ಸೇನೆ ಮೇಲೆ ಡ್ರೋನ್‌ ದಾಳಿ ಸಂಚು

ಹೊಸದಿಲ್ಲಿ: ಚೀನಾ ನಿರ್ಮಿತ ಡ್ರೋನ್‌ಗಳನ್ನು ಬಳಸಿಕೊಂಡು ಜಮ್ಮು-ಕಾಶ್ಮೀರ ಮತ್ತು ಪಂಜಾಬ್‌ನಲ್ಲಿ ಉಗ್ರರಿಗೆ ಶಸ್ತ್ರಾಸ್ತ್ರಗಳನ್ನು ಪೂರೈಸುತ್ತಿರುವ ಪಾಕಿಸ್ತಾನ ಗುಪ್ತಚರ ಸಂಸ್ಥೆ ಐಎಸ್‌ಐ, ಈಗ ಭಾರತೀಯ ಸೇನೆ ಮೇಲೆಯೂ ಡ್ರೋನ್‌ ಮೂಲಕ ದಾಳಿ ನಡೆಸು ಸಂಚು ಹೂಡಿರುವ ಸಂಗತಿ ಬಯಲಾಗಿದೆ.

ಭಾರತೀಯ ಸೇನೆಯು ಜಮ್ಮು-ಕಾಶ್ಮೀರದಲ್ಲಿ ಕೆಲವು ತಿಂಗಳಿಂದ 'ಆಪರೇಷನ್‌ ಆಲ್‌ ಔಟ್‌' ಹೆಸರಿನಡಿ ಕಾರ್ಯಾಚರಣೆ ನಡೆಸಿ ಉಗ್ರರ ಹುಟ್ಟಡಗಿಸಿದೆ. ಈ ವರ್ಷ ಜನವರಿಯಿಂದ ಇದುವರೆಗೆ 200ಕ್ಕೂ ಹೆಚ್ಚು ಉಗ್ರರನ್ನು ಸದೆಬಡಿಯಲಾಗಿದೆ. ಇತ್ತೀಚೆಗೆ ಹಿಜ್ಬುಲ್‌ ಮುಜಾಹಿದೀನ್‌ ಉಗ್ರ ಸಂಘಟನೆಯ ಕಮಾಂಡರ್‌ ರಿಯಾಜ್‌ ನೈಕೂ ಮತ್ತು ಸೈಫುಲ್ಲಾಮಿರ್‌ನ ಹತ್ಯೆಯು ಐಎಸ್‌ಐನ ನಿದ್ದೆಗೆಡಿಸಿದೆ.

ದಾಳಿ ನಡೆಸಲು ಉಗ್ರರ ಕೊರತೆ ಎದುರಿಸುತ್ತಿರುವ ಐಎಸ್‌ಐ, ಈಗ ಚೀನಿ ನಿರ್ಮಿತ ಡ್ರೋನ್‌ಗಳನ್ನು ಬಳಸಿಕೊಂಡು ಭಾರತೀಯ ಸೇನೆ ಮೇಲೆ ದಾಳಿ ನಡೆಸಲು ಸಂಚು ಹೆಣೆದಿದೆ. ಡ್ರೋನ್‌ಗಳಲ್ಲಿನ ಹೈ ರೆಸ್ಯೂಲೂಷನ್‌ ಕ್ಯಾಮೆರಾಗಳ ಮೂಲಕ ಗಡಿಯಲ್ಲಿ ಭಾರತದ ಸೇನಾ ಚಲನವಲನಗಳ ಮೇಲೆ ಅದು ಕಣ್ಣಿಟ್ಟಿದೆ ಎಂದು ಗುಪ್ತಚರ ವರದಿಗಳು ತಿಳಿಸಿವೆ.

ಭಾರತೀಯ ಸೇನೆಯು ಇತ್ತೀಚೆಗಷ್ಟೇ ಇಂತಹ ಡ್ರೋನ್‌ ಅನ್ನು ಹೊಡೆದುರುಳಿಸಿತ್ತು. ಗುಪ್ತಚರ ವರದಿಯ ಬೆನ್ನಲ್ಲೇ ಕೇಂದ್ರ ಗೃಹ ಸಚಿವಾಲಯ ಗಡಿಯಲ್ಲಿ ನಿಗಾ ವ್ಯವಸ್ಥೆಯನ್ನು ಇನ್ನಷ್ಟು ಬಿಗಿಗೊಳಿಸುವಂತೆ ಭದ್ರತಾ ಪಡೆಗಳಿಗೆ ಸೂಚನೆ ನೀಡಿದೆ.

ಪಾಕ್‌ನ ಇಂತಹ ಕುತಂತ್ರಗಳನ್ನು ಬಗ್ಗು ಬಡಿಯಲು ಭಾರತೀಯ ಸೇನೆ ಸಜ್ಜಾಗಿದೆ. ಯೋಧರು ಹಾಗೂ ಅಧಿಕಾರಿಗಳಿಗೆ ಡ್ರೋನ್‌ಗಳನ್ನು ಹೊಡೆದುರುಳಿಸುವ ತಂತ್ರಜ್ಞಾನ ಕುರಿತು ತರಬೇತಿ ನೀಡುತ್ತಿದೆ. ಈ ಮಧ್ಯೆ ಪಂಜಾಬ್‌ನಲ್ಲಿ ಖಲಿಸ್ತಾನ ಉಗ್ರರಿಗೂ ಪಾಕ್‌ ಡ್ರೋನ್‌ ಮೂಲಕ ಶಸ್ತ್ರಾಸ್ತ್ರಗಳನ್ನು ಪೂರೈಸುತ್ತಿದ್ದು, ಈ ಬಗ್ಗೆಯೂ ಭಾರತೀಯ ಸೇನೆ ಹದ್ದಿನ ಕಣ್ಣಿಟ್ಟಿದೆ. ಈ ಚೀನಿ ನಿರ್ಮಿತ ಡ್ರೋನ್‌ಗಳು 4-5 ಕೆ.ಜಿ. ತೂಕ ಹೊರಬಲ್ಲದಾಗಿದ್ದು, ಎರಡು ಕಿ.ಮೀ ದೂರ ಕ್ರಮಿಸಬಲ್ಲವು.