ವುಹಾನ್‌ನಿಂದ ಭಾರತಕ್ಕೆ ಕರೆತಂದು ಪ್ರತ್ಯೇಕ ನಿಗಾ ಘಟಕದಲ್ಲಿ ಇರಿಸಿದ್ದವರು ಇಂದು ಮನೆಗೆ

ಹೊಸದಿಲ್ಲಿ: ಚೀನಾದ ವುಹಾನ್‌ ನಗರದಿಂದ ಏರ್‌ಲಿಫ್ಟ್‌ ಮೂಲಕ ಕರೆ ತರಲಾದ ಭಾರತೀಯರ ಪೈಕಿ 406 ಜನರಿಗೆ ಕೊರೊನಾ ಸೋಂಕು ತಗುಲಿಲ್ಲ ಎನ್ನುವುದು ಖಚಿತಪಟ್ಟಿದ್ದು, ಅವರು ಸೋಮವಾರ ಮನೆಗೆ ಮರಳುವ ಸಾಧ್ಯತೆ ಇದೆ.

ಫೆ.1 ಮತ್ತು 2ರಂದು ಒಟ್ಟು 650 ಭಾರತೀಯರನ್ನು ಏರ್‌ ಇಂಡಿಯಾದ ವಿಶೇಷ ವಿಮಾನದಲ್ಲಿ ವುಹಾನ್‌ನಿಂದ ಹೊಸದಿಲ್ಲಿಗೆ ಕರೆತರಲಾಗಿತ್ತು. ಹರಿಯಾಣದ ಮನೇಸರ್‌ನಲ್ಲಿರುವ ಇಂಡೋ-ಟಿಬೆಟಿಯನ್‌ ಬಾರ್ಡರ್‌ ಪೊಲೀಸ್‌ ಶಿಬಿರದಲ್ಲಿಅವರನ್ನು ಪ್ರತ್ಯೇಕವಾಗಿ ಇರಿಸಿ ನಿಯಮಿತ ತಪಾಸಣೆ ಕೈಗೊಳ್ಳಲಾಗಿತ್ತು.

ಭಾನುವಾರ 406 ಜನರ ರಕ್ತಮಾದರಿಯ ಅಂತಿಮ ತಪಾಸಣೆ ನಡೆಸಲಾಗಿದ್ದು, ನೆಗೆಟಿವ್‌ ಎಂದು ವರದಿ ಬಂದಿದೆ. ಅಗತ್ಯ ಪ್ರಕ್ರಿಯೆಗಳನ್ನು ಪೂರೈಸಿದ ಬಳಿಕ ಅವರನ್ನು ಸೋಮವಾರ ಮನೆಗೆ ಕಳಿಸಲಾಗುವುದು ಎಂದು ಅಧಿಕಾರಿಗಳು ತಿಳಿಸಿದ್ದಾರೆ. ಸೋಂಕು ತಗುಲಿದ ಶಂಕೆ ಇರುವವರನ್ನು 14 ದಿನ ನಿಗಾದಲ್ಲಿಇರಿಸಲಾಗುತ್ತದೆ.

ಕೊರೋನಾ ವೈರಸ್‌: ಸಿಂಗಾಪುರ, ಕೌಲಲಾಂಪುರ, ಬ್ಯಾಂಕಾಕ್‌ ಪ್ರವಾಸ ರದ್ದು ಮಾಡುತ್ತಿರುವ ಪ್ರಯಾಣಿಕರು

ಚೀನಾದಲ್ಲಿಕೊರೊನಾ (ಕೋವಿಡ್‌-19) ಸೋಂಕಿನಿಂದ ಮೃತಪಟ್ಟವರ ಸಂಖ್ಯೆ 1,770ಕ್ಕೆ ಏರಿಕೆಯಾಗಿದೆ. ಈವರೆಗೆ ದೇಶದಲ್ಲಿ70,548ಜನರಿಗೆ ಸೋಂಕು ತಗುಲಿರುವುದು ದೃಢಪಟ್ಟಿದೆ. ಚೀನಾಕ್ಕೆ ವೈದ್ಯಕೀಯ ನೆರವು ಕಲ್ಪಿಸಲು ಭಾರತ ಮುಂದಾಗಿದ್ದು, ಶೀಘ್ರದಲ್ಲಿಯೇ ಔಷಧ ಹಾಗೂ ಇತರ ವೈದ್ಯಕೀಯ ಪರಿಕರಗಳನ್ನು ಕಳಿಸಿಕೊಡುವುದಾಗಿ ಸರಕಾರ ತಿಳಿಸಿದೆ.