ಇವಿಎಂ ಸರಿಯಾಗಿದೆ, ವಿಚಾರ ಇಲ್ಲಿಗೇ ಬಿಟ್ಟುಬಿಡಿ: ಇಸಿ

ಹೊಸದಿಲ್ಲಿ: ಚುನಾವಣೆ ಆಯೋಗ ನೀಡಿದ್ದ ಇಲೆಕ್ಟ್ರಾನಿಕ್ ಮತ ಯಂತ್ರ ಹ್ಯಾಕಿಂಗ್ ಸವಾಲು ಸ್ವೀಕರಿಸಿದ್ದ ರಾಷ್ಟ್ರೀಯ ಕಾಂಗ್ರೆಸ್ ಪಕ್ಷ (ಎನ್‌ಸಿಪಿ) ಮತ್ತು ಕಮ್ಯುನಿಸ್ಟ್ ಪಕ್ಷ (ಸಿಪಿಎಂ) ಹ್ಯಾಕ್ ಮಾಡಲು ನಿರಾಕರಿಸಿವೆ. ಇದರೊಂದಿಗೆ ಇವಿಎಂ ಹ್ಯಾಕಥಾನ್ ಪ್ರಕರಣ ಅಂತ್ಯಗೊಂಡಿದೆ.

ಶನಿವಾರ ನಿಗದಿಯಾಗಿದ್ದ ಇವಿಎಂ ಹ್ಯಾಕಿಂಗ್‌ ಸವಾಲನ್ನು ಸಿಪಿಎಂ ಮತ್ತು ಎನ್‌ಸಿಪಿ ಸ್ವೀಕರಿಸಿದ್ದವು. ಇವಿಎಂನಲ್ಲಿ ದೋಷವಿದೆ ಎಂದು ಪ್ರಬಲವಾಗಿ ಆರೋಪಿಸಿದ್ದ ಆಮ್ ಆದ್ಮಿ ಪಕ್ಷ, ಬಹುಜನ ಸಮಾಜವಾದಿ ಪಕ್ಷ ಮತ್ತು ಕಾಂಗ್ರೇಸ್ ಪಕ್ಷಗಳು ಸವಾಲು ಸ್ವೀಕರಿಸದೆ ಪಲಾಯನಗೈದಿದ್ದವು.

ಹ್ಯಾಕ್‌ ಮಾಡುವುದಕ್ಕಿಂತ ಇವಿಎಂ ಹೇಗೆ ಕಾರ್ಯಾಚರಿಸುತ್ತದೆ ಎಂಬುದನ್ನು ಅರಿಯಬೇಕಿತ್ತು. ಅದಕ್ಕಾಗಿ ಸವಾಲು ಸ್ವೀಕರಿಸಿದ್ದೆವು ಎಂದು ಸಿಪಿಎಂ ಹೇಳಿದೆ. ವಿದ್ಯನ್ಮಾನ ಮತ ಯಂತ್ರ ಹೇಗೆ ಕಾರ್ಯಾಚರಿಸುತ್ತದೆ ಎಂಬುದನ್ನು ಪ್ರಾತ್ಯಕ್ಷಿಕೆ ಸಹಿತ ಚುನಾವಣಾ ಆಯೋಗ ತೋರಿಸಿಕೊಟ್ಟಿದೆ. ಕೆಲವು ಪಕ್ಷಗಳ ತಾಂತ್ರಿಕ ಅನುಮಾನಗಳನ್ನು ಬಗೆಹರಿಸಿದೆ.

ಇವಿಎಂ ಹ್ಯಾಕಿಂಗ್ ಸವಾಲು ಅಂತ್ಯಗೊಂಡಿದೆ. ಇನ್ನು ಈ ವಿಚಾರವನ್ನು ಇಲ್ಲಿಗೆ ಬಿಟ್ಟುಬಿಡಿ. ಯಾರಿಗೂ ಮತ ಯಂತ್ರವನ್ನು ಹ್ಯಾಕ್ ಮಾಡಲು ಸಾಧ್ಯವಿಲ್ಲ ಎಂದು ಸಾಬೀತಾಗಿದೆ. ಇದು ಯಾರೊಬ್ಬರ ಗೆಲುವು ಅಥವಾ ಸೋಲು ಅಲ್ಲ. ಈ ಸವಾಲಿನಿಂದ ಮತದಾರರಿಗೆ ಇವಿಎಂಗಳ ಮೇಲೆ ವಿಶ್ವಾಸ ಮೂಡಿದೆ ಎಂದು ಇಸಿಯ ಮುಖ್ಯಸ್ಥ ನಸೀಮ್ ಜೈದಿ ತಿಳಿಸಿದ್ದಾರೆ.

ಏನಿದು ಪ್ರಕರಣ?:
ಪಂಚರಾಜ್ಯಗಳ ಚುನಾವಣೆಯಲ್ಲಿ ಬಿಜೆಪಿ ಅಭೂತಪೂರ್ವ ಯಶಸ್ಸು ಸಾಧಿಸುತ್ತಿದ್ದಂತೆ ಪ್ರತಿ ಪಕ್ಷಗಳು ಇವಿಎಂ ಮೇಲೆ ಅನುಮಾನ ವ್ಯಕ್ತ ಪಡಿಸಿದ್ದವು. ಮತಗಳು ಬಿಜೆಪಿಗೆ ಬೀಳುವಂತೆ ಯಂತ್ರವನ್ನು ಹ್ಯಾಕ್ ಮಾಡಲಾಗಿದೆ ಎಂದು ದೂರಿದ್ದವು. ಮೊದಲಿಗೆ ಬಿಎಸ್‌ಪಿ ನಾಯಕಿ ಮಾಯಾವತಿ ಇವಿಎಂನಲ್ಲಿ ದೋಷವಿದೆ ಎಂದು ಆರೋಪ ಹೊರಿಸಿದ್ದರು. ನಂತರ ದಿಲ್ಲಿ ಸಿಎಂ ಅರವಿಂದ ಕೇಜ್ರಿವಾಲ್‌ ಇವಿಎಂನಲ್ಲಿ ದೋಷವಿದೆ ಎಂದು ಆರೋಪಿಸಿದ್ದರು. ನಂತರ ಕಾಂಗ್ರೆಸ್ ಕೂಡ ಎಎಪಿ ಹಾದಿ ಹಿಡಿದಿತ್ತು. ಕೊನೆಗೆ ಚುನಾವಣೆ ಆಯೋಗ ಇವಿಎಂಗಳನ್ನು ಹ್ಯಾಕ್ ಮಾಡುವಂತೆ ಪ್ರತಿಪಕ್ಷಗಳಿಗೆ ಬಹಿರಂಗ ಸವಾಲು ಹಾಕಿತ್ತು.