ಹೊಸದಿಲ್ಲಿ: ಮದುವೆ ಸ್ವರ್ಗದಲ್ಲಿ ನಿಶ್ಚಯವಾಗಿರುತ್ತದೆ ಎಂಬುದು ಅನೇಕರ ನಂಬಿಕೆ. ಆದರೆ ಮದುವೆ ಸ್ಥಳವನ್ನು ನಿರ್ಧರಿಸುವುದು ಮಾತ್ರ ಮನುಷ್ಯರೇ. ಇತ್ತೀಚಿಗೆ ವಿಭಿನ್ನ ರೀತಿಯಲ್ಲಿ ಮದುವೆಯಾಗುವುದು ಟ್ರೆಂಡ್‌ ಆಗುತ್ತಿದೆ. ಇಲ್ಲೊಂದು ಯುವ ಜೋಡಿಯು ಚಲಿಸುತ್ತಿರುವ ರೈಲಿನಲ್ಲಿ ಹೊಸ ಬಾಳಿಗೆ ಮುನ್ನುಡಿ ಬರೆದಿದೆ. ಇದಕ್ಕೆ ಉತ್ತರ ಭಾರತ ಯಾತ್ರೆ ಕೈಗೊಂಡಿರುವ ಬೆಂಗಳೂರಿನ ಆರ್ಟ್‌ ಆಫ್‌ ಲಿವಿಂಗ್‌ ಸ್ಥಾಪಕ ಶ್ರೀಶ್ರೀ ರವಿಶಂಕರ್‌ ಗುರೂಜಿ ಸಾಕ್ಷಿಯಾಗಿರುವುದು ಮತ್ತೊಂದು ವಿಶೇಷ.
ಫಾರ್ಮಾಸಿಸ್ಟ್‌ ಸಚಿನ್‌ ಕುಮಾರ್‌ ಮತ್ತು ತೆರಿಗೆ ಇಲಾಖೆಯ ಉದ್ಯೋಗಿ ಜ್ಯೋತ್ಸ್ನಾ ಸಿಂಗ್‌ ಪಟೇಲ್‌ ಅವರು ಉತ್ತರ ಪ್ರದೇಶದ ಗೋರಖ್‌ಪುರ ಮತ್ತು ಲಖನೌ ನಡುವೆ ಹೂವುಗಳಿಂದ ಶೃಂಗರಿಸಿದ ಚಲಿಸುವ ವಿಶೇಷ ರೈಲಿನಲ್ಲಿ ಸಪ್ತಪದಿ ತುಳಿದಿದ್ದಾರೆ.
ಉತ್ತರ ಪ್ರದೇಶದ ಕೌಸಂಬಿಯ ಉದಾನಿ ಖುರ್ದ್‌ ಹಳ್ಳಿಯ ನಿವಾಸಿಯಾಗಿರುವ ಕುಮಾರ್‌ ಪ್ರಸ್ತುತ ಬಾದೊಹಿನಲ್ಲಿ ಉದ್ಯೋಗ ಮಾಡುತ್ತಿದ್ದಾರೆ. ಪಟೇಲ್‌ ಕೇಂದ್ರ ತೆರಿಗೆ ಇಲಾಖೆಯ ನೌಕರರಾಗಿದ್ದಾರೆ. ಚಲಿಸುತ್ತಿರುವ ರೈಲಿನಲ್ಲಿ ಮದುವೆಯಾಗಿರುವುದು ಭಾರತದಲ್ಲಿ ಇದೇ ಮೊದಲು.
............
'ಜನರು ಸಾಲ-ಸೋಲ ಮಾಡಿ ಲಕ್ಷಾಂತರ ರೂಪಾಯಿ ಖರ್ಚು ಮಾಡಿ ಮದುವೆಯಾಗುವ ಬದಲು, ಈ ರೀತಿಯಾಗಿ ಸರಳವಾಗಿ ಮದುವೆಯಾಗುವುದು ಒಳ್ಳೆಯದು.'
- ಶ್ರೀಶ್ರೀ ರವಿಶಂಕರ್‌
'ಭಾರತೀಯ ರೈಲ್ವೆ ಇತಿಹಾಸದಲ್ಲೇ ಮೊದಲ ಬಾರಿಗೆ ಚಲಿಸುವ ರೈಲಿನಲ್ಲಿ ಮದುವೆ ನಡೆದಿದೆ, ಅದೂ ಶ್ರೀಶ್ರೀ ರವಿಶಂಕರ್‌ ಗುರೂಜಿ ಅವರ ಸಮ್ಮುಖದಲ್ಲಿ. ಹೊಸ ಜೋಡಿಗೆ ಶುಭಹಾರೈಕೆಗಳು.'
- ಪಿಯೂಶ್‌ ಗೋಯಲ್‌, ರೈಲ್ವೆ ಸಚಿವ