ತೆಂಗಿನ ಮರ ಏರಿದ ಹುಡುಗನಿಗೆ ಪೊಲೀಸರ ಚಿತ್ರಹಿಂಸೆ

ಸುರಿ: ಪಶ್ಚಿಮ ಬಂಗಾಳದ ಸುರಿಯಲ್ಲಿರುವ ಪೊಲೀಸ್‌ ಅಧಿಕಾರಿಯ ಮನೆ ಕಾಂಪೌಂಡ್‌ ಒಳಗಿರುವ ತೆಂಗಿನ ಮರ ಏರಿದ 12 ವರ್ಷದ ಬುಡಕಟ್ಟು ಬಾಲಕ ಪೊಲೀಸರಿಂದ ಚಿತ್ರಹಿಂಸೆ ಅನುಭವಿಸಿ ಆಸ್ಪತ್ರೆ ಸೇರಿದ್ದಾನೆ.

ಗೊತ್ತಿಲ್ಲದೇ ಪೊಲೀಸ್‌ ಅಧಿಕಾರಿ ಮನೆಯ ಕಾಂಪೌಂಡ್‌ ಪ್ರವೇಶಿಸಿದ್ದ 4ನೇ ತರಗತಿ ಬಾಲಕನನ್ನು ಮೊದಲು ಅಧಿಕಾರಿಯ ಮನೆಯೊಳಗೆ ಕೂಡಿ ಹಾಕಲಾಗಿತ್ತು. ನಂತರ ಪೊಲೀಸ್‌ ಠಾಣೆಗೆ ಕರೆದೊಯ್ಯಲಾಗಿತ್ತು.

'ಗೆಳೆಯರ ಜತೆ ಶಾಲೆಯಿಂದ ವಾಪಸಾಗುತ್ತಿದ್ದ ಸಂದರ್ಭದಲ್ಲಿ ಆಟವಾಡುತ್ತಾ ಕಾಪೌಂಡ್‌ ಏರಿ, ತೆಂಗಿನ ಮರ ಹತ್ತಿದ್ದ. ನಂತರ ಅವನ ಸುಳಿವು ಇರಲಿಲ್ಲ. ರಾತ್ರಿ ಊಟಕ್ಕೂ ಇರಲಿಲ್ಲ. ಇದರಿಂದ ಆತಂಕಗೊಂಡಿದ್ದೆವು,'ಎಂದು ಸರಕಾರಿ ವಸತಿ ಗೃಹದ ಮುಖ್ಯಸ್ಥರು ಹೇಳಿದ್ದಾರೆ.

ಹುಡುಗನನ್ನು ಕಾಣಲು ಹಾಸ್ಟೆಲ್‌ ಸೂಪರಿಂಟೆಂಡೆಂಟ್‌ ಪೊಲೀಸ್‌ ಠಾಣೆಗೆ ತೆರಳಿದಾಗ, ವಿವಸ್ತ್ರನಾಗಿದ್ದ ಬಾಲಕ ನರಳಾಡುತ್ತಿದ್ದ. ಬಾಲಕನ ತಲೆಗೆ ಗಂಭೀರ ಸ್ವರೂಪದ ಪೆಟ್ಟು ಬಿದ್ದಿತ್ತು. ನಂತರ ಆತನನ್ನು ಆಸ್ಪತ್ರೆಗೆ ದಾಖಲಿಸಲಾಗಿದ್ದು, ಅಲ್ಲಿ ಆತನಿಗೆ ಚಿಕಿತ್ಸೆ ನೀಡಲಾಗುತ್ತಿದೆ.

ಪಶ್ಚಿಮ ಬಂಗಾಳದ ಮಹಿಳೆ ಮತ್ತು ಮಕ್ಕಳ ಕಲ್ಯಾಣ ಸಚಿವರಾದ ಶಶಿ ಪಂಜಾ ಈ ಬಗ್ಗೆ ವರದಿ ಕೋರಿದ್ದಾರೆ. ಈ ಮಧ್ಯೆ, ಬೀರ್‌ಭೂಮ್‌ ಪೊಲೀಸರು ತನಿಖೆ ಆರಂಭಿಸಿದ್ದಾರೆ.