ರಕ್ತ ಸಂಬಂಧ: ತಾಯಿ ಮಗುವಿನ ಪ್ರಾಣ ಉಳಿಸಿದ CRPF ಯೋಧ

ಹೊಸದಿಲ್ಲಿ: ಗಡಿ ಕಾಯುವ ಮೂಲಕ ಜನ್ಮಭೂಮಿಯ ಸೇವೆ ಮಾಡುವ ಸೈನಿಕನೊಬ್ಬ, ರಕ್ತದಾನ ಮಾಡುವ ಮೂಲಕ ನವಜಾತ ಶಿಶು ಮತ್ತು ತಾಯಿಯ ಜೀವ ಉಳಿಸುವ ಮೂಲಕ ಸಾಮಾಜಿಕ ಜಾಲತಾಣಗಳಲ್ಲಿ ಪ್ರಶಂಸೆಗೆ ಒಳಗಾಗಿದ್ದಾರೆ.

ಗುಲ್ಶಾನ್‌ ನಿವಾಸಿಯಾಗಿರುವ ಪರಿವಾರ ಸಿಆರ್‌ಪಿಎಫ್ ಸಹಾಯವಾಣಿ CRPF Madadgar ಬಳಿ ಸಹಾಯ ಯಾಚಿಸಿದ್ದರು.

ಮಗುವಿಗೆ ಜನ್ಮ ನೀಡಿದ 25 ವರ್ಷದ ತಾಯಿಗೆ ರಕ್ತಸ್ರಾವವಾಗಿ ಆಕೆ ಜೀವನ್ಮರಣದ ನಡುವೆ ಹೋರಾಡುತ್ತಿದ್ದಳು. ಆ ಸಂದರ್ಭದಲ್ಲಿ ಸಹಾಯಕ್ಕೆ ಬಂದ 53ನೇ ಬಟಾಲಿಯನ್ ಯೋಧ ಗೋಹಿಲ್ ಶೈಲೇಶ್ ತಮ್ಮ ರಕ್ತದಾನ ಮಾಡಿ ತಾಯಿ ಮಗುವಿಗೆ ಪುನರ್ಜನ್ಮ ನೀಡಿದ್ದಾರೆ.


ಸಿಆರ್‌ಪಿಎಫ್ ಅಧಿಕೃತ ಟ್ವಿಟರ್‌ನಲ್ಲಿ ಈ ಬಗ್ಗೆ 'ರಕ್ತ ಸಂಬಂಧ' ಎಂಬ ಶೀರ್ಷಿಕೆಯಡಿಯಲ್ಲಿ ಟ್ವೀಟ್ ಮಾಡಲಾಗಿದ್ದು ಫೋಟೋ ಸಮೇತ ಯೋಧನ ಮಹಾತ್ಕಾರ್ಯದ ಬಗ್ಗೆ ಬರೆಯಲಾಗಿದೆ.


ಯೋಧ ಮತ್ತು ನವಜಾತ ಶಿಶುವಿರುವ ಫೋಟೋದಡಿಯಲ್ಲಿ , ''ರಕ್ತ ನೀಡುವ ಮೂಲಕ ಮಗು ಮತ್ತು ತಾಯಿಯನ್ನು ಕಾಪಾಡಿದ, ಜೀವನಪೂರ್ತಿ ಇರುವ ಸಂಬಂಧವಿದು'' ಎಂದು ಬರೆಯಲಾಗಿದೆ.


ಈ ಟ್ವೀಟ್‌ ವೈರಲ್ ಆಗಿದ್ದು, ಟ್ವೀಟಿಗರಿಂದ ಭಾರಿ ಪ್ರತಿಕ್ರಿಯೆ ವ್ಯಕ್ತವಾಗುತ್ತಿದೆ.


ಕಾಶ್ಮೀರಿ ನಿವಾಸಿಗಳಿಗೆ ಆರೋಗ್ಯ ಸಂಬಂಧಿ ತೊಡಕು ಎದುರಾದರೆ ತಕ್ಷಣ ಸಹಾಯಕ್ಕೆ ಧಾವಿಸಲು ಸಿಆರ್‌ಪಿಎಫ್ ಸಹಾಯವಾಣಿ CRPF Madadgarನ್ನು 16 ಜೂನ್ , 2017ರಲ್ಲಿ ಆರಂಭಿಸಲಾಗಿತ್ತು.