ಸೈಬರ್‌ ಸುರಕ್ಷತೆಗೆ ಸಿಬಿಎಸ್‌ಇ ಮಾರ್ಗದರ್ಶಿ ಸೂತ್ರ

ಹೊಸದಿಲ್ಲಿ: ಕಂಪ್ಯೂಟರ್‌ ಲ್ಯಾಬ್‌ಗಳಿಗೆ ಅನುಮತಿ ಮೇರಗಷ್ಟೇ ಪ್ರವೇಶ, ಪೆನ್‌ಡ್ರೈವ್‌ ನಿಷೇಧ, ಪಾಪ್‌ ಅಪ್‌ ವಿಂಡೋ ನಿರ್ಬಂಧ, ಡೆಸ್ಕ್‌ಟಾಪ್‌ ಮೇಲೆ ಹೊಸ ಐಕಾನ್‌ಗಳ ಮೇಲೆ ನಿಗಾ...ಇವು ಸೈಬರ್‌ ಭದ್ರತೆ ವಿಚಾರವಾಗಿ ಎನ್‌ಸಿಇಆರ್‌ಟಿ ಶಾಲೆಗಳು ಹಾಗೂ ಪೋಷಕರಿಗೆ ನೀಡಿರುವ ಮಾರ್ಗದರ್ಶಕ ಸೂತ್ರಗಳು.

ಸುರಕ್ಷಿತ, ಕಾನೂನುಬದ್ಧ ಮತ್ತು ನೈತಿಕ ರೀತಿಯಲ್ಲಿ ಇಂಟರ್‌ನೆಟ್‌ ಬಳಕೆ ಬಗ್ಗೆ ವಿದ್ಯಾರ್ಥಿಗಳನ್ನು ಉತ್ತೇಜಿಸುವಲ್ಲಿ ಪೋಷಕರು ಮತ್ತು ಶಿಕ್ಷಕರ ಪಾತ್ರಕ್ಕೆ ಒತ್ತು ನೀಡಿ ರಾಷ್ಟ್ರೀಯ ಶೈಕ್ಷಣಿಕ ಸಂಶೋಧನಾ ಮಂಡಳಿ (ಎನ್‌ಸಿಇಆರ್‌ಟಿ) ಈ ನಿರ್ದೇಶನ ಸೂತ್ರಗಳನ್ನು ಹೊರಡಿಸಿದೆ. ಇವುಗಳಲ್ಲಿ ಪ್ರಮುಖವಾದವುಗಳ ವಿವರ ಹೀಗಿದೆ:

* ಆನ್‌ಲೈನ್‌ ಮೂಲಕ ವಾದ-ವಿವಾದ, ರೇಗಿಸುವಿಕೆಗೆ ಮುಂದಾಗದಂತೆ ಮಕ್ಕಳಿಗೆ ಸೂಚಿಸುವುದು
* ಕೇವಲ ಆನ್‌ಲೈನ್‌ ಮೂಲಕ ಪರಿಚಯವಾದವರನ್ನು ಯಾವುದೇ ಕಾರಣಕ್ಕೂ ಭೇಟಿಯಾಗದಂತೆ ವಿದ್ಯಾರ್ಥಿಗಳಿಗೆ ಸೂಚಿಸಬೇಕು
* ವಿದ್ಯಾರ್ಥಿಗಳ ವರ್ತನೆ ಮತ್ತು ನಡೆ-ನುಡಿಯಲ್ಲಿನ ಬದಲಾವಣೆಯನ್ನು ಗಮನಿಸಬೆಕು
* ಬೇರೆಯವರ ಇ-ಮೇಲ್‌ಗೆ ಲಾಗಿನ್‌ ಆಗಿ ಓದುವುದು, ಬೇರೆಯವರ ಪ್ರೊಫೈಲ್‌ಗಳನ್ನು ದುರ್ಬಳಕೆ ಮಾಡುವುದು, ಬೇರೆಯವರ ಕಂಪ್ಯೂಟರ್‌ಗೆ ವೈರಸ್‌ ಹಬ್ಬಿಸುವುದು ಮುಂತಾದ ಕೆಲಸಗಳಿಂದ ವಿದ್ಯಾರ್ಥಿಗಳನ್ನು ದೂರವಿರಿಸುವುದು
* ಅಪರಿಚಿತ ಇ-ಮೇಲ್‌ಗಳಿಂದ ಅಟ್ಯಾಚ್‌ಮೆಂಟ್‌ಗಳನ್ನು ಡೌನ್‌ಲೋಡ್‌ ಮಾಡದಂತೆ ಸೂಚಿಸುವುದು
* ಸೈಬರ್‌ ಭದ್ರತೆ ಕುರಿತ ಪ್ರಮುಖ ವಿಷಯಗಳ ಬಗ್ಗೆ ವಿದ್ಯಾರ್ಥಿಗಳಿಗೆ ವಿಶೇಷ ಕೋರ್ಸ್‌ ಪರಿಚಯಿಸುವುದು
* ಸೈಬರ್‌ ಭದ್ರತೆ ಸಪ್ತಾಹಗಳನ್ನು ಆಚರಿಸಿ, ಮಕ್ಕಳಲ್ಲಿ ಜಾಗೃತಿ ಮೂಡಿಸುವುದು.