ಡಿ.22ಕ್ಕೆ ಮೈಕೆಲ್‌ ಜಾಮೀನು ಅರ್ಜಿ ತೀರ್ಪು

ಹೊಸದಿಲ್ಲಿ: ಬಹುಕೋಟಿ ವಿವಿಐಪಿ ಕಾಪ್ಟರ್‌ ಹಗರಣದ ಮಧ್ಯವರ್ತಿ ಕ್ರಿಶ್ಚಿಯನ್‌ ಮೈಕೆಲ್‌ ಅವರ ಜಾಮೀನು ಅರ್ಜಿಯ ತೀರ್ಪನ್ನು ದಿಲ್ಲಿ ಕೋರ್ಟ್‌ ಡಿ.22ಕ್ಕೆ ಕಾಯ್ದಿರಿಸಿದೆ.

ಕ್ರಿಶ್ಚಿಯನ್‌ ಮೈಕೆಲ್‌ ಅವರ 15 ದಿನಗಳಿಂದ ಸಿಬಿಐ ವಶದಲ್ಲಿದ್ದು, ಅವರನ್ನು ಬಂಧನದಲ್ಲಿರಿಸಿ ವಿಚಾರಣೆ ನಡೆಸುವ ಅಗತ್ಯವಿಲ್ಲ. ಅವರನ್ನು ಕಸ್ಟಡಿಯಲ್ಲಿ ಮುಂದುವರಿಸುವದರಿಂದ ಯಾವುದೇ ಉದ್ದೇಶ ಸಾಧನೆಯಾಗುವುದಿಲ್ಲ,''ಎಂದು ವಿಶೇಷ ನ್ಯಾಯಾಧೀಶ ಅರವಿಂದ್‌ ಕುಮಾರ್‌ ಅವರ ಮುಂದೆ ಮೈಕೆಲ್‌ ಪರ ವಕೀಲರು ವಾದಿಸಿರು.

ಆದರೆ ಜಾಮೀನಿಗೆ ಸಿಬಿಐ ಆಕ್ಷೇಪ ವ್ಯಕ್ತಪಡಿಸಿತು. ಕಷ್ಟಪಟ್ಟು ದುಬೈನಿಂದ ಭಾರತಕ್ಕೆ ಗಡಿಪಾರು ಮಾಡಿಸಿಕೊಂಡಿದ್ದೇವೆ. ಜಾಮೀನು ನೀಡಿದರೆ ಮತ್ತೆ ಮೈಕೆಲ್‌ ದೇಶ ಬಿಟ್ಟು ಹೋಗುವ ಸಾಧ್ಯತೆಯಿದೆ ಎಂದು ಅಧಿಕಾರಿಗಳು ಆತಂಕ ವ್ಯಕ್ತಪಡಿಸಿದರು. ಅಲ್ಲದೆ, ಮೈಕೆಲ್‌ ಪ್ರಭಾವಿ ವ್ಯಕ್ತಿಯಾಗಿದ್ದು, ಸಚಿವಾಲಯಗಳು ಹಲವು ಅಧಿಕಾರಿಗಳು ಹಾಗೂ ಸಾಕ್ಷಿಗಳ ಜತೆ ನಂಟು ಹೊಂದಿದ್ದಾರೆ. ಇದರಿಂದ ಜಾಮೀನು ನೀಡಬಾರದೆಂದು ವಾದಿಸಿದರು.

ನ್ಯಾಯಾಂಗ ಬಂಧನ ವಿಸ್ತರಣೆ: ಈ ಮಧ್ಯೆ ದಿಲ್ಲಿ ಕೋರ್ಟ್‌ ಕ್ರಿಶ್ಚಿಯನ್‌ ಮೈಕೆಲ್‌ ಅವರ ನ್ಯಾಯಾಂಗ ಬಂಧನವನ್ನು ಡಿ.28ರವರೆಗೂ ವಿಸ್ತರಿಸಿದೆ. ಸಿಬಿಐ ಕಸ್ಟಡಿ ಅಂತ್ಯಗೊಂಡ ಹಿನ್ನೆಲೆಯಲ್ಲಿ ಸೋಮವಾರ ಅವರನ್ನು ವಿಶೇಷ ನ್ಯಾಯಾಧೀಶ ಅರವಿಂದ್‌ ಕುಮಾರ್‌ ಅವರ ಮುಂದೆ ಹಾಜರುಪಡಿಸಲಾಯಿತು.