ಹಿರಿಯ ಅಧಿಕಾರಿ ಪತ್ನಿ ಮೇಲೆ ಅತ್ಯಾಚಾರ ಆರೋಪ: ರೈಲಿಗೆ ತಲೆ ಕೊಟ್ಟ ಸಬ್ ಇನ್ಸಪೆಕ್ಟರ್

ಪುಣೆ: ಹಿರಿಯ ಪೊಲೀಸ್ ಅಧಿಕಾರಿಯ ಪತ್ನಿ ಮೇಲೆ ಅತ್ಯಾಚಾರ ಎಸಗಿದ ಆರೋಪ ಹೊತ್ತಿದ್ದ ಸಬ್ ಇನ್ಸಪೆಕ್ಟರ್ ರೈಲಿಗೆ ತಲೆ ಕೊಟ್ಟು ಸಾವಿಗೆ ಶರಣಾದ ಘಟನೆ ಮಹಾರಾಷ್ಟ್ರದಲ್ಲಿ ನಡೆದಿದೆ.

ಮಂಗಳವಾರ ಮುಂಜಾನೆ ಪುಣೆಯ ಶಿವಾಜಿ ನಗರದ ಸಂಗಮ್ ಸೇತುವೆ ಬಳಿಯ ರೈಲು ಹಳಿ ಮೇಲೆ ಅವರ ಶವ ಪತ್ತೆಯಾಗಿದೆ.

ಮೃತ ಸಂಜನ್ ಸನಪ್ ಅಂಬೋಲಿ ಪೊಲೀಸ್ ಠಾಣೆಯಲ್ಲಿ ಸಬ್ ಇನ್ಸಪೆಕ್ಟರ್ ಆಗಿದ್ದರು. ಮಂಗಳವಾರ ಮುಂಜಾನೆ 9.30 ರ ಸುಮಾರಿಗೆ ಅವರು ಹಳಿಯ ಮೇಲೆ ನಡೆದುಕೊಂಡು ಹೋಗುತ್ತಿದ್ದರು. ರೈಲು ಬರುತ್ತಿದೆ ಎಂದು ಎಷ್ಟು ಕೂಗಿ ಹೇಳಿದರೂ ಅವರು ನಮ್ಮ ಮಾತಿಗೆ ಕಿವಿಗೊಡಲಿಲ್ಲ.ಅಷ್ಟರಲ್ಲಿ ವೇಗವಾಗಿ ಬಂದ ರೈಲೊಂದು ಅವರನ್ನು ಗುದ್ದಿಕೊಂಡು ಹೋಯಿತು ಎಂದು ಸ್ಥಳೀಯರು ತಿಳಿಸಿರುವುದಾಗಿ ರೈಲ್ವೆ ಅಧಿಕಾರಿಗಳು ತಿಳಿಸಿದ್ದಾರೆ.

ನಾವು ಆಕಸ್ಮಿಕ ಸಾವು ಪ್ರಕರಣವನ್ನು ದಾಖಲಿಸಿದ್ದೇವೆ. ಇದು ಆತ್ಮಹತ್ಯೆ ಪ್ರಕರಣವೆಂಬಂತೆ ಅನುಮಾನ ವ್ಯಕ್ತವಾಗುತ್ತಿದೆ. ಅವರು ಪುಣೆಗೆ ಬಂದಿದ್ದೇಕೆ ಎಂದು ನಮಗೆ ಗೊತ್ತಿಲ್ಲ ಎಂದು ಪುಣೆ ರೈಲ್ವೆ ನಿಲ್ದಾಣದ ಜಿಆರ್‌ಪಿ ಇನ್ಸಪೆಕ್ಟರ್ ಮನೋಜ್ ಖಂಡಾಲೆ ಹೇಳಿದ್ದಾರೆ.

ನಾಸಿಕ್ ನಿವಾಸಿಯಾಗಿರುವ ಸನಪ್ ವಿರುದ್ಧ ಅತ್ಯಾಚಾರ ಆರೋಪ ಕೇಳಿ ಬಂದಿದ್ದು, ಇದರಿಂದ ಅವರು ಮಾನಸಿಕವಾಗಿ ಖಿನ್ನತೆಗೆ ಒಳಗಾಗಿದ್ದರು. ಒತ್ತಡಕ್ಕೊಳಗಾಗಿ ಅವರು ಸಾವಿಗೆ ಶರಣಾಗಿರಬಹುದೆಂದು ಭಾವಿಸಲಾಗಿದೆ. ಆದರೆ ಡೆತ್ ನೋಟ್ ಪತ್ತೆಯಾಗಿಲ್ಲ ಎಂದು ಅವರು ಸ್ಪಷ್ಟಪಡಿಸಿದ್ದಾರೆ.