ಹೊಸದಿಲ್ಲಿ: ರಾಷ್ಟ್ರ ರಾಜಧಾನಿ ದಿಲ್ಲಿಯಲ್ಲಿ ಕೊರೊನಾ ಅಬ್ಬರ ಜೋರಾಗಿದ್ದು ಇನ್ನೇನು ಕೆಲವೇ ದಿನಗಳಲ್ಲಿ ಮುಂಬಯಿಯನ್ನೂ ಮೀರಿಸುವ ಸಾಧ್ಯತೆ ಇದೆ. ಮಂಗಳವಾರ ದಿಲ್ಲಿಯಲ್ಲಿ ಸರಿಸರುಮಾರು 4 ಸಾವಿರ ಹೊಸ ಕೊರೊನಾ ವೈರಸ್‌ ಪ್ರಕರಣಗಳು ದೃಢಪಟ್ಟಿವೆ. ಇದು ದಿಲ್ಲಿಯಲ್ಲಿ ಮಾತ್ರವಲ್ಲ ರಾಜ್ಯವೊಂದರಲ್ಲಿ ಒಂದೇ ದಿನ ವರದಿಯಾದ ಗರಿಷ್ಠ ಪ್ರಕರಣವಾಗಿದೆ. ದಿಲ್ಲಿಗಿಂತ ದುಪ್ಪಟ್ಟು ಹೆಚ್ಚಿನ ಪ್ರಕರಣಗಳಿರುವ ಮಹಾರಾಷ್ಟ್ರದಲ್ಲಿಯೂ ಇಷ್ಟೊಂದು ಪ್ರಕರಣಗಳು ಒಂದೇ ದಿನ ವರದಿಯಾಗಿಲ್ಲ.

ದೇಶದ ಜೊತೆ ಹೋಲಿಸಿದರೆ ಸದ್ಯ ದಿಲ್ಲಿಯಲ್ಲಿ ಹೊಸ ಪ್ರಕರಣಗಳ ಸಂಖ್ಯೆ ದುಪ್ಪಟ್ಟು ವೇಗದಲ್ಲಿ ಏರುತ್ತಿದೆ. ಇಲ್ಲಿಯವರೆಗೆ ದಿಲ್ಲಿಯಲ್ಲಿ 66,602 ಕೋವಿಡ್‌ ಪ್ರಕರಣಗಳು ದೃಢಪಟ್ಟಿವೆ. ದೇಶದ ಅತೀ ದೊಡ್ಡ ಕೊರೊನಾ ಹಾಟ್‌ಸ್ಪಾಟ್‌ ಮುಂಬಯಿನಲ್ಲಿ 68,410 ಕೇಸ್‌ಗಳು ಖಚಿತವಾಗಿದ್ದು, ಮಂಗಳವಾರ ಇಲ್ಲಿ ಕೇವಲ 842 ಹೊಸ ಪ್ರಕರಣಗಳಷ್ಟೆ ವರದಿಯಾಗಿವೆ. ಹೀಗಾಗಿ ವಾಣಿಜ್ಯ ನಗರಿಯನ್ನೂ ರಾಷ್ಟ್ರ ರಾಜಧಾನಿ ಮೀರಿಸುವ ಹಾದಿಯಲ್ಲಿದೆ.

ದಿಲ್ಲಿಯಲ್ಲಿ ಹೀಗೊಂದು ಸೋಂಕಿನ ಸ್ಫೋಟ ಸಂಭವಿಸಲು ಕಾರಣ ಪರೀಕ್ಷೆಗಳ ಸಂಖ್ಯೆಯನ್ನು ಹೆಚ್ಚಿಸಿರುವುದು. ಕೆಲ ದಿನಗಳ ಹಿಂದೆ ದಿಲ್ಲಿಯಲ್ಲಿ ದಿನಕ್ಕೆ 5 - 7 ಸಾವಿರ ಪರೀಕ್ಷೆ ನಡೆಸಿದರೆ ಅದೇ ಹೆಚ್ಚು ಎನ್ನುವ ಪರಿಸ್ಥಿತಿ ಇತ್ತು. ಆದರೆ ಸುಪ್ರೀಂ ಕೋರ್ಟ್‌ನ ತರಾಟೆ, ಕೇಂದ್ರ ಸರಕಾರದ ಮಧ್ಯ ಪ್ರವೇಶದ ನಂತರ ಮಂಗಳವಾರ ಒಂದೇ ದಿನ 17,000 ಮಾದರಿಗಳನ್ನು ಪರೀಕ್ಷೆಗೆ ಒಳಪಡಿಸಲಾಗಿತ್ತು. ಹೀಗಾಗಿ ದೊಡ್ಡ ಸಂಖ್ಯೆಯಲ್ಲಿ ಪಾಸಿಟಿವ್‌ ಪ್ರಕರಣಗಳು ಪತ್ತೆಯಾಗಿವೆ. ಆದರೆ ಮುಂಬಯಿನಲ್ಲಿ ಬಹಳ ದೀರ್ಘ ಕಾಲದಿಂದ ದಿನಕ್ಕೆ ಅಂದಾಜು 4,500 ಸ್ಯಾಂಪಲ್‌ಗಳನ್ನು ಪರೀಕ್ಷೆಗೆ ಒಳಪಡಿಸಲಾಗುತ್ತಿದೆ.
ರಾಜ್ಯದ ಎಲ್ಲಾ ಮನೆಗಳಲ್ಲಿ ಜುಲೈ 6ರ ಒಳಗೆ ಸ್ಕ್ರೀನಿಂಗ್ ಮಾಡಲು ದಿಲ್ಲಿ ಸರ್ಕಾರ ನಿರ್ಧಾರ

