ದಿಲ್ಲಿಯಲ್ಲಿ ಗಾಳಿ ಗುಣಮಟ್ಟ ಸುಧಾರಣೆ: ಜನರಿಗೆ ನೆಮ್ಮದಿ

ಹೊಸದಿಲ್ಲಿ : ಸುಮಾರು ಒಂದು ವಾರ ಕಾಲ 'ತೀವ್ರ' ಅಪಾಯಕಾರಿ ಮಟ್ಟದಲ್ಲಿದ್ದ ದಿಲ್ಲಿಯ ವಾಯು ಮಾಲಿನ್ಯ ಕೊಂಚ ತಗ್ಗಿದ್ದು, ಗಾಳಿಯ ಗುಣಮಟ್ಟ ಸುಮಾರು ಒಂದು ವಾರದ ಬಳಿಕ ಇದೇ ಮೊದಲ ಬಾರಿ 'ಸಾಧಾರಣ' ಮಟ್ಟಕ್ಕೆ ಬಂದಿದೆ.

ಗಾಳಿಯಲ್ಲಿ ತೇವಾಂಶ ಹೆಚ್ಚಾಗಿರುವುದೇ ವಾಯು ಗುಣಮಟ್ಟ ಹೆಚ್ಚಾಗಲು ಮುಖ್ಯ ಕಾರಣ ಎಂದು 'ಗಾಳಿ ಗುಣಮಟ್ಟ ಮತ್ತು ಹವಾಮಾನ ಮುನ್ಸೂಚನೆ ಹಾಗೂ ಸಂಶೋಧನಾ ಸಂಸ್ಥೆ' (ಎಸ್‌ಎಎಫ್‌ಎಆರ್‌) ತಿಳಿಸಿದೆ. ತನ್ಮಧ್ಯೆ, ನಗರದಲ್ಲಿ ಗುಡುಗು ಸಹಿತ ಮಳೆಯಾಗುವ ಸಾಧ್ಯತೆಯಿದೆ ಎಂದು ಹವಾಮಾನ ಇಲಾಖೆ ತಿಳಿಸಿದೆ.

ಕಳೆದ ಮಂಗಳವಾರ ದಿಲ್ಲಿಯಲ್ಲಿ ವಾಯು ಮಾಲಿನ್ಯ ಪ್ರಮಾಣ ಅತ್ಯಂತ ಗಂಭೀರ ಮಟ್ಟಕ್ಕೆ ತಲುಪಿತ್ತು. ರಾಜಸ್ಥಾನ ಸೇರಿದಂತೆ ಉತ್ತರ ಭಾರತದ ಹಲವು ರಾಜ್ಯಗಳಲ್ಲಿ ಬೀಸಿದ ಧೂಳು ಚಂಡಮಾರುತ ಇದಕ್ಕೆ ಕಾರಣವಾಗಿತ್ತು.

ಕೇಂದ್ರ ಮಾಲಿನ್ಯ ನಿಯಂತ್ರಣ ಮಂಡಳಿ ಅಂಕಿ-ಅಂಶಗಳ ಪ್ರಕಾರ, ಸೋಮವಾರ ದಿಲ್ಲಿ-ಎನ್‌ಸಿಆರ್‌ ವಲಯದಲ್ಲಿ 'ಪಿಎಂ10' ಮಟ್ಟ (ಗಾಳಿಯಲ್ಲಿ 10 ಮಿ.ಮೀ.ಗಿಂತಲೂ ಚಿಕ್ಕ ಕಣಗಳ ಉಪಸ್ಥಿತಿ) 191 ದಾಖಲಾಗಿದೆ. ದಿಲ್ಲಿಯಲ್ಲಿ ಈ ಪ್ರಮಾಣ 187ರಷ್ಟಿದೆ. 'ಪಿಎಂ10' ಪ್ರಮಾಣವು 0-100 ಇದ್ದರೆ, ಉತ್ತಮ, 101-250 ಇದ್ದರೆ ಸಾಧಾರಣ ಮತ್ತು 251-350 ಇದ್ದರೆ 'ಅಪಾಯಕಾರಿ' ಮತ್ತು 431-550 ಇದ್ದರೆ ಅತ್ಯಂತ ಅಪಾಯಕಾರಿ' ಎಂದು ಪರಿಗಣಿಸಲಾಗುತ್ತದೆ. ನಗರದಲ್ಲಿ 'ಪಿಎಂ'2.5 ಪ್ರಮಾಣವೂ (ಗಾಳಿಯಲ್ಲಿ 2.5 ಮಿ.ಮೀ.ಗಿಂತಲೂ ಚಿಕ್ಕ ಕಣಗಳ ಉಪಸ್ಥಿತಿ) ಅತ್ಯಂತ ಅಪಾಯಕಾರಿ ಮಟ್ಟದಿಂದ ಸಾಧಾರಣ ಮಟ್ಟಕ್ಕೆ ಬಂದಿದ್ದು, ದಿಲ್ಲಿ-ಎನ್‌ಸಿಆರ್‌ ವಲಯದಲ್ಲಿ ಇದೆ ಮಟ್ಟ 68 ಇದ್ದರೆ, ದಿಲ್ಲಿಯಲ್ಲಿ 66 ಇದೆ.

ಗುಡುಗು ಸಹಿತ ಮಳೆಯಿಂದ ವಾತಾವರಣದಲ್ಲಿ ತೇವಾಂಶ ಮತ್ತಷ್ಟು ಹೆಚ್ಚುವ ಕಾರಣ, ಗಾಳಿಯ ಗುಣಮಟ್ಟ ಮತ್ತಷ್ಟು ಸುಧಾರಿಸುವ ಸಾಧ್ಯತೆಯಿದೆ ಎಂದು ಎಸ್‌ಎಎಫ್‌ಎಆರ್‌ ತಿಳಿಸಿದೆ.