ಆ್ಯಪ್ನಗರ

ಕಚೇರಿ ತೆರವು ಮಾಡಲು ನ್ಯಾಷನಲ್‌ ಹೆರಾಲ್ಡ್‌ಗೆ ಆದೇಶ: ರಾಹುಲ್ ಗಾಂಧಿಗೆ ಹಿನ್ನೆಡೆ

ಸಂಸ್ಥೆ ಸ್ವಾಧೀನದ ನೆಪದಲ್ಲಿ ಹಣಕಾಸಿನ ಭಾರೀ ಗೋಲ್‌ಮಾಲ್‌ ನಡೆಸಲಾಗಿದೆ ಎನ್ನುವ ವಾದವನ್ನು ಎತ್ತಿ ಹಿಡಿದು, ನ್ಯಾಷನಲ್‌ ಹೆರಾಲ್ಡ್‌ ಕಚೇರಿ ತೆರವಿಗೆ ದಿಲ್ಲಿ ಹೈಕೋರ್ಟ್‌ ಆದೇಶ ನೀಡಿತ್ತು.

Vijaya Karnataka 1 Mar 2019, 7:47 am
ಹೊಸದಿಲ್ಲಿ: ಕಟ್ಟಡದ ಗುತ್ತಿಗೆ ರದ್ದುಗೊಳಿಸಿದ್ದನ್ನು ಪ್ರಶ್ನಿಸಿ ನ್ಯಾಷನಲ್‌ ಹೆರಾಲ್ಡ್‌ ನ ಪ್ರಕಾಶನ ಸಂಸ್ಥೆ ಅಸೋಸಿಯೇಟೆಡ್‌ ಜರ್ನಲ್ಸ್‌ (ಎಜೆಎಲ್‌) ಸಲ್ಲಿಸಿದ್ದ ಮನವಿಯನ್ನು ದಿಲ್ಲಿ ಹೈಕೋರ್ಟ್‌ ಗುರುವಾರ ತಳ್ಳಿಹಾಕಿದೆ. ಹೀಗಾಗಿ ಕಟ್ಟಡ ತೆರವುಗೊಳಿಸುವುದು ಎಜೆಎಲ್‌ಗೆ ಅನಿವಾರ್ಯವಾಗಿದೆ.
Vijaya Karnataka Web national


ಮುಖ್ಯ ನ್ಯಾಯಮೂರ್ತಿ ರಾಜೇಂದ್ರ ಮೆನನ್‌ ಮತ್ತು ನ್ಯಾಯಮೂರ್ತಿ ವಿ.ಕೆ.ರಾವ್‌ ಅವರನ್ನು ಒಳಗೊಂಡ ಪೀಠ ಈ ಆದೇಶ ನೀಡಿದೆ. ''ಈ ವಿಚಾರದಲ್ಲಿ ಗೋಲ್‌ಮಾಲ್‌ ನಡೆದಿಲ್ಲ ಎನ್ನುವುದಕ್ಕೆ ಪ್ರಬಲ ಸಾಕ್ಷ್ಯಾಧಾರಗಳು ಒದಗಿಸದ ನೀವು ಈ ಕೂಡಲೇ ಕಚೇರಿ ಖಾಲಿ ಮಾಡಬೇಕು,'' ಎಂದು ನ್ಯಾಯಪೀಠ ಆದೇಶಿಸಿತು. ಎರಡು ವಾರಗಳ ಕಾಲಾವಕಾಶ ಕೋರಿ ಎಜೆಎಲ್‌ ವಕಿಲರು ಮಾಡಿದ ಮನವಿಯನ್ನೂ ತಿರಸ್ಕರಿಸಲಾಯಿತು.

ಕಾಂಗ್ರೆಸ್‌ ಅಧ್ಯಕ್ಷ ರಾಹುಲ್‌ ಗಾಂಧಿ ಮತ್ತು ಅವರ ತಾಯಿ ಸೋನಿಯಾ ಗಾಂಧಿ ಅವರೊಂದಿಗೆ ತಳುಕು ಹಾಕಿಕೊಂಡಿರುವ ಈ ಪ್ರಕರಣದ ವಿಚಾರಣೆಯನ್ನು ಮೊದಲು ಏಕ ಸದಸ್ಯ ಪೀಠ ನಡೆಸಿತ್ತು. ಸಂಸ್ಥೆ ಸ್ವಾಧೀನದ ನೆಪದಲ್ಲಿ ಹಣಕಾಸಿನ ಭಾರೀ ಗೋಲ್‌ಮಾಲ್‌ ನಡೆಸಲಾಗಿದೆ ಎನ್ನುವ ವಾದವನ್ನು ಎತ್ತಿ ಹಿಡಿದು, ಕಚೇರಿ ತೆರವಿಗೆ ಆದೇಶ ನೀಡಿತ್ತು.

