ಹಾಡು ಕೇಳೋಕೆ ಹೆಡ್‌ಫೋನ್ ಕೊಟ್ರೆ ಮನೇಗೆ ಹೊತ್ತೊಯ್ದರು!

ಮುಂಬಯಿ: ಅತ್ಯಂತ ಅಗ್ಗದ ಟಿಕೆಟ್‌ ಕೊಟ್ಟು, ಹಾಡುಗಳನ್ನು ಕೇಳುತ್ತ, ಸಿನಿಮಾಗಳನ್ನು ನೋಡುತ್ತ ಆರಾಮವಾಗಿ ಪ್ರಯಾಣಿಸಿ ಎಂದು ರೈಲ್ವೇ ಇಲಾಖೆ ಹೆಡ್‌ಫೋನ್‌ಗಳನ್ನು ಕೊಟ್ಟರೆ, ಅವುಗಳನ್ನೇ ಹೊತ್ತೊಯ್ದಿದ್ದಾರೆ. ಜತೆಗೆ ಎಲ್‌ಇಡಿ ಸ್ಕ್ರೀನ್‌ಗಳನ್ನು ಹಾಳು ಮಾಡಿದ್ದಾರೆ. ಎಲ್ಲೆಂದರಲ್ಲಿ ಕಸ ಬಿಸಾಡಿದ್ದಾರೆ.

ಸೋಮವಾರ ಮುಂಬಯಿ ಛತ್ರಪತಿ ಶಿವಾಜಿ ರೈಲ್ವೇ ನಿಲ್ದಾಣದಲ್ಲಿ ಮುಂಬೈ-ಗೋವಾ ಸೂಪರ್‌ಫಾಸ್ಟ್ ರೈಲು ತೇಜಸ್‌ ಎಕ್ಸ್‌ಪ್ರೆಸ್‌ಗೆ ಕೇಂದ್ರ ಸಚಿವ ಸುರೇಶ್ ಪ್ರಭು ಚಾಲನೆ ನೀಡಿದ್ದರು. ಒಂದು ಸುತ್ತಿನ ಪ್ರಯಾಣ ಮುಗಿಸಿ ಹಿಂದಿರುಗಿದಾಗ ರೈಲಿನ ಸ್ಥಿತಿ ಅಸ್ಥವ್ಯಸ್ಥ. ಹಲವು ಹೆಡ್‌ಫೋನ್‌ಗಳು ಕಾಣೆಯಾಗಿದ್ದವು. ಎಲ್‌ಇಡಿ ಸ್ಕ್ರೀನ್‌ಗಳು ಜಖಂಗೊಂಡಿದ್ದವು. ಎಲ್ಲೆಂದರಲ್ಲಿ ಕಸ ಬಿದ್ದಿತ್ತು.

12 ಹೈ ಕ್ವಾಲಿಟಿ ಹೆಡ್‍ಫೋನ್‌ಗಳು, ಇನ್ಫೋಟೈನ್ಮೆಂಟ್ ಸಿಸ್ಟಂಗಳು ಕಳುವಾಗಿದ್ದರೆ, ಕೆಲವು ಸ್ಕ್ರೀನ್‍ಗಳು ಜಖಂಗೊಂಡಿರುವುದು ಅಧಿಕಾರಿಗಳ ಪರಿಶೀಲನೆ ವೇಳೆ ಕಂಡುಬಂದಿದೆ. ಮುಂದೆ ಇಂತಹ ಹಾನಿ ಮಾಡದಂತೆ ಪ್ರಯಾಣಿಕರಲ್ಲಿ ವಿನಂತಿಸಲು ರೈಲ್ವೇ ಅಧಿಕಾರಿಗಳು ಮುಂದಾಗಿದ್ದಾರೆ.

ರೈಲ್ವೇ ಅಧಿಕಾರಿಗಳು ಕಿಡಿಗೇಡಿ ಪ್ರಯಾಣಿಕರಿಂದ ಇಂತಹ ಕೃತ್ಯವನ್ನು ಊಹಿಸಿದ್ದರಾದರು, ಇಷ್ಟೊಂದು ಪ್ರಮಾಣದಲ್ಲಿ ಆಗಬಹುದು ಎಂದುಕೊಂಡಿರಲಿಲ್ಲ ಎಂದು ವಿಜಯ ಕರ್ನಾಟಕ ಸೋದರ ಪತ್ರಿಕೆ 'ಮುಂಬೈ ಮಿರರ್' ವರದಿ ಮಾಡಿದೆ.

ತೇಜಸ್ ಬಗ್ಗೆ ಒಂದಿಷ್ಟು
'ನೆಲದಲ್ಲಿ ಚಲಿಸುವ ವಿಮಾನ' ಖ್ಯಾತಿಯ ತೇಜಸ್‌ನಲ್ಲಿ ವಿಮಾನದಲ್ಲಿರುವ ಹೆಚ್ಚಿನ ಸೌಲಭ್ಯಗಳನ್ನು ನೀಡಲಾಗಿದೆ. ಸೀಟುಗಳಿಗೆ ಅಟ್ಯಾಚ್‌ಆಗಿರುವ ಎಲ್ಇಡಿ ಸ್ಕ್ರೀನ್‌ ಮತ್ತು ಹೆಡ್‌ಫೋನ್‌ಗಳು, ವೈಫೈ, ಸಿಸಿಟಿವಿ ಕ್ಯಾಮೆರಾಗಳು, ಟೀ/ಕಾಫಿ ವೆಂಡಿಂಗ್ ಯಂತ್ರಗಳು ಮುಂತಾದ ಸೌಲಭ್ಯಗಳನ್ನು ಕಲ್ಪಿಸಲಾಗಿದೆ. 200 ಕಿ.ಮೀ. ವೇಗದಲ್ಲಿ ಚಲಿಸುವ ರೈಲು 9 ಗಂಟೆಗಳಲ್ಲಿ ಮುಂಬೈ-ಗೋವಾ ನಡುವಣ 552 ಕಿ.ಮೀ ಕ್ರಮಿಸುತ್ತದೆ. 992 ಸೀಟುಗಳನ್ನು ಹೊಂದಿರುವ ಈ ರೈಲಿನಲ್ಲಿ ಟಿಕೆಟ್ ದರ ರೂ.1,185 ಮತ್ತು ಎಕ್ಸಿಕ್ಯೂಟಿವ್ ಕ್ಲಾಸ್ ಟಿಕೆಟ್ ಬೆಲೆ ರೂ.2,740.