ಹೊಸದಿಲ್ಲಿ: 'ಖಿನ್ನತೆ ನನ್ನನ್ನು ಸಂಪೂರ್ಣ ಬಿಟ್ಟಿಲ್ಲ. ಖಿನ್ನತೆಯೊಂದಿಗಿನ ಅನುಭವ ಅದೆಷ್ಟು ಕರಾಳವಾಗಿತ್ತೆಂದರೆ ನನಗೆ ಸದಾ ಈ ಮಾನಸಿಕ ವ್ಯಾಧಿ ಮತ್ತೆ ಮರಳಿದರೆ ಎಂಬ ಆತಂಕ ಕಾಡುತ್ತದೆ,' ಎಂದು ಬಾಲಿವುಡ್‌ ತಾರೆ ದೀಪಿಕಾ ಪಡುಕೋಣೆ ಗುರುವಾರ ಹೇಳಿದ್ದಾರೆ.
ಭಾರತ ಆರ್ಥಿಕ ಸಮ್ಮೇಳನದಲ್ಲಿ ಮಾನಸಿಕ ಸಮಸ್ಯೆಗಳ ಕುರಿತು ಮಾತನಾಡಿದ 31 ವರ್ಷದ ನಟಿ, ದೇಶಾದ್ಯಂತ ಶಾಲೆಗಳ ಪಠ್ಯಪುಸ್ತಕಗಳಲ್ಲಿ ಮಾನಸಿಕ ಕಾಯಿಲೆಗಳ ಕುರಿತು ಮಾಹಿತಿ ನೀಡಬೇಕು. ಇದರಿಂದ, ದೈಹಿಕ ಕಾಯಿಲೆಗಳಂತೆಯೇ ಮಾನಸಿಕ ವ್ಯಾಧಿಯೂ ಸಾಮಾನ್ಯವಾದುದು ಎಂಬ ಅರಿವು ಎಲ್ಲರಲ್ಲಿ ಮೂಡಿಸುವ ಕಾರ್ಯವಾಗಬೇಕು ಎಂದು ಆಗ್ರಹಿಸಿದರು.
ಉದ್ಯೋಗ ಸ್ಥಳದಲ್ಲಿ ಉದ್ಯೋಗಿಗಳು ಖಿನ್ನತೆಯಿಂದ ಬಳಲುತ್ತಿದ್ದರೆ ಅದನ್ನು ಗುರುತಿಸಿ, ಅವರಿಗೆ ಚೇತರಿಸಿಕೊಳ್ಳಲು ಸಹಕಾರ ನೀಡಬೇಕು. ಕೆಲಸ ಕಳೆದುಕೊಳ್ಳುವ ಭಯವಿಲ್ಲದೆ ಉದ್ಯೋಗಿಗಳು ತಮ್ಮ ಸಮಸ್ಯೆಗಳನ್ನು ಹೇಳಿಕೊಳ್ಳುವಂತಾಗಬೇಕು ಎಂದು 'ದಿ ಲಿವ್‌ ಲವ್‌ ಲಾಫ್‌' ಫೌಂಡೇಶನ್‌ ಸಂಸ್ಥಾಪಕಿಯೂ ಆದ ಡಿಂಪಿ ಅಭಿಪ್ರಾಯಪಟ್ಟಿದ್ದಾರೆ.
ಮಾನಸಿಕ ಕಾಯಿಲೆಗಳ ಕುರಿತು ಜನರ ದೃಷ್ಟಿಯನ್ನು ಬದಲಾಯಿಸಬೇಕೆಂದೇ ತಾನು ತನ್ನ ಖಿನ್ನತೆ ಬಗ್ಗೆ ಬಹಿರಂಗವಾಗಿ ಹೇಳಿಕೊಂಡಿದ್ದಾಗಿ ಗುಳಿಕೆನ್ನೆ ಸುಂದರಿ ದೀಪಿಕಾ ಹೇಳಿದ್ದಾರೆ.