ದಿಲ್ಲಿ ಬಿಟ್ಟರೆ ತೆಲಂಗಾಣದಲ್ಲಿಯೂ ಪ್ರಕರಣಗಳ ಸಂಖ್ಯೆ ತೀವ್ರವಾಗಿ ಏರಿಕೆಯಾಗುತ್ತಿದೆ. ತೆಲಂಗಾಣದಲ್ಲಿ ಮೊನ್ನೆ ಮೊನ್ನೆವರೆಗೂ ದಿನಕ್ಕೆ 500ಕ್ಕಿಂತ ಕಡಿಮೆ ಸ್ಯಾಂಪಲ್‌ಗಳನ್ನು ಪರೀಕ್ಷಿಸಲಾಗುತ್ತಿತ್ತು. ಹೀಗಾಗಿ ಕಡಿಮೆ ಸಂಖ್ಯೆಯ ಪಕರಣಗಳಷ್ಟೆ ವರದಿಯಾಗುತ್ತಿದ್ದವು. ಆದರೆ ಹೈಕೋರ್ಟ್‌ ಚಾಟಿ ಬೀಸಿದ ನಂತರ ಈಗ 3,000 ಸ್ಯಾಂಪಲ್‌ಗಳ ಪರೀಕ್ಷೆ ನಡೆಯುತ್ತಿದೆ (ಅದೂ ಕಡಿಮೆಯೇ). ಹೀಗಾಗಿ ಇಲ್ಲಿಯೂ ಈಗ ಹೆಚ್ಚೆಚ್ಚು ಪಾಸಿಟಿವ್‌ ಪ್ರಕರಣಗಳು ವರದಿಯಾಗುತ್ತಿವೆ. ಮಂಗಳವಾರ ಒಂದೇ ದಿನ ರಾಜ್ಯದಲ್ಲಿ 879 ಕೇಸ್‌ಗಳು ದೃಢಪಟ್ಟಿವೆ. ಹೀಗಾಗಿ ರಾಜ್ಯದ ಒಟ್ಟು ಪ್ರಕರಣಗಳ ಸಂಖ್ಯೆ 9,553ಕ್ಕೆ ಏರಿಕೆಯಾಗಿದೆ.

ಎಲ್ಲಾ ರಾಜ್ಯಗಳಿಗೆ ಹೋಲಿಸಿದರೆ ಪಾಸಿಟಿವ್‌ ಪ್ರಕರಣಗಳ ಸಂಖ್ಯೆ ತೆಲಂಗಾಣದಲ್ಲಿ ವೇಗವಾಗಿ ಏರಿಕೆಯಾಗುತ್ತಿದೆ. ರಾಜ್ಯದ ಪ್ರಕರಣಗಳ ಬೆಳವಣಿಗೆ ದರ ಶೇ. 8.5ರಷ್ಟಿದೆ.
ದಿಲ್ಲಿಯ ರೈಲ್ವೆ ಐಸೋಲೇಷನ್‌ ವಾರ್ಡ್‌ಗೆ ಮೊದಲ ಕೊರೊನಾ ಸೋಂಕಿತ ದಾಖಲು

ದಿಲ್ಲಿ, ತೆಲಂಗಾಣ ಮತ್ತು ತಮಿಳುನಾಡಿನಲ್ಲಿ ಮುಂದಿನ ದಿನಗಳಲ್ಲಿ ಹೆಚ್ಚಿನ ಪ್ರಕರಣಗಳು ವರದಿಯಾಗುವ ಎಲ್ಲಾ ಸಾಧ್ಯತೆಗಳು ಇವೆ. ಇದರ ಜೊತೆಗೆ ಉಳಿದ ರಾಜ್ಯಗಳೂ ಪರೀಕ್ಷೆಗಳ ಸಂಖ್ಯೆಯನ್ನು ಏರಿಕೆ ಮಾಡಿರುವುದರಿಂದ ಈ ರಾಜ್ಯಗಳಿಂದಲೂ ಹೆಚ್ಚಿನ ಪ್ರಕರಣಗಳು ವರದಿಯಾಗಲಿವೆ.

ಮುಂಬಯಿ ಮತ್ತು ಪುಣೆ ಕೊರೊನಾ ಶಂಕಿತರನ್ನು ತ್ವರಿತವಾಗಿ ಪರೀಕ್ಷೆಗೆ ಒಳಪಡಿಸಲು ರ‍್ಯಾಪಿಡ್ ಆಂಟಿಜೆನ್‌ ಟೆಸ್ಟ್‌ಗಳಿಗೆ ಮೊರೆ ಹೋಗಿವೆ. ಕೇವಲ 30 ನಿಮಿಷಗಳಲ್ಲೇ ಇವುಗಳ ಫಲಿತಾಂಶ ನೀಡಲಿವೆ. ಆರ್‌ಸಿ-ಪಿಸಿಆರ್ ಪರೀಕ್ಷೆ‌ಗೆ ಹೋಲಿಸಿದರೆ ಇವುಗಳ ಖರ್ಚು ಕೂಡ ಕಡಿಮೆ. ಕೇವಲ 450 ರೂಪಾಯಿಗೆ ಪರೀಕ್ಷೆ ಮುಗಿಯಲಿದೆ. ಇಲ್ಲಿಯೂ ಪರೀಕ್ಷೆಗಳ ಸಂಖ್ಯೆ ಹೆಚ್ಚು ಮಾಡಿದರೆ ಹೆಚ್ಚಿನ ಪಾಸಿಟಿವ್‌ ಪ್ರಕರಣಗಳು ವರದಿಯಾಗಲಿವೆ.