊಂಡಿದೆಯೇ ವಿನಾಃ ನನಗೆ ಇದುವರೆಗೂ ಯಾವ ನೋಟಿಸೂ ಬಂದಿಲ್ಲ,' ಎಂದಿರುವ ಅದಿತಿ ಸಿಂಗ್‌, ರಾಜಕೀಯ ಬದಿಗಿಟ್ಟು ರಾಜ್ಯದ ಅಭಿವೃದ್ಧಿ ಹಿತದೃಷ್ಟಿಯಿಂದ ಅಧಿವೇಶನದಲ್ಲಿಪಾಲ್ಗೊಂಡಿದ್ದೆ ಎಂದು ತಮ್ಮ ನಡೆಯನ್ನು ಸಮರ್ಥಿಸಿಕೊಂಡಿದ್ದಾರೆ.