ಕೊರೊನಾ ನಿಯಂತ್ರಣಕ್ಕೆ ಸಹಕಾರ, ಇಸ್ರೋಗೆ ವಿಶ್ವಸಂಸ್ಥೆ ಮೆಚ್ಚುಗೆ

ವಿಶ್ವಸಂಸ್ಥೆ: ತನ್ನ ಬಾಹ್ಯಾಕಾಶ ತಂತ್ರಜ್ಞಾನದ ಮೂಲಕ ಭಾರತದಲ್ಲಿ ಕೊರೊನಾ ನಿಯಂತ್ರಣಕ್ಕೆ ಕೇಂದ್ರ ಸರಕಾರದ ನೆರವಿಗೆ ಧಾವಿಸಿದ್ದಕ್ಕಾಗಿ ಭಾರತೀಯ ಬಾಹ್ಯಾಕಾಶ ಸಂಸೋಧನಾ ಸಂಸ್ಥೆ (ಇಸ್ರೋ) ಬಗ್ಗೆ ವಿಶ್ವಸಂಸ್ಥೆ ಮೆಚ್ಚುಗೆ ಸೂಚಿಸಿದೆ.

ಇಸ್ರೋ ಚಾಲನೆ ನೀಡಿದ ರಾಷ್ಟ್ರೀಯ ಜಿಯೋ-ಪೋರ್ಟಲ್‌ ‘ಭುವನ್‌’ ಕುರಿತು ಉಲ್ಲೇಖಿಸಿ ಕೊರೊನಾ ವಿರುದ್ಧ ಹೋರಾಟದಲ್ಲಿ ಇದು ಪ್ರಮುಖ ಸಾಧನವಾಗಿದೆ ಎಂದು ವಿಶ್ವಸಂಸ್ಥೆ ಶ್ಲಾಘಿಸಿದೆ.

"ಸೋಂಕಿತರ ಟ್ರ್ಯಾಕಿಂಗ್‌, ಹಾಟ್‌ಸ್ಪಾಟ್‌ಗಳ ಪತ್ತೆ, ತರಕಾರಿ ಮಾರುಕಟ್ಟೆಗಳು ಹಾಗೂ ಆಹಾರದ ಅಗತ್ಯ ಇರುವ ತಾಣಗಳ ನಡುವೆ ಸಮನ್ವಯತೆ, ಹೋಮ್‌ ಐಸೊಲೇಷನ್‌ ಮತ್ತು ಮಾಲಿನ್ಯ ಸಂಬಂಧಿತ ನಿಖರ ಮಾಹಿತಿಗಳನ್ನು ಇಸ್ರೋದ ಬಾಹ್ಯಾಕಾಶ ಸಾಧನಗಳು ಸರಕಾರಕ್ಕೆ ಒದಗಿಸಿದ್ದರಿಂದ ಕೊರೊನಾ ನಿಯಂತ್ರಣ ಕ್ರಮಗಳು ಪರಿಣಾಮಕಾರಿಯಾಗಿ ಜಾರಿಯಾದವು. ಭುವನ್‌ ಪೋರ್ಟಲ್‌ನಿಂದಾಗಿ ದೇಶದಲ್ಲಿ ಕೊರೊನಾ ಸ್ಥಿತಿಗತಿಯ ಮಾರ್ಪಾಡು ಬಗ್ಗೆ ಆಗಾಗ್ಗೆ ಅರಿಯಲು ಸರಕಾರಿ ಅಧಿಕಾರಿಗಳಿಗೆ ನೆರವಾಯಿತು. ಅದರಂತೆ ವಿವಿಧ ಹಂತಗಳಲ್ಲಿ ಲಾಕ್‌ಡೌನ್‌ ಸಡಿಲಗೊಳಿಸುವಿಕೆಯೂ ನಡೆಯಿತು," ಎಂದು ವರದಿಯಲ್ಲಿ ಹೇಳಲಾಗಿದೆ.

ಸುಸ್ಥಿರ ಅಭಿವೃದ್ಧಿಗೆ ಬಾಹ್ಯಾಕಾಶ ತಂತ್ರಜ್ಞಾನದ ನೆರವು ಪಡೆಯುತ್ತಿರುವ ವಿವಿಧ ಪ್ರಾಂತ್ಯಗಳಲ್ಲಿನ ರಾಷ್ಟ್ರಗಳ ಕುರಿತಾದ ವಿವರಣೆಯನ್ನು ವಿಶ್ವಸಂಸ್ಥೆ ವರದಿಯಲ್ಲಿ ನೀಡಿದೆ.