ಉಚಿತ ಚಿಕಿತ್ಸೆ ನೀಡಿ ಮಾದರಿಯಾದ ಕಾರ್ಪೊರೇಟ್‌ ಆಸ್ಪತ್ರೆಗಳು

ಕೋಲ್ಕತ: ಕಾರ್ಪೊರೇಟ್‌ ಆಸ್ಪತ್ರೆಗಳೆಂದರೆ ದುಬಾರಿ ವೆಚ್ಚ, ಹೆಚ್ಚುವರಿ ಚಿಕಿತ್ಸೆಗೆ ಶಿಫಾರಸು ಎಂಬೆಲ್ಲ ದೂರುಗಳಿವೆ. ಆದರೆ ಕೋಲ್ಕತದಲ್ಲಿನ ಎರಡು ಕಾರ್ಪೋರೇಟ್ ಆಸ್ಪತ್ರೆಗಳು ಎರಡು ವಿಶೇಷ ಪ್ರಕರಣದಲ್ಲಿ ರೋಗಿಯ ಕಡೆಯಿಂದ ಒಂದು ರೂಪಾಯಿಯನ್ನೂ ಪಡೆಯದೆ ಉಚಿತ ಚಿಕಿತ್ಸೆ ನೀಡಿ ಮಾದರಿಯಾಗಿವೆ.

ಮೊದಲನೇ ಪ್ರಕರಣದಲ್ಲಿ ಆನಂದಪುರ ಫೋರ್ಟಿಸ್ ಆಸ್ಪತ್ರೆಗೆ ದಾಖಲಾಗಿದ್ದ ಶಿಕ್ಷಕ ದಿಲ್‌ಚಂದ್ ಸಿಂಗ್‌ಗೆ ಹೃದಯ ಕಸಿ ಮಾಡಬೇಕಾಗಿತ್ತು. ಅದಕ್ಕಾಗಿ ಬೆಂಗಳೂರಿನಿಂದ ಮೇ. 21ರಂದು ಗ್ರೀನ್ ಕಾರಿಡಾರ್ ಮೂಲಕ ಹೃದಯ ತರಿಸಿ ಕಸಿ ಶಸ್ತ್ರಚಿಕಿತ್ಸೆ ಮಾಡಲಾಗಿತ್ತು.

ಈ ಒಟ್ಟಾರೆ ಪ್ರಕ್ರಿಯೆಗೆ 18 ಲಕ್ಷ ರೂ. ವೆಚ್ಚವಾಗಿತ್ತು. ಆದರೆ ಫೋರ್ಟಿಸ್ ಆಸ್ಪತ್ರೆ ರೋಗಿ ಕಡೆಯಿಂದ 1 ರೂ. ಕೂಡ ಚಿಕಿತ್ಸಾ ವೆಚ್ಚ ಪಡೆದುಕೊಂಡಿಲ್ಲ. ಅಲ್ಲದೆ ಚಿಕಿತ್ಸೆಯ ಬಳಿಕ ಬೇಕಾಗುವ ಔಷಧವನ್ನೂ ಉಚಿತವಾಗಿ ಒದಗಿಸಿದೆ. ಅಲ್ಲದೆ ವೈದ್ಯರ ಸಲಹೆ ಸೂಚನೆ ವಿಡಿಯೋ ಕಾಲ್ ಮೂಲಕ ಪಡೆಯಲು ಆಸ್ಪತ್ರೆ ಆಡಳಿತ ಮಂಡಳಿ ದಿಲ್‌ಚಂದ್‌ಗೆ ಸ್ಮಾರ್ಟ್‌ಫೋನ್ ಕೂಡ ಒದಗಿಸಿದೆ.

ಮತ್ತೊಂದು ಪ್ರಕರಣದಲ್ಲಿ ಕಳೆದ ಏಪ್ರಿಲ್ 29ರಂದು ಅಪೋಲೊ ಗ್ಲೆನ್‌ಈಗಲ್ಸ್ ಆಸ್ಪತ್ರೆಗೆ ದಾಖಲಾಗಿದ್ದ ಮೊಹಮ್ಮದ್ ತಾರೆಕ್‌ ಎಂಬವರಿಗೆ ರಸ್ತೆ ಅಪಘಾತದಲ್ಲಿ ತಲೆಗೆ ಕಬ್ಬಿಣದ ಸರಳು ನುಗ್ಗಿತ್ತು.


ತಾರೆಕ್ ಜೀವಕ್ಕೇ ಅಪಾಯವಿದ್ದರೂ, ಆಪೋಲೊ ವೈದ್ಯರು ಸವಾಲಾಗಿ ಸ್ವೀಕರಿಸಿ ಚಿಕಿತ್ಸೆ ನೀಡಿ ಅವರ ಜೀವ ಉಳಿಸಿದ್ದಾರೆ. ಅಲ್ಲದೆ ಅಪಘಾತದಲ್ಲಿ ಮಾತನಾಡುವ ಶಕ್ತಿಯನ್ನೇ ಕಳೆದುಕೊಂಡಿದ್ದ ತಾರೆಕ್‌ಗೆ ಸ್ಪೀಚ್ ಥೆರಪಿ ಮತ್ತು ಫಿಸಿಯೋಥೆರಪಿ ಚಿಕಿತ್ಸೆ ನೀಡಿ ಗುಣಮುಖರನ್ನಾಗಿಸಿದ್ದಾರೆ. ಜತೆಗೆ ಯಾವುದೇ ಚಿಕಿತ್ಸೆಗೂ ಈವರೆಗೆ ಹಣ ಪಡೆದುಕೊಂಡಿಲ್ಲ ಎಂದು ತಾರೆಕ್ ಸಹೋದರ ಅಜೀಜುಲ್ ತಿಳಿಸಿದ್ದಾರೆ.

ಮೂಲ ವರದಿ