ಮದ್ಯ ನಿಷೇಧ ನಾಡಿನಲ್ಲಿ ಕುಡಿತ: ಬಂಧಿತರಲ್ಲಿ ಮಾನಿನಿಯರ ಸಂಖ್ಯೆಯೇ ಹೆಚ್ಚು!

ಗುಜರಾತ್: ಗುಜರಾತ್‌ನ ಸೇವಾಸಿಯಲ್ಲಿರುವ ಫಾರಂ ಹೌಸ್‌ನಲ್ಲಿ ಮದ್ಯಪಾನದಲ್ಲಿ ತೊಡಗಿದ್ದ 261 ವ್ಯಕ್ತಿಗಳನ್ನು ಪೊಲೀಸರು ಬಂಧಿಸಿದ್ದಾರೆ. ಅಲೆಂಬಿಕ್ ಲಿ. ಕಂಪನಿಯ ವ್ಯವಸ್ಥಾಪಕ ಚಿರಾಯು ಅಮಿನ್, ಇಬ್ಬರು ಪ್ರಸಿದ್ಧ ಉದ್ಯಮಿಗಳು ಸೇರಿ 134 ಮಹಿಳೆಯರು, 125 ಪುರುಷರು ಹಾಗೂ ಇಬ್ಬರು ಬ್ರಿಟಿಷ್ ಪ್ರಜೆಗಳನ್ನು ಬಂಧಿಸಿ, ಶುಕ್ರವಾರ ಬೆಳಗ್ಗೆ ಜಾಮೀನು ಮೇಲೆ ಬಿಡುಗಡೆ ಮಾಡಲಾಯಿತು.
ಫಾರಂ ಹೌಸ್ ಮೇಲೆ ನಡೆಸಿದ ದಾಳಿಯಲ್ಲಿ 80 ಕಾರು ಹಾಗೂ 103 ಮದ್ಯ ಬಾಟಲ್‌ಗಳನ್ನು ವಶಪಡಿಸಿಕೊಳ್ಳಲಾಗಿದೆ ಎಂದು ವಡೋದರಾ ಎಸ್ ಪಿ ಸೌರಭ್ ತೊಲಂಬಿಯಾ ಹೇಳಿದ್ದಾರೆ.

ಗುಜರಾತಿನ ನಿಯಮದ ಪ್ರಕಾರ ಮದ್ಯಪಾನ ಕಾನೂನುಬಾಹಿರ ಚಟುವಟಿಕೆಯಾಗಿದ್ದು, ಮದ್ಯಪಾನ ಮಾಡಿದವರಿಗೆ 3 ವರ್ಷ ಜೈಲು ಶಿಕ್ಷೆ ವಿಧಿಸಲಾಗುವುದು. ಇದೀಗ ಫಾರಂ ಹೌಸ್‌ನ ಒಡೆಯ ಹಾಗೂ ಅಲ್ಲಿ ಪಾರ್ಟಿ ಆಯೋಜಿಸಿದವರನ್ನು ಮದ್ಯಪಾನ ನಿಷೇಧ ಕಾಯ್ದೆ ಅಡಿಯಲ್ಲಿ ಬಂಧಿಸಲಾಗಿದ್ದು ಅವರಿಗೆ ಜಾಮಿನು ರಹಿತ 10 ವರ್ಷ ಜೈಲು ಶಿಕ್ಷೆ ವಿಧಿಸಲಾಗುವುದು. ಪಾರ್ಟಿಗೆ ಮದ್ಯ ದೊರೆಕಿದ್ದು ಎಲ್ಲಿಂದ ಎಂಬುದರ ಕುರಿತು ತೀವ್ರ ತನಿಖೆ ನಡೆಯುತ್ತಿದೆ.