ಪುಣೆಯ ಎನ್‌ಐವಿಯಿಂದ ಕೊರೊನಾ ಲಸಿಕೆ ಅಭಿವೃದ್ಧಿ; ಕೋತಿಗಳ ಮೇಲೆ ಮೊದಲು ಪ್ರಯೋಗ

ಪುಣೆ: ಕೊರೊನಾ ವೈರಸ್‌ಗೆ ಲಸಿಕೆ ಕಂಡುಹಿಡಿಯಲು ಇಡೀ ವಿಶ್ವದ ವಿಜ್ಞಾನಿಗಳು ಹಗಲು ರಾತ್ರಿ ಶ್ರಮಿಸುತ್ತಿದ್ದಾರೆ. ಭಾರತದಲ್ಲಿಯೂ ಲಸಿಕೆ ಅಭಿವೃದ್ಧಿ ಕಾರ್ಯ ಬಿರುಸಿನಿಂದ ಸಾಗಿದ್ದು, ಪುಣೆಯ ನ್ಯಾಷನಲ್‌ ಇನ್ಸ್ಟಿಟ್ಯೂಟ್‌ ಆಫ್‌ ವೈರಾಲಜಿ ಕೊರೊನಾ ಲಸಿಕೆಯ ಕ್ಲಿನಿಕಲ್‌ ಟ್ರಯಲ್‌ಗೆ ಮುಂದಾಗಿದೆ.

ಮೊದಲು ಪ್ರಾಣಿಗಳ ಮೇಲೆ ಕ್ಲಿನಿಕಲ್‌ ಟ್ರಯಲ್‌ಗೆ ಮುಂದಾಗಿರುವ ಎನ್‌ಐವಿಗೆ ಅರಣ್ಯ ಮಂತ್ರಾಲಯ ಗ್ರೀನ್‌ ಸಿಗ್ನಲ್‌ ನೀಡಿದ್ದು, ಮೂರರಿಂದ ನಾಲ್ಕು ವರ್ಷದ 30 ಕೋತಿಗಳನ್ನು ಎನ್‌ಐವಿಗೆ ಪರೀಕ್ಷೆಗಾಗಿ ನೀಡಲಾಗಿದೆ. ಭಾರತೀಯ ವೈದ್ಯಕೀಯ ಸಂಶೋಧನಾ ಮಂಡಳಿಯ ಭಾಗವಾಗಿರುವ ಎನ್‌ಐಎ ಕ್ಲಿನಿಕಲ್‌ ಟ್ರಯಲ್‌ನಲ್ಲಿ ಯಶಸ್ವಿಯಾಗುವ ವಿಶ್ವಾಸ ಹೊಂದಿದೆ.

ಕೋತಿಗಳನ್ನು ಪುಣೆಯ ವಡಗಾಂವ್‌ ಅರಣ್ಯ ವಲಯದಿಂದ ಎನ್‌ಐವಿಗೆ ಕಳುಹಿಸಲಾಗಿದೆ. ಎನ್‌ಐವಿ ಅಭಿವೃದ್ಧಿಪಡಿಸಿರುವ ಲಸಿಕೆಯನ್ನು ಕೋತಿಗಳ ಮೇಲೆ ಪ್ರಯೋಗ ಮಾಡಲಿ, ಅದಕ್ಕಾಗಿ ಸಂಸ್ಥೆಗೆ ಅನುಮತಿ ನೀಡಲಾಗಿದೆ. ಲಸಿಕೆ ಪ್ರಯೋಗದ ನಂತರವೂ ಕೋತಿಗಳ ಮೇಲೆ ನಿಗಾ ಇಡಬೇಕು ಎಂದು ಸೂಚಿಸಲಾಗಿದೆ ಎಂದು ಅರಣ್ಯ ಸಚಿವ ಸಂಜಯ್‌ ರಾಥೋಡ್‌ ಹೇಳಿದ್ದಾರೆ.

ಕೊರೊನಾ ವೈರಸ್ ಲಸಿಕೆ: ಸದ್ಯ ಈ ಲಸಿಕೆಗಳಿಗೆ ಭಾರೀ ಬೇಡಿಕೆ!

ಭಾರತದಲ್ಲಿ 11 ಕೊರೊನಾ ವೈರಸ್‌ನ ಪ್ರಯೋಗಗಳು ನಡೆಯುತ್ತಿದೆ. 14 ಕಡೆ ಲಸಿಕೆ ಅಭಿವೃದ್ಧಿಪಡಿಸಲಾಗುತ್ತಿದೆ. ಮುಂದಿನ ಮೂರರಿಂದ 6 ತಿಂಗಳಲ್ಲಿ ಕೊರೊನಾ ವೈರಸ್‌ ಲಸಿಕೆಯ ಮೊದಲ ಪ್ರಯೋಗ ನಡೆಯಲಿದೆ ಎಂದು ಕೇಂದ್ರ ಆರೋಗ್ಯ ಸಚಿವ ಹರ್ಷವರ್ಧನ್‌ ಸೋಮವಾರ ಹೇಳಿದ್ದರು.

ಇನ್ನು, ಜಗತ್ತಿನ ವಿವಿಧ ಕಡೆ ಕೊರೊನಾ ವಿರುದ್ಧ ಲಸಿಕೆ ಕಂಡುಹಿಡಿಯುವ ಕೆಲಸ ನಡೆಯುತ್ತಿದೆ. ಅನೇಕ ದೇಶಗಳಲ್ಲಿ ಕ್ಲಿನಿಕಲ್‌ ಟ್ರಯಲ್‌ ಕೂಡ ನಡೆಯುತ್ತಿದೆ. ಆದರೆ, ಇದುವರೆಗೂ ಯಾವ ಲಸಿಕೆಯ ಪ್ರಯೋಗವೂ ಭರವಸೆ ಮೂಡಿಸಿಲ್ಲ ಎಂದು ಹೇಳಲಾಗುತ್ತಿದ್ದು, ಪ್ರಯೋಗವನ್ನು ವಿಜ್ಞಾನಿಗಳು ಮುಂದುವರೆಸಿದ್ದಾರೆ.