ಆಕಾಶ್‌ ಕ್ಷಿಪಣಿಗೆ ವಿದೇಶಗಳಿಂದಲೂ ಬೇಡಿಕೆ

ಕೊಯಮತ್ತೂರು: ಸ್ಥಳೀಯವಾಗಿ ಅಭಿವೃದ್ಧಿಪಡಿಸಲಾದ ಆಕಾಶ್‌ ಕ್ಷಿಪಣಿಗಳನ್ನು ಖರೀದಿಸಲು ಅನೇಕ ದೇಶಗಳು ಆಸಕ್ತಿ ತೋರಿವೆ ಎಂದು ರಕ್ಷ ಣಾ ಸಂಶೋಧನೆ ಮತ್ತು ಅಭಿವೃದ್ಧಿ ಸಂಸ್ಥೆಯ(ಡಿಆರ್‌ಡಿಒ) ಅಧ್ಯಕ್ಷ ಎಸ್‌.ಕ್ರಿಸ್ಟೋಫರ್‌ ತಿಳಿಸಿದ್ದಾರೆ.

ಎಲ್ಲಾ ಹವಾಮಾನದಲ್ಲೂ ಕಾರ್ಯನಿರ್ವಹಿಸುವ ಮಧ್ಯಮ ಶ್ರೇಣಿಯ ಆಕಾಶ್‌ ಕ್ಷಿಪಣಿಗಳ ಮಾರಾಟ ಸಂಬಂಧ ವಿವಿಧ ದೇಶಗಳ ಜತೆ ಮಾತುಕತೆ ಮುಂದುವರಿದಿದೆ ಎಂದು ಇಲ್ಲಿನ ಕಾರ್ಯಕ್ರಮವೊಂದರಲ್ಲಿ ಭಾಗವಹಿಸಿ ಮಾತನಾಡಿದ ಅವರು ತಿಳಿಸಿದ್ದಾರೆ.

ಡಿಆರ್‌ಡಿಒ ಅಭಿವೃದ್ಧಿಪಡಿಸಿರುವ ಆಕಾಶ್‌ ಕ್ಷಿಪಣಿ ವ್ಯವಸ್ಥೆಯು, ವಾಯುಪಡೆ ಜೆಟ್‌ಗಳು, ಕ್ರ್ಯೂಸ್‌ ಕ್ಷಿಪಣಿಗಳು, ಬ್ಯಾಲಿಸ್ಟಿಕ್‌ ಕ್ಷಿಪಣಿಗಳು, ಆಕಾಶ ಮತ್ತು ನೆಲ ಎರಡರಲ್ಲೂ ಕಾರ್ಯನಿರ್ವಹಿಸುವ ಕ್ಷಿಪಣಿಗಳು ಸೇರಿದಂತೆ ಎಲ್ಲಾ ರೀತಿಯ ವೈಮಾನಿಕ ದಾಳಿಗಳನ್ನು ತಡೆಯುವ ಸಾಮರ್ಥ್ಯ‌ ಹೊಂದಿದೆ.