ಮಾರ್ಚ್ 22ರಿಂದ ಮತ್ತೆ ಹೆಡ್ಲಿ ವಿಚಾರಣೆ

ಮುಂಬಯಿ: 26/11 ಮುಂಬಯಿ ದಾಳಿಕೋರ ಅಬು ಜುಂದಾಲ್ ಪರ ವಕೀಲ ನಾಲ್ಕು ದಿನಗಳ ಕಾಲ ಉಗ್ರ ಡೇವಿಡ್ ಹೆಡ್ಲಿ ವಿಚಾರಣೆ ನಡೆಸಲಿದ್ದಾರೆ. ಮಾರ್ಚ್ 22ರಿಂದ ವಿಚಾರಣೆ ಆರಂಭವಾಗಲಿದೆ.

‘ಅಮೆರಿಕದ ರಹಸ್ಯ ಸ್ಥಳದಿಂದ ವಿಡಿಯೋ ಕಾನ್ಫ್‌ರೆನ್ಸ್ ಮೂಲಕ ಹೆಡ್ಲಿ ವಿಚಾರಣೆ ನಡೆಸಲಾಗುವುದು ಎಂದು ನ್ಯಾಯಾಲಯಕ್ಕೆ ತಿಳಿಸಿದ್ದೇವೆ. ಅದಕ್ಕೆ ಕೋರ್ಟ್ ಅನುಮತಿಯನ್ನೂ ನೀಡಿದೆ,’ ಎಂದು ವಿಶೇಷ ಸರಕಾರಿ ಅಭಿಯೋಜಕ ಉಜ್ವಲ್ ನಿಕಂ ಹೇಳಿದರು.

ಮುಂಬಯಿ ದಾಳಿ ಪ್ರಕರಣದಲ್ಲಿ ಅಪ್ರೂವರ್ ಆಗಿರುವ ಡೇವಿಡ್ ಹೆಡ್ಲಿ, ಒಂದು ವಾರ ಕಾಲ ಭಾರತದಿಂದ ವಿಚಾರಣೆ ಎದುರಿಸಿದ. ಫೆಬ್ರವರಿ 13ಕ್ಕೆ ಅದು ಮುಕ್ತಾಯಗೊಂಡಿದೆ. ಈ ವೇಳೆ, ಎಲ್‌ಇಟಿ, ಅಲ್ ಖಾಯಿದಾ ಮತ್ತು ಐಎಸ್‌ಐ ಭಾರತದ ವಿರುದ್ಧ ಸಂಚು ರೂಪಿಸಿ ದಾಳಿ ನಡೆಸಿದ ಬಗೆಯನ್ನು ವಿವರಿಸಿದ್ದ.

ಇದಕ್ಕೂ ಮೊದಲು, ಹೆಡ್ಲಿಯನ್ನು ಅಪ್ರೂವರ್ ಮಾಡಿರುವುದನ್ನು ವಿರೋದಿಸಿದ್ದ ಜುಂದಾಲ್ ಲಾಯರ್ ಅಬ್ದುಲ್ ವಹಾಬ್ ಖಾನ್, ನಾಲ್ಕು ದಿನ ಹೆಡ್ಲಿ ವಿಚಾರಣೆಗೆ ಅನುಮತಿ ಕೋರಿದ್ದು, ಕೋರ್ಟ್ ಹೆಡ್ಲಿ ವಿಚಾರಣೆಗೆ ಅನುಮತಿ ನೀಡಿದೆ.