3.5 ಲಕ್ಷ ರೂ.ಗಳಿಗೆ ಮಾರಾಟವಾಗಲಿದ್ದ ಬಾಲಕಿಯ ರಕ್ಷಿಸಿದ ಪೊಲೀಸರು

ಹೊಸದಿಲ್ಲಿ: ಮೂರೂವರೆ ಲಕ್ಷ ರೂ.ಗಳಿಗೆ 'ಮಾರಾಟ'ವಾಗಲಿದ್ದ ಬಿಹಾರದ 15 ವರ್ಷ ಬಾಲಕಿಯೊಬ್ಬಳನ್ನು ಪೊಲೀಸರು 'ಖರೀದಿದಾರರ' ಸೋಗಿನಲ್ಲಿ ರಕ್ಷಿಸಿದರು.

ಮಧ್ಯವರ್ತಿಯೊಬ್ಬ ಬಾಲಕಿಯನ್ನು ಮದುವೆಯಾಗುವ ನೆಪದಲ್ಲಿ ಒಂದು ವರ್ಷದ ಹಿಂದೆ ದಿಲ್ಲಿಗೆ ಕರೆತಂದು ನಂತರ ವೇಶ್ಯಾವಾಟಿಕೆಗೆ ತಳ್ಳಿದ್ದ. ಒಬ್ಬ ಆರೋಪಿಯನ್ನು ಬಂಧಿಸಲಾಗಿದ್ದು, ಬಾಲಕಿಯನ್ನು ಮತ್ತೆ ಕುಟುಂಬದ ಜತೆ ಸೇರಿಸಲಾಗಿದೆ.

ಮಧ್ಯ ದಿಲ್ಲಿಯ ಕಮಲಾ ಮಾರ್ಕೆಟ್‌ ಪೊಲೀಸ್‌ ಠಾಣೆಯ ಮುಖ್ಯಾಧಿಕಾರಿಯನ್ನು ಮತ್ತೊಬ್ಬ ಡೀಲರ್‌ ಎಂದು ತಪ್ಪಾಗಿ ಭಾವಿಸಿ ಕರೆ ಮಾಡಿದ ಖದೀಮರು 'ಸುಂದರವಾದ ಅಪ್ರಾಪ್ತ ವಯಸ್ಸಿನ ಬಾಲಕಿ'ಯನ್ನು ಮಾರಾಟ ಮಾಡುವುದಾಗಿ ತಿಳಿಸಿದರು.

ನಂತರ ಪೊಲೀಸ್‌ ತಂಡವೊಂದು ವೇಶ್ಯಾಗೃಹದ ಮಾಲೀಕರ ಸೋಗಿನಲ್ಲಿ ಆರೋಪಿಯನ್ನು ಹಲವು ಬಾರಿ ಭೇಟಿಯಾಗಿ ಸೂಕ್ತ ಬಲೆ ಹೆಣೆದರು. ನಂತರ ಹೊಸದಿಲ್ಲಿ ರೈಲ್ವೇ ಸ್ಟೇಷನ್‌ ಬಳಿ ಆರೋಪಿಗಳನ್ನು ಬಂಧಿಸಲಾಯಿತು. ಆರೋಪಿಗಳನ್ನು ಅಮರ್‌ (24), ರಂಜಿತ್ ಶಾ (27) ಎಂದು ಗುರುತಿಸಲಾಗಿದ್ದು, ಇಬ್ಬರೂ ಬಿಹಾರದವರಾಗಿದ್ದಾರೆ.