ಕಾಂಗ್ರೆಸ್‌ ಸಿಎಂಗಳ ಹೆಸರನ್ನೇ ಮರೆತ ರಾಹುಲ್‌!

ಭೋಪಾಲ್‌: ರಾಹುಲ್‌ ಗಾಂಧಿ ಅವರು ಕಾಂಗ್ರೆಸ್‌ ಆಡಳಿತವಿರುವ ಮಧ್ಯಪ್ರದೇಶ ಮತ್ತು ಛತ್ತೀಸ್‌ಗಢದ ಸಿಎಂಗಳ ಹೆಸರನ್ನೇ ತಪ್ಪಾಗಿ ಹೇಳಿದ ವಿದ್ಯಮಾನ ಭಾರಿ ವೈರಲ್‌ ಆಗಿದೆ.

ಮೇ 14ರಂದು ಮಧ್ಯಪ್ರದೇಶದ ನೀಮುಚ್‌ನಲ್ಲಿ ನಡೆದ ರ‍್ಯಾಲಿಯಲ್ಲಿ ಮಾತನಾಡುತ್ತಿದ್ದಾಗ ವೇದಿಕೆಯಲ್ಲಿರುವ ನಾಯಕರನ್ನು ಸಂಬೋಧಿಸುತ್ತಾ, ''ಮಧ್ಯ ಪ್ರದೇಶ ಮುಖ್ಯಮಂತ್ರಿಗಳಾದ ಭೂಪೇಶ್‌ ಬಾಗೇಲ್‌ಜಿ, ಛತ್ತೀಸ್‌ಗಢ ಮುಖ್ಯಮಂತ್ರಿಗಳಾದ ಹುಕುಮ್‌ ಸಿಂಗ್‌ ಕರಾಡಾಜಿ,'' ಎಂದು ಹೇಳಿದ್ದರು!

ಮಧ್ಯಪ್ರದೇಶ ಮತ್ತು ಛತ್ತೀಸ್‌ಗಢವನ್ನು ಕಾಂಗ್ರೆಸ್‌ ಆಳುತ್ತಿದೆ ಮತ್ತು ಸ್ವತಃ ರಾಹುಲ್‌ ಅವರೇ ಕಮಲನಾಥ್‌ ಮತ್ತು ಭೂಪೇಶ್‌ ಬಾಗೇಲ್‌ ಅವರನ್ನು ಸಿಎಂಗಳಾಗಿ ನೇಮಿಸಿದ್ದರು. ಅಷ್ಟಾದರೂ ರಾಹುಲ್‌ ಗಾಂಧಿ ಅವರು ಮರೆತಿದ್ದು ಹೇಗೆ ಎನ್ನುವುದೇ ಆಶ್ಚರ್ಯ.

ಅವರ ಭಾಷಣದ ತುಣುಕು ವೆಬ್‌ಗಳಲ್ಲಿ ವೈರಲ್‌ ಆಗಿದ್ದು, ಸಾಕಷ್ಟು ಜನರು ರಾಹುಲ್‌ ಕಾಲೆಳೆದಿದ್ದಾರೆ.

ಇದು ಮೊದಲಲ್ಲ: ರಾಹುಲ್‌ ಗಾಂಧಿ ಇಂಥ ಸಿಲ್ಲಿ ತಪ್ಪುಗಳಿಂದ ಗೇಲಿಗೊಳಗಾಗುವುದು ಮೊದಲೇನಲ್ಲ. 2018ರಲ್ಲಿ ನಡೆದ ಕರ್ನಾಟಕ ವಿಧಾನಸಭಾ ಚುನಾವಣೆಯ ರ‍್ಯಾಲಿಯಲ್ಲಿ 'ವಿಶ್ವೇಶ್ವರಯ್ಯ' ಅವರ ಹೆಸರನ್ನು ಹೇಳಲಾಗದೆ ಒದ್ದಾಡಿದ್ದರು!