ಏನಿದು ಗೋಲ್‌ಮಾಲ್‌?

ಸರಕಾರಿ ಸ್ವತ್ತಿನ ಲಾಭ ಪಡೆದುಕೊಂಡಿದ್ದ ಎಜೆಎಲ್‌ ಪ್ರಕಾಶನ ಸಂಸ್ಥೆ ನಷ್ಟದ ನೆಪ ಹೇಳಿಕೊಂಡು ಗಾಂಧಿ ಕುಟುಂಬ ಒಡೆತನದ ಯಂಗ್‌ ಇಂಡಿಯಾ ಸಂಸ್ಥೆಗೆ ತನ್ನ 99 ಪರ್ಸೆಂಟ್‌ ಷೇರುಗಳನ್ನು ವರ್ಗಾವಣೆ ಮಾಡಿತ್ತು. ಈ ವೇಳೆ, ಎಜೆಎಲ್‌ ಸಂಸ್ಥೆ ಹೊಂದಿದ್ದ 413.40 ಕೋಟಿ ರೂ. ಮೌಲ್ಯದ ಸ್ವತ್ತಿನ ಬಗ್ಗೆ ಯಾವುದೇ ಪ್ರಸ್ತಾಪ ಮಾಡದೇ ರಹಸ್ಯವಾಗಿ ಯಂಗ್‌ ಇಂಡಿಯಾಗೆ ವರ್ಗಾಯಿಸಲಾಗಿತ್ತು. ಇದಾಗಿ ಎನ್‌ಡಿಎ ಸರಕಾರ ಈ ಪ್ರಕರಣದ ಒಳ ಮರ್ಮ ಅರಿತು ಕ್ರಮಕ್ಕೆ ಮುಂದಾಯಿತು. ನ್ಯಾಷನಲ್‌ ಹೆರಾಲ್ಡ್‌ಗೆ ನೀಡಿದ್ದ ಐಟಿಒ ಸ್ವತ್ತಿನ 56 ವರ್ಷಗಳ ಗುತ್ತಿಗೆ ಕರಾರು ಪೂರ್ಣಗೊಂಡ ಹಿನ್ನೆಲೆಯಲ್ಲಿ ಮರು ಗುತ್ತಿಗೆ ರದ್ದುಗೊಳಿಸಿತ್ತು. ಇದನ್ನು ಪ್ರಶ್ನಿಸಿ ಎಜೆಎಲ್‌ ಕಾನೂನು ಹೋರಾಟಕ್ಕಿಳಿದು ಮುಖಭಂಗ ಅನುಭವಿಸಿತು.

ಮುಂದಿನ ಲೇಖನ

Vijay Karnataka News App: ನಿಮ್ಮ ಸುತ್ತಮುತ್ತಲು ನಡೆಯುವ ವಿದ್ಯಮಾನಗಳನ್ನುಹಂಚಿಕೊಳ್ಳಲು ಬಯಸುತ್ತೀರಾ? ಹಾಗಿದ್ದಲ್ಲಿ ವಿಜಯ ಕರ್ನಾಟಕ ಆ್ಯಪ್‌ಡೌನ್‌ಲೋಡ್‌ ಮಾಡಿಕೊಳ್ಳಿ ಹಾಗೂ ರಿಪೋರ್ಟ್‌ ಕಳಿಸಿ
ಲೇಟೆಸ್ಟ್‌ ನ್ಯೂಸ್‌ ಅಪ್‌ಡೇಟ್‌ಗಳನ್ನು ಪಡೆಯಿರಿ, Vijay Karnataka ಫೇಸ್‌ಬುಕ್‌ಪೇಜ್‌ ಲೈಕ್‌ ಮಾಡಿರಿ