ಗೋ ಕಲ್ಯಾಣಕ್ಕೆ ಗೋವುಗಳಿಂದಲೇ ನಿಧಿ ಸಂಗ್ರಹ

ಗಾಂಧಿ ನಗರ: ತಮ್ಮ ಕಲ್ಯಾಣಕ್ಕೆ ತಾವೇ ನಿಧಿ ಸಂಗ್ರಹಿಸಲು ಹೊರಟಿವೆ ಗುಜರಾತಿನ ಹಸುಗಳು. ಹೌದು ಗೋ ಮೂತ್ರ ಮತ್ತು ಸಗಣಿಯನ್ನು ಮಾರಿ, ರಾಜ್ಯದಲ್ಲಿರುವ ಗೋಶಾಲೆಗಳ ಪರಿಸ್ಥಿತಿಯನ್ನು ಸುಧಾರಿಸಲು ಮತ್ತು ಗೋ ಹತ್ಯೆಯನ್ನು ತಡೆಯಲು ಅಲ್ಲಿನ ಸರಕಾರ ನಿರ್ಧರಿಸಿದೆ.

ಜೀವ- ದಯಾ ಅನುಯಾಯಿಗಳಿಂದ ಪ್ರೇರಿತವಾಗಿರುವ ರಾಜ್ಯ ಸರಕಾರ, ಅಲ್ಲಿನ ಪಶುಶಾಲೆಗಳಲ್ಲಿ ಸಗಣಿ ಮತ್ತು ಗೋಮೂತ್ರದ ಬ್ಯಾಂಕ್‌ ಅನ್ನು ಆರಂಭಿಸಲಿದೆ. ಇದರಿಂದ ಸಂಗ್ರಹವಾಗುವ ಆದಾಯವನ್ನು ಲಕ್ಷಾಂತರ ಸಂಖ್ಯೆಯಲ್ಲಿರುವ ಬೀಡಾಡಿ ಹಸುಗಳನ್ನು ಪಾಲನೆ ಪೋಷಣೆಗಾಗಿ ಬಳಸಲು ಸರಕಾರ ಉದ್ದೇಶಿಸಿದೆ. ಆ ಮೂಲಕ ಹಸುಗಳನ್ನು ಕಸಾಯಿಖಾನೆಗೆ ಸಾಗಿಸುವುದನ್ನು ತಡೆಯುವ ಗುರಿ ಕಮಲ ಸರಕಾರದ್ದು.

ಸಂಗ್ರಹಿಸಿದ ಸಗಣಿ ಮತ್ತು ಮೂತ್ರವನ್ನು ಸಾವಯವ ಗೊಬ್ಬರ, ನೈಸರ್ಗಿಕ ಕೀಟನಾಶಕ ಮತ್ತು ಆಯುರ್ವೇದ ಉತ್ಪನ್ನಗಳನ್ನು ಉತ್ಪಾದಿಸುವ ಕಂಪನಿಗಳಿಗೆ ಕಚ್ಚಾ ವಸ್ತುವಾಗಿ ಮಾರಾಟ ಮಾಡಲಾಗುವುದು ಎಂದು ರಾಜ್ಯದ ಹಿರಿಯ ಸಚಿ ಭೂಪೇಂದ್ರ ಸಿಂಹ್ ಚುಡಾಸ್ಮಾ ತಿಳಿಸಿದ್ದಾರೆ.

ಪಶುಗಳನ್ನು ಬೀದಿಗೆ ಬಿಡುವವರ ಸಂಖ್ಯೆ ಅಧಿಕ:ರಾಜ್ಯದಲ್ಲಿ ಜಾನುವಾರುಗಳನ್ನು ತ್ಯಜಿಸುವವರ ಸಂಖ್ಯೆ ಹೆಚ್ಚುತ್ತಿದ್ದು, ಅವುಗಳಲ್ಲಿ ಹಾಲು ಕೊಡುವುದನ್ನು ಬಿಟ್ಟಿರುವ ಆಕಳುಗಳನ್ನು ಬೀದಿಗೆ ಬಿಡುವುದು ಜಾಸ್ತಿಯಾಗಿದೆ. ಒಣ ಮೇವಿನ ದರ 40 ಕೆಜಿಗೆ 200 ರೂಪಾಯಿಯಿಂದ 500 ರೂಪಾಯಿಗಳವರೆಗೆ ಏರಿಕೆಯಾಗಿದ್ದು ರೈತರು ಮೇವಿಗೆ ಭಾರಿ ಪ್ರಮಾಣದಲ್ಲಿ ಹಣ ಖರ್ಚು ಮಾಡಬೇಕಾಗುತ್ತದೆ ಎಂದು ಜೀವದಯಾ ಸಂಸ್ಥೆಯ ಸದಸ್ಯರು ಹೇಳುತ್ತಾರೆ.