ಮರಣದಂಡನೆ ಸಮ್ಮತಾರ್ಹವಲ್ಲ: ಪೋಪ್‌ ಫ್ರಾನ್ಸಿಸ್‌

ವ್ಯಾಟಿಕನ್‌ ಸಿಟಿ: ಅಪರಾಧಿಗಳಿಗೆ ಮರಣದಂಡನೆ ವಿಧಿಸುವುದು ಸಮ್ಮತಾರ್ಹವಲ್ಲ. ಗಲ್ಲು ಶಿಕ್ಷೆಯ ರದ್ಧತಿಗೆ ಕ್ಯಾಥೋಲಿಕ್‌ ಚರ್ಚ್‌ ವಿಶ್ವದಾದ್ಯಂತ ಆಂದೋಲನ ನಡೆಸಲಿದೆ ಎಂದು ಪೋಪ್‌ ಫ್ರಾನ್ಸಿಸ್‌ ಗುರುವಾರ ಹೇಳಿದ್ದಾರೆ.

ಕ್ಯಾಥೋಲಿಕ್‌ ಚರ್ಚ್‌ನ ಧರ್ಮ ಬೋಧನಾ ಮಾರ್ಗದರ್ಶಿ ಕ್ಯಾಥಿಸಮ್‌ನಲ್ಲಿ 1992ರಲ್ಲಿ ಮರಣದಂಡನೆ ಒಪ್ಪಿತಾರ್ಹ ಎಂಬ ಅಂಶ ಸೇರ್ಪಡಿಸಲಾಗಿತ್ತು. ನಂತರದಲ್ಲಿ ಈ ಬಗ್ಗೆ ಪರ-ವಿರೋಧ ಚರ್ಚೆಗಳು ನಡೆದಿದ್ದವು. ಇನ್ಮುಂದೆ ಈ ಮಾರ್ಗದರ್ಶಿಯಲ್ಲಿ ಮರಣದಂಡನೆ ಒಪ್ಪಿತಾರ್ಹವಲ್ಲ ಎಂಬ ವಿಚಾರ ಸೇರ್ಪಡೆಯಾಗಲಿದೆ. ''ವ್ಯಕ್ತಿ ಎಷ್ಟೇ ಕ್ರೂರ ಅಪರಾಧ ಮಾಡಿದ್ದರೂ ಗಲ್ಲು ಶಿಕ್ಷೆಯೆಂಬುದು ಆ ವ್ಯಕ್ತಿಯ ಘನತೆಗೆ ವಿರುದ್ಧವಾಗಿದೆ. ಹಾಗಾಗಿ ಇದು ಒಪ್ಪಿತವಲ್ಲ. ಇದರ ರದ್ಧತಿಗೆ ವಿಶ್ವದಾದ್ಯಂತ ಆಂದೋಲನ ನಡೆಸಲಾಗುವುದು,'' ಎಂದು ಪೋಪ್‌ ಫ್ರಾನ್ಸಿಸ್‌ ಹೇಳಿದ್ದಾರೆ. ಒಂದು ಅಂದಾಜಿನ ಪ್ರಕಾರ ಭಾರತವೂ ಸೇರಿದ 53 ದೇಶಗಳಲ್ಲಿ ಗಲ್ಲು ಶಿಕ್ಷೆ ಇಂದಿಗೂ ಕಾನೂನುಬದ್ಧವಾಗಿದೆ.