ಭದ್ರತಾ ಪಡೆಗಳಿಗೆ ಸಿಗ್‌ ಸಾವರ್‌ ರೈಫಲ್‌ ಬಲ

ಹೊಸದಿಲ್ಲಿ: ಸೇನೆಯನ್ನು ಆಧುನೀಕರಣಗೊಳಿಸುವ ನಿಟ್ಟಿನಲ್ಲಿ ಭಾರತ ಅಮೆರಿಕದಿಂದ ಅತ್ಯಾಧುನಿಕ ಸಿಗ್‌ ಸಾವರ್‌ ಅಸಾಲ್ಟ್‌ ರೈಫಲ್‌ಗಳನ್ನು ಖರೀದಿಸುತ್ತಿದ್ದು, ಸದ್ಯದಲ್ಲೇ ಅವು ಭಾರತೀಯ ಪಡೆಗಳ ಬತ್ತಳಿಕೆ ಸೇರಲಿವೆ.

ಅಮೆರಿಕದ ಸಿಗ್‌ ಸಾವರ್‌ ಕಂಪನಿಯು ಈ ಫೆಬ್ರವರಿಯಿಂದ ಒಂದು ವರ್ಷದ ಅವಧಿಯೊಳಗೆ 7.62 ಎಂಎಂನ 72,400 ಸಿಗ್‌ ಸಾವರ್‌ ಅಸಾಲ್ಟ್‌ ರೈಫಲ್‌ಗಳನ್ನು ಭಾರತಕ್ಕೆ ಪೂರೈಸಲಿದೆ. ರಕ್ಷಣಾ ಸಚಿವೆ ನಿರ್ಮಲಾ ಸೀತಾರಾಮನ್‌ ಅವರು ಕಳೆದ ತಿಂಗಳಷ್ಟೇ 700 ಕೋಟಿ ರೂ. ಮೊತ್ತದ ಈ ಖರೀದಿ ಗುತ್ತಿಗೆ ಒಪ್ಪಂದಕ್ಕೆ ಸಹಿ ಹಾಕಿದ್ದರು. ತ್ವರಿತಗತಿಯ ಖರೀದಿ ಪ್ರಕ್ರಿಯೆಯಡಿ(ಎಫ್‌ಟಿಪಿ) ಭಾರತ ಈ ಒಪ್ಪಂದ ಮಾಡಿಕೊಂಡಿದೆ.

ಭಾರತೀಯ ಪಡೆಗಳ ಬಳಿ ವಿವಿಧ ಬಗೆಯ ರೈಫಲ್‌ಗಳಿದ್ದರೂ ಹೆಚ್ಚು ಬಳಕೆಯಲ್ಲಿರುವುದು 5.56*45 ಎಂ.ಎಂ ಐಎನ್‌ಎಸ್‌ಎಎಸ್‌ ರೈಫಲ್‌ಗಳು. ಆಧುನಿಕ ತಂತ್ರಜ್ಞಾನಕ್ಕೆ ಹೋಲಿಸಿದರೆ ಇವುಗಳ ಸಾಮರ್ಥ್ಯ‌ ಅಷ್ಟೇನೂ ಪರಿಣಾಮಕಾರಿಯಲ್ಲ. ಹೀಗಾಗಿಯೇ ಇವುಗಳನ್ನು ಬದಲಿಸಿ ಗರಿಷ್ಠ ಸಾಮರ್ಥ್ಯ‌ದ ರೈಫಲ್‌ಗಳನ್ನು ಖರೀದಿಸಬೇಕೆಂಬ ಒತ್ತಡ ಕೇಳಿಬಂದಿತ್ತು.

7.62 ಎಂ.ಎಂ ರೈಫಲ್‌ಗಳ ಖರೀದಿಯಿಂದ ಸಮರ ಸಾಮರ್ಥ್ಯ‌ ಹೆಚ್ಚಲಿದೆ. ಪ್ರಾರಂಭಿಕ ಹಂತದಲ್ಲಿ ಇವುಗಳನ್ನು ಚೀನಾ ಗಡಿಯಲ್ಲಿ ನಿಯೋಜನೆಗೊಂಡಿರುವ ಯೋಧರಿಗೆ ನೀಡಲಾಗುವುದು ಎಂದು ಮೂಲಗಳು ತಿಳಿಸಿವೆ. ಒಂದೂವರೆ ವರ್ಷದ ಹಿಂದೆ ಇಶಾಪೋರ್‌ನಲ್ಲಿರುವ ಸರಕಾರಿ ಸ್ವಾಮ್ಯದ ರೈಫಲ್‌ ಫ್ಯಾಕ್ಟರಿ ತಯಾರಿಸಿದ್ದ ರೈಫಲ್‌ಗಳು ಪ್ರಾಯೋಗಿಕ ಪರೀಕ್ಷೆಯಲ್ಲಿ ವಿಫಲವಾಗಿದ್ದರಿಂದ ಇವುಗಳನ್ನು ಸೇನೆ ನಿರಾಕರಿಸಿತ್ತು. ಇದಾದ ಬಳಿಕ ರಕ್ಷಣಾ ಸಚಿವಾಲಯ ರೈಫಲ್‌ಗಳ ಖರೀದಿಗೆ ಅಂತಾರಾಷ್ಟ್ರೀಯ ಮಾರುಕಟ್ಟೆಯ ಮೊರೆ ಹೋಗಿತ್ತು.

ಸಂಪೂರ್ಣ ಖಾತ್ರಿ ಇಲ್ಲ: ರಷ್ಯಾದಿಂದ ಭಾರತ ಖರೀದಿಸುತ್ತಿರುವ ಎಸ್‌-400 ಟ್ರಯಂಫ್‌ ಕ್ಷಿಪಣಿ ಪ್ರತಿಬಂಧಕ ವ್ಯವಸ್ಥೆಗೆ ಆ ದೇಶದಿಂದ ಸಂಪೂರ್ಣ ಸಾರ್ವಭೌಮ ಖಾತ್ರಿ (ಸಾವರಿನ್‌ ಗ್ಯಾರಂಟಿ) ಇಲ್ಲ ಎಂದು ವಾಯುಪಡೆ ಮೂಲಗಳು ಹೇಳಿವೆ. ತಾಂತ್ರಿಕ ಮತ್ತು ಆಡಳಿತಾತ್ಮಕ ಸಮಸ್ಯೆ ಸೃಷ್ಟಿಗೆ ಕಾರಣವಾಗುವ ಸಂಸ್ಥೆ/ವ್ಯಕ್ತಿಯನ್ನು ಆ ಕ್ಷಣದಿಂದ ಹೊಣೆಗಾರಿಕೆಯಿಂದ ಹೊರಗಿರಿಸುವುದು ಸಾರ್ವಭೌಮ ಖಾತ್ರಿ ಎನಿಸಿಕೊಳ್ಳುತ್ತದೆ.

72,400 ಭಾರತ ಖರೀದಿಸಲಿರುವ ಸಿಗ್‌ ಸಾವರ್‌ ರೈಫಲ್‌ಗಳ ಸಂಖ್ಯೆ

700 ಕೋಟಿ ರೂ. ಖರೀದಿ ಗುತ್ತಿಗೆ ಮೊತ್ತ

ಮೊದಲು ಎಲ್ಲಿಗೆ?
ಚೀನಾ ಗಡಿಯಲ್ಲಿ ನಿಯೋಜನೆಗೊಂಡಿರುವ ಯೋಧರಿಗೆ.