ದೇಶದಲ್ಲೀಗ 50 ಲಕ್ಷ ಮಂದಿ ಕೊರೊನಾದಿಂದ ಗುಣಮುಖ, ಅತೀ ವೇಗವಾಗಿ ರಿಕವರಿ!

ಹೊಸದಿಲ್ಲಿ: ದೇಶಾದ್ಯಂತ ಕೊರೊನಾ ಸೋಂಕಿನಿಂದ ಗುಣಮುಖರಾದವರ ಸಂಖ್ಯೆ ಅರ್ಧ ಕೋಟಿ ದಾಟಿದೆ. ಇದರೊಂದಿಗೆ ಕೋವಿಡ್‌-19 ಗುಣಮುಖ ದರ ಶೇ.82.58ಕ್ಕೆ ತಲುಪಿದೆ. ಜತೆಗೆ ಸಾವಿನ ಪ್ರಮಾಣವೂ ಶೇ. 1.57ಕ್ಕೆ ಇಳಿಮುಖವಾಗಿದೆ. ಕಳೆದ ಹನ್ನೊಂದು ದಿನಗಳಲ್ಲಿ ಒಟ್ಟು 10 ಲಕ್ಷ ಮಂದಿ ಕೊರೊನಾ ಸೋಂಕಿತರು ಚೇತರಿಸಿಕೊಳ್ಳುವ ಮೂಲಕ ಭಾರತದಲ್ಲಿ ಗುಣಮುಖ ರಾಗುತ್ತಿರುವವರ ಸಂಖ್ಯೆಯಲ್ಲಿ ಗಣನೀಯ ಹೆಚ್ಚಳವಾಗಿದೆ.

ಕೇಂದ್ರ ಆರೋಗ್ಯ ಸಚಿವಾಲಯ ಸೋಮವಾರ ಬೆಳಗ್ಗೆ ಬಿಡುಗಡೆ ಮಾಡಿರುವ ಅಂಕಿ-ಅಂಶದ ಪ್ರಕಾರ, ಜೂನ್‌ 3ರ ನಂತರ ಗುಣಮುಖರಾಗುತ್ತಿರುವವರ ಸಂಖ್ಯೆಯಲ್ಲಿ ನಿರಂತರವಾಗಿ ಹೆಚ್ಚಳವಾಗಿದೆ. ಇದುವರೆಗೂ ಒಟ್ಟು 50.17 ಲಕ್ಷ ಸೋಂಕಿತರು ಗುಣಮುಖರಾಗಿದ್ದಾರೆ. ಈ ಮಧ್ಯೆ, ದೇಶಾದ್ಯಂತ ಒಟ್ಟು ಸೋಂಕಿತರ ಸಂಖ್ಯೆ 60 ಲಕ್ಷ (60,74,702)ದಾಟಿದೆ.

11 ದಿನದ ಹಿಂದೆ ಭಾರತದಲ್ಲಿಕೊರೊನಾ ಸೋಂಕಿತರ ಸಂಖ್ಯೆ 50 ಲಕ್ಷ ದಾಟಿತ್ತು. 12 ದಿನದಲ್ಲಿ10 ಲಕ್ಷ ಪ್ರಕರಣಗಳು ದಾಖಲಾಗಿವೆ. ಪ್ರಕರಣಗಳ ಸಂಖ್ಯೆ ಮೊದಲ 1 ಲಕ್ಷ ತಲುಪಲು 110 ದಿನಗಳು ಹಿಡಿದಿತ್ತು. 10 ಲಕ್ಷದ ಗಡಿ ದಾಟಲು 59 ದಿನ ಹಿಡಿದಿತ್ತು. ಕೇವಲ 21 ದಿನದಲ್ಲಿ ಸೋಂಕಿತರ ಸಂಖ್ಯೆ 10ರಿಂದ 20 ಲಕ್ಷಕ್ಕೆ ಜಿಗಿದಿತ್ತು. 16 ದಿನದಲ್ಲಿ 20ರಿಂದ 30 ಲಕ್ಷದ ಗಡಿಗೆ ಜಿಗಿದಿತ್ತು. ನಂತರ ಕೇವಲ 13 ದಿನದಲ್ಲಿ 40 ಲಕ್ಷದ ಗಡಿ ದಾಟಿತ್ತು.

ದಿಗಂತದಲ್ಲಿ ಐದು ವರ್ಷ ಪೂರೈಸಿದ ಭಾರತದ ಆಸ್ಟ್ರೋಸ್ಯಾಟ್: ಇಸ್ರೋ ಸಂಭ್ರಮಾಚರಣೆ!

ಲಸಿಕೆ ಮಾಹಿತಿಗೆ ವೆಬ್‌ತಾಣ!
ಕೋವಿಡ್‌-19 ಲಸಿಕೆ ಅಭಿವೃದ್ಧಿ ವೇಗ ಪಡೆದ ಬೆನ್ನಲ್ಲೇ ಸರಕಾರ ಈ ಕುರಿತ ಸಂಶೋಧನೆ ಬಗ್ಗೆ ಸಮಗ್ರ ಮಾಹಿತಿಗಾಗಿ ಪ್ರತ್ಯೇಕ ವೆಬ್‌ ಪೋರ್ಟಲ್‌ ಆರಂಭಿಸಿದೆ. ಲಸಿಕೆಯ ಸ್ಥಿತಿಗತಿ ಹಾಗೂ ಸಂಶೋಧನೆಯ ಸ್ಥಿತಿ, ಕ್ಲಿನಿಕಲ್‌ ಟ್ರಯಲ್‌ ಹೀಗೆ ಎಲ್ಲದರ ಬಗ್ಗೆಯೂ ಇಲ್ಲಿ ಮಾಹಿತಿ ಪಡೆಯಬಹುದು.