ಕಾರ್ಪೋರೇಟ್‌ ತೆರಿಗೆ ಶೇ.25ಕ್ಕೆ ಇಳಿಕೆಗೆ ಶಿಫಾರಸು

ಹೊಸದಿಲ್ಲಿ: ಎಲ್ಲ ಕಂಪನಿಗಳಿಗೂ ಕಾರ್ಪೋರೇಟ್‌ ತೆರಿಗೆಯನ್ನು ಈಗಿನ ಶೇ.30ರಿಂದ 25ಕ್ಕೆ ಇಳಿಕೆ ಮಾಡುವಂತೆ ಸರಕಾರದ ಸಮಿತಿಯೊಂದು ಶಿಫಾರಸು ಮಾಡಿದೆ. ತೆರಿಗೆ ಪಾವತಿ ಮೇಲಿನ ಮೇಲ್ತೆರಿಗೆಗಳನ್ನು ವಜಾ ಮಾಡುವಂತೆಯೂ ಹೇಳಿದೆ. ಭಾರತವು ವಿಶ್ವದಲ್ಲಿಯೇ ಅತಿ ಹೆಚ್ಚಿನ ಕಾರ್ಪೋರೇಟ್‌ ತೆರಿಗೆ ವಿಧಿಸುವ ದೇಶವಾಗಿದೆ. ವಾರ್ಷಿಕ 400 ಕೋಟಿ ರೂ. ತನಕ ಮಾರಾಟ ವಹಿವಾಟು ನಡೆಸುವ ಕಂಪನಿಗಳಿಗೆ ಕಾರ್ಪೋರೇಟ್‌ ತೆರಿಗೆಯನ್ನು ಶೇ.30ರಿಂದ 25ಕ್ಕೆ ಇಳಿಕೆ ಮಾಡಲಾಗಿದೆ. ಬಜೆಟ್‌ನಲ್ಲಿ ವಿತ್ತ ಸಚಿವೆ ನಿರ್ಮಲಾ ಸೀತಾರಾಮನ್‌ ಈ ಕ್ರಮ ಕೈಗೊಂಡಿದ್ದರೂ, ಭಾರತವು ದುಬಾರಿ ಕಾರ್ಪೋರೇಟ್‌ ತೆರಿಗೆಯ ದೇಶವಾಗಿಯೇ ಉಳಿದಿದೆ. ಎಲ್ಲ ಕಂಪನಿಗಳಿಗೂ ಕಾರ್ಪೋರೇಟ್‌ ತೆರಿಗೆಯನ್ನು ಶೇ.25ಕ್ಕೆ ಇಳಿಕೆ ಮಾಡಬೇಕು ಎನ್ನುವ ಒತ್ತಾಯಗಳು ಉದ್ಯಮ ವಲಯದಿಂದ ಕೇಳಿ ಬರುತ್ತಿವೆ. ಏತನ್ಮಧ್ಯೆ, ಕೇಂದ್ರೀಯ ನೇರ ತೆರಿಗೆಗಳ ಮಂಡಳಿ ಸದಸ್ಯ ಅಖಿಲೇಶ್‌ ರಂಜನ್‌ ನೇತೃತ್ವದ ಸಮಿತಿಯು ಸೀತಾರಾಮನ್‌ಗೆ ಸೋಮವಾರ ವರದಿ ಸಲ್ಲಿಸಿದ್ದು, ತೆರಿಗೆ ಕಡಿತಕ್ಕೆ ಶಿಫಾರಸು ಮಾಡಿದ್ದಾರೆ ಎಂದು ಮೂಲಗಳು ಹೇಳಿವೆ. ಸರಕಾರವು ದೇಶೀಯ ಕಂಪನಿಗಳಿಗೆ ಶೇ.30ರಷ್ಟು ಮತ್ತು ವಿದೇಶಿ ಕಂಪನಿಗಳಿಗೆ ಶೇ.40ರಷ್ಟು ಕಾರ್ಪೋರೇಟ್‌ ತೆರಿಗೆಯನ್ನು ವಿಧಿಸುತ್ತದೆ. ಜೊತೆಗೆ ಶೇ.4ರಷ್ಟು ಆರೋಗ್ಯ ಮತ್ತು ಶಿಕ್ಷಣದ ಮೇಲ್ತೆರಿಗೆಯೂ ಇದೆ.